Manipud Kadagiti Agbasbasa

Annak Nabiit pay a nabasak ti serye nga “Umuna a Tawtawen ti Ubing​—Ania ti Rumbeng nga Aramiden ti Nagannak?” (Oktubre 22, 2004) Nagustuak unay dagitoy nga artikulo isu a nagsuratak. Adda anakko a babai nga agtawenton iti lima. Impagarupko idi a rumbeng nga iyeskediulko ti aramidenna tunggal makariing. Ngem imbaga ti magasin a patien ti dadduma nga edukador a talaga a napateg no mapalubosan nga agay-ayam a bukbukodna. Ngamin, dayta ti mangparegta iti kinamanagparnuayna ken mangpatanor kadagiti paglainganna a makilangen, agpanunot, ken makipagrikna. Pagyamanan unay! Pangngaasiyo ta itultuloyyo ti agipablaak kadagiti artikulo nga umasping kadagitoy!

I. K., Russia

Makasangitak idi binasak daytoy a serye. Nalagipko ti napalabas a 29 a tawen idi naaddaanak iti anak, kas nasapa unay a nagbalin nga ina ken saan pay nga agserserbi ken Jehova. Adu ti nagkamaliak. Ngem nagbalin a lulua ti rag-o ti lulua ti panagbabawik. Itay napan la a lawas, impasngay ti balasangko ti inauna nga anakna. Agyamanak unay ken Jehova ta ti apokok ket addaan iti nagannak nga agay-ayat ken Jehova ken magunggonaan kadagita nga artikulo.

E. H., Estados Unidos

Agimtuod Dagiti Agtutubo Agyamanak unay gapu iti artikulo nga “Agimtuod Dagiti Agtutubo . . . Kasano a Maibagak Kenkuana ti Riknak?” (Oktubre 22, 2004) Nabiit pay a nakiwinnaswas kaniak ti maysa a balasang. Gapu ta adda pay la riknak kenkuana, diak naawanan iti namnama a makisinnublianan. Ngem kalpasan a nabasak daytoy nga artikulo, nabigbigko nga arapaap laengen dayta ket ita pay laeng, maawatkon ti agpayso a napasamak. Pagyamanan iti panangilawlawagyo iti kasta a praktikal a suheto. Naamirisko manen a makatulong dagiti prinsipio ti Biblia.

Y. K., Japan

Nupay diak pay kayat ti makiam-ammo iti daydiay ikasarkonto, makatulong daytoy nga artikulo agsipud ta pinagbalinnak a nasiput. Agpayso a dakami nga agtutubo ket nalaklaka a maimpluensiaan kadagiti panangraut ni Satanas, ngem agpayso met a tultulongannakami ni Jehova. Itultuloyyo ti agipablaak kadagita nga artikulo!

C. D., Romania

Daytoy nga artikulo ti nakatulong kaniak a mangmatmat kadagiti banag iti realistiko a wagas. Tinulongannak a mangngeddeng babaen ti panangpalabasko iti ad-adu a tiempo sakbay nga iyebkasko ti riknak. Kangrunaan ti amin, pinaregtanak nga aggaggaget iti kongregasion tapno mapasayaatko ti reputasionko sadiay agraman ti relasionko ken Jehova. Daytoy ti mamagbalin kaniak nga ad-adda a makaay-ayo iti amin. Pagyamanan iti kasta a nagsayaat nga ebkas ti pannakaseknanyo kadagiti agtutubo!

D. K., Holland

Maysa nga aldaw, nakasaritak ti maysa a gayyemko maipapan iti kursonadana a baro. Kayatna a balakadak maipapan iti aramidenna. Inkagumaanmi nga ammuen dagiti prinsipio ti Biblia. Agasenyo ti siddaawmi idi kabigatanna, naawatmi daytoy a magasin! Agyamanak unay iti panangipablaakyo kadagita nga artikulo!

J. S., Ireland

Agtawenak iti 14. Iti klasek idiay eskuelaan, masansan a mapagsasaritaan ti ayat ken dagiti agayan-ayat. Gapu iti panangbasak iti daytoy nga artikulo, nagadu ti naadalko maipapan kadagiti saguday a sapulek iti agbalinto nga asawak. Naawatak met a talaga a maseknan ni Jehova kadatayo ken ipapaayannatayo iti naimbag a balakad. Kayatko ti agtignay a nainsiriban​—iti wagas a makaay-ayo iti Diosno makilanglangenak kadagiti lallaki. Pangngaasiyo ta itultuloyyo ti agipablaak kadagiti nagsayaat nga artikulo a kas iti daytoy.

K. I., Japan