Manipud Kadagiti Agbasbasa

Panagsikog Dagiti Tin-edyer Napikapikak iti serye a “Panagsikog Dagiti Tin-edyer​—Sangalubongan a Trahedia.” (Oktubre 8, 2004) Nagsikogak idi agtawenak iti 16. Apresiarek ta impaganetgetyo ti kinapateg ti panangandingay iti ina ken ti pannakaseknan ni Jehova iti maladaga, a saan a mapabasol iti aniaman. Pagyamanan iti kasta a naayat nga artikulo.

M. R., Estados Unidos

Impakitak daytoy a ruar ti Agriingkayo! iti panguluen dagiti mammaltot wenno partera iti asideg a klinika. Kinunana nga ita pay la nga immadu ti agpaspasngay a babbalasitang nga agtawen iti 14 ken 15. Imbagana a mabalinna nga usaren ti 20 a kopia daytoy a magasin tapno itedna a dagus kadagiti agtutubo ken kadagiti nagannak kadakuada.

I. R., Benin

Natakuatak a masikogak makabulan sakbay nga agtawenak iti 17. Ti panangipudno kadagiti dadakkelko ti karirigatan ken kasaeman nga inaramidko. Sapay koma ta basaen ken ipapuso dagiti agtutubo daytoy nga artikulo. Diak pulos impagarup a mapasamak dayta kaniak!

D. C., Estados Unidos

Nagbalinak nga ina idi agtawenak iti 17. Napilitanak a makiasawa ngem dagus a nagpatingga dayta iti panagdiborsio. Nasaem a panunoten a babaen ti apurado a pannakidenna, a diak ammo idi dagiti ibungana, naikapisak iti nagadu koma a magapuanak. Kanayon a bagbagaak dagiti agtutubo a saanda nga aramiden daytoy nakaro a kamali. Agyamanak unay gapu iti artikuloyo!

N. C., Honduras

“Jehova, Nasarakannak!” Agtawenak iti 15, ket talaga a nagustuak a binasa ti artikulo a “Jehova, Nasarakannak!” (Oktubre 8, 2004) Ti kapadasan ni Nelly ti nakatulong kaniak tapno ad-adda a maawatak ti kinuna ti Santiago 4:8: “Umadanikayo iti Dios, ket isu umadaninto kadakayo.” Pagyamanan kadakayo gapu iti dayta a makapabileg-pammati nga artikulo!

K. P., Estados Unidos

Ti kapadasan ni Nelly Lenz ti nakakombinsiranmi a ni Jehova ket naayat a Dios ken ipamuspusanna a masarakanmi isuna no itultuloymi a sapulen.

M. K., Japan

Makaliwliwa a masiguradotayo babaen kadagiti artikulo a kas iti daytoy nga amin a karnero ni Jehova ket nakapatpateg kenkuana ta sadinoman ti ayanda, malagip ken tulonganna ti tunggal maysa kadakuada.

J. G., Canada

Nagsangitak gapu iti daytoy nga artikulo. Saan a Saksi ni Jehova ti dadakkelko, isu a saanda a naasi kaniak. Maragsakanak ta nagtalinaed ni Nelly a di maisin iti determinasionna nga agserbi ken Jehova.

K. L., Jamaica

Agtawenak iti 12. Makaparegta unay a maammuan a kasano man kaadu ti parikuttayo iti pagtaengan, kanayon a tulongannatayo ni Jehova a mangdaer kadagita.

J. W., Estados Unidos

Naimbag ta inranud ni Nelly ti kapadasanna kadakami. Dayta ti makatulongto kadagiti annak nga adda iti kasta a kasasaad. Nasken met a laglagipen dagiti nataengan dagitoy nga ubbing. Nalaka a malipatan nga adda naisangsangayan a kasapulanda iti kongregasion.

M. K., Denmark

Ita pay laeng a napikapikak unay iti binasak a kapadasan. Naammuak met ti kaipapanan ti panangitandudo iti kinapudno nupay agtutuboak pay laeng. Iti uppat a tawen, sisiak ti agserserbi ken Jehova iti pamiliami. Napikapikak unay idi nabasak ti pannakaseknan a mismo ni Jehova ken Nelly. Pagyamanan kadakayo gapu iti kasta a makaparegta a kapadasan. Pagyamanan, Nelly!

G. W., Alemania