Napakdaaran Babaen ti Panagbasana iti Agriingkayo!

DAGITI kanayon nga agbasbasa iti Agriingkayo! apresiarenda ti kinapateg dagiti artikulona. Ngem para iti agassawa nga Aleman nga agbakbakasion idiay Khao Lak, Thailand, idi napan a Disiembre, naisangsangayan ti kinapateg ti artikulo a napauluan iti “Dagiti Mammapatay a Dalluyon​—Sarsarita ken Aktual a Pasamak,” iti ruar ti Pebrero 8, 2001.

Impadamag ti Aleman a periodiko a Frankenpost (Selber Tagblatt) ti kapadasan ti agassawa: “‘Aglanglangoykami idi,’ nalagip ni Roswitha Gesell. Kalpasan ti panaglangoyda iti baybay, nagawid ti agassawa a Gesell iti otelda tapno agsukat. Deskribiren ni Reiner Gesell ti nakaam-amak a buya a nasungadanda kalpasan dayta: ‘Idi nagsublikami iti aplaya sangapulo a minuto kalpasanna, napukawen ti baybay.’ Agingga iti kadilian, nga agarup pito a kilometro [uppat a milia] manipud iti kosta, ti laeng tukok ti baybay ti makita. ‘Inyanud ti baybay ti amin nga aglanglangoy nga adda pay iti danum.’ Nakalasat ti agassawa a Gesell gapu iti maysa nga artikulo ti magasin nga Agriingkayo!” Inlawlawag ti artikulo a masansan a dagiti tsunami ti pakpakaunaan dagiti naisangsangayan a dalluyon nga agpatakdang.

“Idi nakita ti agassawa a Gesell dagiti dadakkel a dalluyon iti adayo, simmang-atdan ket rinugiandan ti nagawid. Malagip ni Reiner Gesell ti kasla pader a danum a mabalin a 12 agingga iti 15 a metro [40 agingga iti 50 a pie] ti kangatona. Maysa kadagiti nakaam-amak a malagipna ket dadduma a turista nga adda iti aplaya a masmasdaaw iti baybay. ‘Saanda a pimmanaw. Impukkawko nga agkamangda iti natalged a lugar, ngem awan ti nagtignay.’ Awan a pulos ti nakalasat kadakuada.”

No maipapan iti agassawa a Gesell, nagkomento met ti artikulo ti periodiko: “Kas Saksi ni Jehova, bayat ti bakasionda, nakitimpuyogda iti kaasitgan a kongregasion a 140 a kilometro [85 a milia] ti kaadayona manipud Khao Lak. Idi nadamag dagiti kapammatianda ti maipapan iti didigra, napan idiay Khao Lak ti intero a kongregasion tapno birokenda ida.”

Itan ta sitatalged a nakasublidan idiay Alemania, anian a yaman daytoy nga agassawa iti nagpateg nga impormasion a linaon ti Agriingkayo! Ket anian a yamanda kadagiti tattao a Thai a timmulong kadakuada, nangruna dagiti naespirituan a kakabsatda, a nangipakita iti pudno a Nakristianuan nga ayat!