No Kasanom a Mataginayon ti Panggedam

“Nakakitaka kadi iti tao a nasigo iti trabahona? Iti sanguanan ti ar-ari ti pagsaadannanto.”​—Proverbio 22:29.

KAS ipamatmat ti bersikulo ti Biblia nga adda iti ngato, masansan a maipatpateg dagiti nasigo a trabahador. Ania ti sumagmamano a paglaingan ken kalidad nga apresiaren unay dagiti amo kadagiti trabahadorda? Ni George, a direktor nga agaw-awat iti empleado para iti maysa a kompania a mangyem-empleo iti 700 a tattao, imbagana iti Agriingkayo!: “Ipatpategmi ti empleado a nalaing a makikomunikar ken nalaing a makipagtrabaho iti sabsabali.” Adda praktikal a balakad ti Biblia a makatulong kenka tapno mapasayaatmo dagitoy a paglaingan, ket iti kasta ad-adda a mataginayonmo ti trabahom. Amirisem ti sumagmamano a pagarigan.

Nalaing a Makikomunikar

Ipakita ti mannurat iti Biblia a ni Santiago a mangrugi ti trabaho ti nalaing a makikomunikar sakbay pay nga agsao. Insurat ni Santiago a ti maysa ket rumbeng a ‘nasiglat iti panagdengngeg, nainayad iti panagsao.’ (Santiago 1:19) Apay a nasayaat a balakad daytoy? Insurat ni Solomon: “No ti asinoman sumungbat iti maysa a banag sakbay a mangngegna, kinamaag dayta iti biangna ken maysa a pannakaipababa [wenno pannakaibabain].” (Proverbio 18:13) Kinapudnona, no denggem a naimbag ti amom ken dagiti padam nga empleado, malapdan dagiti di panagkinnaawatan ken saanka a makaaramid kadagiti minamaag a biddut.

No agsaoka, napateg met ti wagas ti panagsaom. No nalawag ken napigsa ti panagsaom, ad-adda a maawatandaka ket ad-adda a raemen ti agdengdengngeg ti ibagbagam. Kastoy ti kuna ni Brian a pagkonsultaan dagiti agbirbirok iti trabaho a nadakamat iti immuna nga artikulo: “Mabalin a masdaawka iti kaadu dagiti  maawanan iti trabaho, saan a gapu ta nakapuyda no di ket saan a nalawag ti pannakisaoda.”

Makitinnulongka iti Sabsabali

Gapu iti kaadu ti tiempo a pannakikaduam kadagiti katrabahuam, awan duadua nga am-ammom idan. Isu a mabalin a magargarika a mangitsismis kadakuada, ket ipaganetgetmo dagiti kamali ken pagkapuyanda. Ngem ibalakad ti Biblia a “pagbalinenyo a kalat ti agbiag a siuulimek ken asikasuenyo ti bukodyo nga aramid.” (1 Tesalonica 4:11) No kastoy ti aramidem, saanka a maaddaan iti reputasion a “mannakibiang kadagiti pakaseknan ti sabali a tattao.” (1 Pedro 4:15) Maysa pay, saan a masayang ti tiempom ken maliklikam ti makisupiat kadagiti katrabahuam.

No adda ipaaramidda, laglagipem ti nainsiriban a balakad ni Jesus: “No ti asinoman iti turay pilitennaka nga agserbi iti maysa a milia, kumuyogka kenkuana iti dua a milia.” (Mateo 5:41) Ibagbaga ni Jesus ti maipapan kadagiti autoridad ti gobierno, ngem sigurado nga agaplikar dayta a prinsipio iti pagtrabahuan. No maammuanda a nagagetka​—daydiay madadaan a mangaramid iti ad-adu a trabaho​—sigurado a mataginayonmo ti trabahom. Siempre, adda limitasion ti kalikaguman ti amom kenka. Kinuna ni Jesus a rumbeng nga ibayadyo ken “Cesar ti bambanag ni Cesar, ngem iti Dios ti bambanag ti Dios.” (Mateo 22:21) Impamatmat ni Jesus iti daytoy a prinsipio a dagiti adda iti saad rumbeng a saanda a mapalubosan a makibiang iti napatpateg a bambanag, kas iti panagdayaw iti Dios.

Agbalinka a Mapagpiaran

Maysa a surbey iti nasurok a 1,400 a kompania ti nangipalgak a ti “kinamapagpiaran ken kinatarnaw dagiti aplikante ti maibilang a pakaallukoyan unay” ti kaaduan nga amo. Nalawag a ti kinamapagpiaran saanna laeng a ramanen ti di panagtakaw iti kuarta wenno material a banag a kukua ti amom. Kaipapananna met ti saan a panagtakaw iti tiempo. Impakita ti maysa a panagadal nga inaramid ti maysa nga ahensia nga agiserserrek kadagiti aplikante nga 4 nga oras ken 15 a minuto ti promedio a tiempo a tinakaw ti tunggal empleado iti kada lawas. Malaksid iti dadduma a pamay-an ti panagtakaw iti tiempo, nairuamen dagitoy a mannanakaw iti tiempo a naladaw a sumrek ken nasapa nga agawid, ken makitungtong iti padada nga empleado bayat ti oras ti trabaho.

Mamalakad ti Biblia: “Ti agtatakaw saan koma nga agtakawen, no di ket agtrabaho koma a sipipinget, nga aramidenna babaen kadagiti imana ti aramid a naimbag.” (Efeso 4:28) Maysa pay, iparparegta ti Sao ti Dios kadagiti Kristiano nga agtrabahoda a sigagaget, uray no saan a direkta nga agpalpaliiw dagiti addaan iti autoridad. Insurat ni apostol Pablo: “Agtulnogkayo iti amin a banag kadagidiay appoyo iti nainlasagan a kaipapanan, saan a buyogen ti ar-aramid a panagserbi iti mata, a kas manangay-ayo iti tattao, no di ket buyogen ti kinapasnek ti puso, buyogen ti panagbuteng ken Jehova.” (Colosas 3:22) No ammoda a nagagetka nga agtrabaho​—uray no saanda nga agpalpaliiw​—mapagtalkanka nga empleado.

Agbalin a Realistiko

Siuumiso nga impadto ti Biblia a ti kaaldawantayo ket napeggad a tiempo a narigat a pakilangenan. (2 Timoteo 3:1) Sigurado a di natalged ti ekonomia gapu iti di natalged a kasasaad ti politika ken kagimongan ken dagiti riribuk. (Mateo 24:3-8) Isu nga uray no iyaplikarmo dagiti naibagan a singasing, mabalin a maawananka latta iti trabaho.

Nupay kasta, makatulong ti panangyaplikar kadagiti prinsipio ti Biblia tapno saanka a madanagan iti kinaawan ti panggedam. Kinuna ni Jesus: “No ita, ti Dios kawesanna a kasta ti mulmula iti talon, nga adda ditoy ita nga aldaw ket inton bigat maipuruak iti urno, saan kadi nga ad-adda pay a kawesannakayto, dakayo a bassitan pammati? Gapuna dikay pulos maringgoran ket kunaenyo, ‘Ania ti kanenmi?’ wenno, ‘Ania ti inumenmi?’ wenno, ‘Ania ti pagkawesmi?’ . . . Ta ammo ti nailangitan nga Amayo nga amin dagitoy a banag ket kasapulanyo.”​—Mateo 6:30-32.

Kas iti minilion a sabsabali iti intero a lubong, napaneknekan ti nadakamat itay a ni Ericka a pudno dagiti sasao iti ngato. Kastoy ti panagriknana: “Maragragsakanak iti agdama a trabahok. Ngem sigun iti kapadasak, ammok nga agbalbaliw dagiti bambanag. Nupay kasta, idi inyaplikarko dagiti prinsipio ti Biblia ken nagtalekak ken Jehova, nasursurok ti saan unay a madanagan no awan ti trabahok ken no kasano nga ad-adda a makontentoak iti trabahok.”

[Ladawan iti panid 10]

Mabalin a maawananka iti trabaho no dika agim-imdeng kadagiti miting