Asidegen nga Agpatingga​—Ti Amin a Didigra

“Dakayo nga annak ken appoko. Dumngegkayo! . . . Sigurado nga umapuyto daytoy a bantay. Ngem sakbay a mapasamak daytoy, agdaranudor, aggurruod, ken agginggined. Pumsuak ti asuk ken gil-ayab, sa agkimat, ti angin agdaranudor ken agsagawisiw. Partakanyo ti agtalaw . . . No diyo ikankano, ken no ad-adda nga ikaluyayo dagiti sanikuayo ngem iti biagyo, mataykayo. Diyo pakadanagan ti pagtaenganyo, imbes ketdi, agtalawkayon a dagus.”

DAYTA a pakdaar a naadaw iti libro nga Earth Shock nga insurat ni Andrew Robinson, ket naikitikit iti maysa a pakalaglagipan a tapi iti Portici​—maysa nga ili iti sakaanan ti Mount Vesuvius idiay Italia​—kalpasan a bimtak ti bulkan idi 1631. Natay ti 4,000 iti dayta a panagbettak. “Di ninamnama,” kinuna ni Robinson, “dayta a panagbettak ti namaglatak iti Vesuvius iti kaaduan a tattao.” Kasano? Ti pannakaibangon manen ti Portici ti nangiturong iti pannakatakuat iti Herculaneum ken Pompeii. Nadadael ken nagaburan ti dua a siudad idi bimtak ti Vesuvius idi 79 K.P.

Ni Pliny the Younger, a maysa a Romano a nakalasat  iti dayta a didigra ken nagbalin a gobernador idi agangay, insuratna daytoy naisangsangayan a pakdaar. Isuda ken ni nanangna, ken ti dadduma pay impangagda ti pakdaar isu a nakalasatda.

Mamakdaar a Pagilasinan iti Panawentayo

Ita, umad-adanitayon iti panungpalan dagiti sistema ti ekonomia, kagimongan, ken politika iti lubong. Kasano nga ammotayo a kasta? Agsipud ta impadto ni Jesu-Kristo ti agsasaruno a sangalubongan a pasamak a mangipaay iti pagilasinan a mangipamatmat nga asidegen ti aldaw a pannakikuenta ti Dios. Kas iti bulkan nga agdaranudor, agasuk, ken agipugso kadagiti beggang, dayta a pagilasinan a buklen ti adu a pasamak iramanna dagiti dadakkel a gubat, ginggined, bisin, ken angol​—nga amin dagitoy ket nakaron ti panangdadaelda iti lubong sipud pay idi 1914.​—Mateo 24:3-8; Lucas 21:10, 11; Apocalipsis 6:1-8.

Ngem ti mamakdaar a pagilasinan nga inted ni Jesus iramanna met ti mensahe ti namnama. Kinunana: “Daytoy naimbag a damag ti pagarian, maikaskasabanto iti intero a mapagnaedan a daga a maipaay a pangsaksi kadagiti amin a nasion; ket iti kasta umayton ti panungpalan.” (Mateo 24:14) Paliiwem nga inawagan ni Jesus ti mensahe ti Pagarian a “naimbag a damag.” Naimbag a damag a talaga dayta agsipud ta ti Pagarian ti Dios, a maysa a nailangitan a gobierno nga iturayan ni Kristo Jesus, ikkatennanto ti amin a makadadael nga inaramid ti tao. Maysa pay, pagpatinggaennanto dagiti natural a didigra.​—Lucas 4:43; Apocalipsis 21:3, 4.

Kinapudnona, kas tao ditoy daga, impakitana ti pannakabalinna kadagiti kasasaad ti paniempo babaen ti panangpasardengna iti bagyo a mamagpeggad iti biag. Gapu iti siddaawda, kinuna dagiti mabutbuteng nga adalanna: “Siasino a pudpudno daytoy, ta bilinenna uray dagiti angin ken ti danum, ket agtulnogda kenkuana?” (Lucas 8:22-25) Ita, saanen a maysa laeng a tao ni Jesus, no di ket maysan a mannakabalin nga espiritu. Gapuna, saannanton a parikut iti panangkontrol kadagiti kasasaad ti paniempo tapno saan nga agproblema dagiti iturayanna!​—Salmo 2:6-9; Apocalipsis 11:15.

Ti dadduma mabalin a matmatanda amin dagitoy kas awan mamaayna nga arapaap. Ngem laglagipem a ti padto ti Biblia​—saan a kas kadagiti kari ken padto ti tao​—ket natungpalda amin, agraman dagiti padto a nakitatayo a natungpalen sipud idi 1914. (Isaias 46:10; 55:10, 11) Wen, manamnamatayo ti natalna a masanguanan ti daga. Narimat met ti masakbayantayo no ipapusotayo ti Sao ti Dios ken ipangagtayo ti naayat a pakdaarna maipapan kadagiti nakaam-amak ken asidegen a mapasamak.​—Mateo 24:42, 44; Juan 17:3.

[Kahon/Ladawan iti panid 11]

ANIA TI NAMNAMA DAGITI INGUNGOTENTAYO A PIMMUSAYEN?

NO PUMUSAY ti ingungotentayo, mabalin nga agladingittayo unay. Ibaga ti Biblia kadatayo a nagsangit ni Jesus idi pimmusay ti patpatgenna a gayyem a ni Lazaro. Ngem sumagmamano la a minuto kalpasanna, nangaramid iti nakaskasdaaw a milagro​—pinagungarna ni Lazaro! (Juan 11:32-44) Idi inaramidna dayta, nangted iti intero a sangatauan ti natibker a pakaibatayan ti nakaskasdaaw nga inkarina a nasaksakbay iti ministeriona idi kinunana: “Um-umayen ti oras nga amin dagidiay adda kadagiti pakalaglagipan a tanem mangngegdanto ti timekna [ni Jesus] ket rummuarda.” (Juan 5:28, 29) Sapay koma ta ti nagpateg a namnama ti panagungar iti paraiso a daga liwliwaenna ti amin a pimmusay ti ingungotenda.​—Aramid 24:15.

[Dagiti Ladawan iti panid 10]

Ipangpangagmo kadi ti pakdaar a daytoy agdama a lubong addan iti maudi nga al-aldawna?

[Picture Credit Line iti panid 10]

USGS, David A. Johnston, Cascades Volcano Observatory