No ti Panagtalinaedda a Sibibiag Agpannuray iti  Panangallilaw

BABAEN ITI MANNURAT TI AGRIINGKAYO! IDIAY ESPANIA

ITI lubong dagiti insekto, ti tunggal aldaw ket mangiparang iti dua a nakapatpateg a parikut: no kasano a makasarak iti umdas a pagtaraon ken no kasano a liklikan ti panagbalin a taraon ti sabsabali. Dagiti insekto ti makaay-ayo a taraon dagiti tumatayab, tukak, ken alutiit, alibut, wenno banias. Iti adu nga insekto, makalasatda no saan ida a mailasin.

Tapno saan ida a mailasin, adu a kita ti insekto ti mangiparang iti nakaskasdaaw a pananglimo. Ti kinalaingda a manglimo artapanna ti aniaman a pananglimo a naaramiden ti tao. Amirisem ti tallo a naisangsangayan a pagarigan.

● Dagiti dead-leaf butterfly. Dandani di mailasin dagiti kayumanggi a sirok ti payakda kadagiti nagango a bulong. Karaman iti diseniona ti kolor, dagiti urat, ken ungkay ti bulong. Nakalalaingda a manglimo ta mabalin nga agdisso dagiti kulibangbang iti berde a bulong ket agparangda a kas iti naregreg a bulong.

● Dagiti bush cricket, wenno katydid. Adu a bush cricket ti agbiag, saan a babaen iti panangtuladda kadagiti nagango a bulong, no di ket babaen ti panangtuladda kadagiti berde a bulong. “Saan la a ti sukog ken kolor ti tuladenda: tuladenda met ti padron dagiti urat ken agparang pay a kasla ap-aplaten,” kuna ti maysa a libro. No mingminganyo a naimbag ti naipakuyog a retrato, makitayo dagiti babassit a labang wenno mantsa iti payak ti insekto, isu nga agparang a kasla agpaypayso a berde a bulong nga ap-aplaten.

● Dagiti treehopper. Dagitoy a babassit nga insekto ket dandani di mailasin. Ket daytoy ti kangrunaan a makagapu iti pannakalasatda​—narigat a mailasin ida gapu iti panangtuladda kadagiti naintar a siit. Iti kasta, tunggal insekto ket kaarngi ti maysa a siit, isu a ti intero a grupo dagiti treehopper a naintar iti sanga pagparangenna a kasla siitan dayta. Ti laeng panangsukimat a naimbag ti mangipakita a dagiti “siit” ket dagiti gayam nagbabassit a treehopper.

Nakaskasdaaw ti kinanadumaduma ti pananglimo dagiti insekto a kas met iti kinaagpaysona. Maysa nga alimbubudo iti Costa Rica ti kaing-ingas ti ibleng ti tumatayab, ket dagiti stick insect ti dandani di mailasin kadagiti ruting. Adda lukton iti South Africa a kaing-ingas la unay ti bato, ket ti maysa a dangaw iti Israel naan-anay a tuladenna ti agsabsabong a mula a kankanenna.

Aniaman a kita ti panangallilaw a tuladenda, dayta ti mangsalaknib kadagiti insekto ket panirpatantayo dayta kadagiti nakaskasdaaw a kinanadumaduma iti panamarsua.

[Ladawan iti panid 22]

Magmagna nga stick insect

[Ladawan iti panid 23]

Maysa a dead-leaf butterfly

[Credit Line]

Zoo, Santillana del Mar, Cantabria, España

[Ladawan iti panid 23]

Maysa a bush cricket

[Ladawan iti panid 23]

Dagiti treehopper

[Ladawan iti panid 23]

Maysa nga alimbubudo a kaing-ingas ti ibleng ti tumatayab

[Credit Line]

© Gregory G. Dimijian/Photo Reasearchers