Awanton ti Buteng Posible Ngata?

NAAN-ANAY aya a makapagbiag nga awanan buteng ti siasinoman nga agnanaed iti napeggad a lubong ita? Imposible. Uray pay dagiti tattao a mamati iti Dios sarangtenda dagiti peggad a mamagdanag kadakuada. Kas pagarigan, idi umuna a siglo K.P., dinakamat ti managdaliasat nga apostol a ni Pablo a napasaranna ti pannakarba ti barko, peggad iti karkarayan, peggad kadagiti tulisan, ken peggad iti siudad. (2 Corinto 11:25-28) Kasta met ita, kaaduan kadatayo ti mangsaranget kadagiti napeggad a kasasaad.

Ngem nainsiriban a makapagannadtayo. No liklikantayo dagiti peggad, mabalin a ditay unay madanagan. Kinuna ti Biblia: “Nasaldet daydiay nakakita iti didigra ket rugianna ti aglemmeng, ngem daydiay awanan kapadasan limmasat ket masapul a sagabaenna ti pannusa.” (Proverbio 22:3) Ania ti sumagmamano a praktikal a pamuspusantayo?

Dagiti Aramidentayo a Panagannad

Makapainteres ta nupay nabayagen a naisurat ti Biblia, addaan iti adu a prinsipio a praktikal pay laeng tapno maliklikan dagiti peggad itatta. Kas pagarigan, kunaenna: “No maipapan iti asinoman a masirib, adda dagiti matana iti ulona; ngem daydiay maag agtultuloy a magna iti bin-ig a kinasipnget.” (Eclesiastes 2:14) Naimbag no am-ammotayo dagiti adda iti aglawlawtayo. No mabalin ditay mapan kadagiti nasipnget a lugar. Nalabit mabalin a magnaka kadagiti nalawag a kalsada no agawidka, uray no ad-adayo bassit ti pagnaem. Kuna met ti Biblia: “Ti dua nasaysayaat ngem iti maysa . . . No ti asinoman maringbawanna ti agmaymaysa, ti dua a sangsangkamaysa makapagtakderda [dagiti dua dumaerdanto, Ti Biblia] a maibusor kenkuana.” (Eclesiastes 4:9, 12) No agnanaedka iti napeggad a lugar, mabalin aya a mangawiska iti kaduam nga agawid?

No adda mang-holdup kenka, nainsiriban a laglagipem a napatpateg ti biag ngem dagiti sanikua. (Mateo 16:26) Napateg met a laglagipem a no aguummong ti makapungtot a bunggoy, napeggad ken di mapakpakadaan dagitoy.​—Exodo 23:2.

 No adda mangriribuk kenka nga agsao iti imoral, agsalawasaw, wenno mangpadas a mangsagid kenka iti di maiparbeng a wagas, ti kasayaatan ket sititibker nga agkedkedka. Nalabit masapul a panawam, kas ti inaramid ni Jose idi isu ket ginammatan ti maysa nga imoral a babai. Isu ti “nagtalaw ket napan iti ruar.” (Genesis 39:12) No imposible ti pumanaw, mabalin nga ibagam: “Isardengmo dayta!” wenno “Dinak sagiden!” wenno “Diak kayat dayta ibagbagam.” No mabalin, dika mapan iti lugar a kadawyan ti panangriribuk.

Panangdaer iti Buteng iti Pagtaengan

Ania ti maaramidmo no mabutengka iti naranggas nga asawa? Nalabit nainsiriban nga iplanom no kasano a makatalawka no kellaat a pagpeggaden ti asawam ti salun-at wenno biagmo wenno ti biag ti annakmo. * Isalaysay ti Biblia no kasano a siaannad nga implano ni Jacob ti panagtalawna no agbalin a naranggas ti kabsatna a ni Esau. Nagbanaganna, saanen a nausar ti plano, ngem nainsiriban a panagannad dayta. (Genesis 32:6-8) Ti plano a panagtalaw mabalin a ramanenna ti panangsapul iti pagdagusam no kasapulan. Mabalin nga isakbaymo nga ibaga iti dayta a tao no ania dagiti kasapulam. Mabalin a nasayaat met no idulinmo dagiti napateg a papeles ken dadduma a napateg a kasapulam iti lugar a nalakam nga alaen.

Mabalin met nga idarummo kadagiti autoridad ti panangabuso ti asawam ken kiddawem ti pannalaknibda. * Isuro ti Biblia nga apitentayo ti bunga ti ar-aramidtayo. (Galacia 6:7) Maipapan kadagiti autoridad ti gobierno, kinuna ti Biblia: “Dayta ket ministro ti Dios agpaay kenka a pagimbagam. Ngem no ar-aramidem ti dakes, agbutengka.” (Roma 13:4) Ti panangkabkabil ket agpada a nakaro a krimen iti pagtaengan ken iti lansangan. Iti adu a pagilian, ti panangsiim ket maysa met a krimen.

Mabalin a dika unay agbuteng no aramidem dagiti naisingasing. Ngem ti Biblia saan laeng a mangipaay iti praktikal a balakad a makatulong kenka, no di ket maysa dayta a libro dagiti matungtungpal a padto a mangipalgak iti ar-aramiden ti Dios ita ken iti masakbayan. Ania ti ipanamnama ti Biblia kadagiti tattao a kapilitan nga agbiag a sibubuteng?

No Ania ti Kaipapanan ti Kanayon a Mabutbuteng

Nakapatpateg ta insurat ni apostol Pablo: “Kadagiti maudi nga aldaw dumtengto dagiti napeggad a tiempo a narigat a pakilangenan. Ta dagiti tattao managayatdanto iti bagbagida, . . . awanan nainkasigudan a panagayat, saan a sidadaan iti aniaman a tulagan, manangparpardaya, awanan panagteppel, narungsot, awanan panagayat iti kinaimbag.” (2 Timoteo 3:1-3) Sigurado a nakaam-amak a tiempo ti iladawan dagitoy a sasao!

Idi sinarita ni Jesus “ti panungpalan ti sistema  ti bambanag,” kinunana: “Ti nasion tumakderto a bumusor iti nasion, ken ti pagarian a bumusor iti pagarian; ket addanto dadakkel a ginggined, ket iti nadumaduma a disso, dagiti angol ken dagiti kinakirang ti taraon; ket addanto dagiti nakabutbuteng a buya ket manipud langit dadakkel a pagilasinan.” (Mateo 24:3, 7, 8; Lucas 21:10, 11) Ngarud, ditay koma agsiddaaw kadagiti “nakabutbuteng a buya” a nakitatayo a mangdegdeg iti agdama a kanayon a panagbuteng. Ngem ania ti kaipapananda?

Kinuna ni Jesus: “Inton makitayo a mapaspasamak dagitoy a banag, ammuenyo a ti pagarian ti Dios asidegen.” (Lucas 21:31) Iti kaaldawantayo, namnamaentayo ti maysa a gobierno nga iturayan ti Dios manipud langit a mangituray iti intero a sangatauan. (Daniel 2:44) Anianto ngata ti kasasaad ti biag?

Awanton ti Buteng!

Deskribiren ti Biblia ti masakbayan a tiempo iti kappia inton agpatingga dagiti gubat, awanton dagiti managdakdakes, ket ti daga mapnonton kadagiti tattao nga agay-ayat iti Dios. Nagsurat ni Pedro, a maysa nga apostol ni Jesus, maipapan iti masanguanan nga “aldaw ti panangukom ken ti pannakadadael dagiti di nadiosan a tattao.” Awanton ti siasinoman a nadangkes a pagbutngan agsipud ta “agtaeng ti kinalinteg” ditoy daga. (2 Pedro 3:7, 9, 13) Agasem ti gin-awa ti panagbiag iti ummong dagiti mapagtalkan a tattao a pudno nga agiinnayat! Tulongannatayo daytoy a namnama a mangilasin iti nakaidumaan ti agdama a napeggad a tiempo. Dagitoy saanda nga agtultuloy iti agnanayon.​—Salmo 37:9-11.

Tapno matulongan dagidiay madandanagan, naibaga iti mammadto ni Jehova: “Sawenyo kadagidiay maringgoran ti pusoda: ‘Pumigsakayo. Dikay agbuteng. Adtoy! Ti bukodyo a Dios [wenno Diosyo] umayto buyogen iti pammales, ti Dios buyogen iti mismo a pangsupapak. Isu umayto ket isalakannakayo.’” (Isaias 35:4) Iti kasta, dagiti adipen ti pudno a Dios makapagtalekda iti masakbayan. (Filipos 4:6, 7) Kadagiti masapul nga agbiag a sibubuteng, makaliwliwa unay a maammuan a di binaybay-an ni Jehova a Dios ti orihinal a panggepna a mangpunno iti daga kadagiti tattao a makaammo kenkuana ken mangiparangarang kadagiti naayat a galadna.​—Genesis 1:26-28; Isaias 11:9.

Ammotayo nga awan ti makalapped iti panangtungpal ni Jehova kadagiti naayat a panggepna para iti sangatauan. (Isaias 55:10, 11; Roma 8:35-39) No maawatantayo daytoy, mabigbigtayo ti naisangsangayan a kaipapanan ti nailanad iti nakalatlatak a salmo. Sadiay mabasatayo: “Ni Jehova ti Pastorko. . . . Ti kararuak pabang-aranna. Iturongnak kadagiti desdes ti kinalinteg maipagapu iti naganna. Uray no magnaak iti ginget ti napuskol a kinasipnget, saanak nga agbuteng iti dakes, ta sikukuyogka kaniak.” (Salmo 23:1-4) Nupay kumaro dagiti nakabutbuteng a tiempo, asidegen ti lubong nga awanan buteng ket sigurado dayta.

[Footnotes]

[Dagiti Ladawan iti panid 8​—10]

Asidegen nga iyeg ti Dios ti maysa a lubong nga awanan buteng