Naallukoyak iti Namarsua Gapu iti Kinapintas ti Kinapudno

KAS INSALAYSAY NI TSUYOSHI FUJII

SUMAGMAMANO a tawenen ti napalabas, naikkanak iti naisangsangayan nga oportunidad. Kas katulongan ni Senei Ikenobo, ti prinsipal ti Ikenobo nga eskuelaan iti panagurnos iti sabsabong, siak ti nangurnos iti sabsabong ti nangayed a siled ti Imperial Palace idiay Tokyo, Japan. Nagtrabahokami iti sidong ti nainget a seguridad. Iti makapadanag a kasasaad, inan-annadak a diak makaibelleng iti uray sangatedted a danum. Daydi ti maysa kadagiti tampok ti karerak iti lubong ti panagurnos iti sabsabong. Palubosandak a mangilawlawag no kasano a simrekak iti dayta a lubong.

Naipasngayak idi 1948 idiay Nishiwaki City, nga adda iti amianan a laud ti Kobe, Japan. Sipud pay kinaubingko, magusgustuak ti agbaliwbaliw a kinapintas ti uppat a paniempo a maiparangarang kadagiti sabong. Nupay kasta, pinadakkelnak ni lolak a maysa a napeklan a Budista, isu a diak pulos napanunot ti maipapan iti Namarsua.

Nagisuro ken agisursuro pay laeng ni nanangko iti ikebana, wenno panagurnos iti sabsabong, iti nakayanakak nga ili. Ditoy Japan, mararaem unay a kurso ti ikebana, a pagaammo met kas kado (ti wagas ti sabsabong). Nupay saannak a pulos a sinuruan ni Nanang iti daytoy nga arte, dakkel ti impluensiana kaniak. Idi tiempon tapno ikeddengko ti aramidek iti masanguanan, kayatko ti sumrek iti lubong ti ikebana. Insingasing ti maestrok ken ni nanangko a mangalaak iti regular a kurso iti unibersidad, ngem diak nagkitakit nga ageskuela iti Ikenobo College. Ti ikenobo ti kabayaganen a kurso iti ikebana ditoy Japan. Tapno maakseptarak, sipapasnek nga inadalko ti arte ti panagurnos iti sabong.

Rinugiak nga Inadal ti Ikebana

Biag ti pannakatema ti ikebana a maysa a tradisional nga arte dagiti Hapones. Palubosandak a mangilawlawag. Mabalin a napintas dagiti sabong a naikabil iti timba iti paglakuan, ngem kasano ti pannakaidiligda iti babassit a mulmula nga agsabsabong iti tay-ak wenno iti kaykayo nga agsabsabong iti kabambantayan? Iti natural a lugar, dagitoy ti mangiparikna kenka iti biag ken kadagiti paniempo. Daytanto ti tiempo nga ad-adda a mapikapik ti pusom. Ti ikebana ket maysa a pamay-an ti panangyebkas iti dayta a kinapintas iti nakaparsuaan babaen ti panagusar kadagiti sabong ken mula, ti panangaramid iti disenio a naibasar iti magustuam unay.

Kas pagarigan, ipapantayon a kayatmo nga ipasimudaag ti mariknan no otonio. Maaramidmo dayta babaen ti panangusarmo kadagiti adda a sabsabong iti dayta a paniempo, kas iti gentian ken patrinia, agraman dagiti bulbulong no otonio. Kayatmo kadi nga inayon ti kasasaad a kasla marikriknam ti makarepresko nga angin? Ti sumagmamano nga ungkay ti eulalia a kasla agpallapallayog ti mangipasimudaag iti kaadda ti angin, isu a kasla marikna dagiti makakita iti dayta ti angin no otonio. Nagustuak unay ti ikebana, ta maragsakanak unay a mangyebkas iti bagik babaen ti panangibagaybagayko kadagiti sabong ken mula iti maysa a plorera.

Dakkel a “Pamilia”

Nangrugi ti pakasaritaan ti ikebana kas pagarkos nga arte 500 a tawenen ti napalabas. Dagiti pageskuelaan iti ikebana ket tartarawidwidan ti maysa a prinsipal. Ti saad ti prinsipal ket maipatawid.  Kas nangtawid kadagiti artistiko a tradision, adda autoridadna kas pannakaama ti dakkel a “pamilia” dagiti pasurotna. Karaman kadagiti tradision, isurona iti sumaganad a kaputotan dagiti baro nga estilo nga impasdekna a maitunos iti panawen a pagbibiaganna.

Kalpasan a nagturposak iti Ikenobo College ken naileppasko ti dua tawen a teknikal a kurso iti kado, rinugiak ti nagtrabaho iti Ikenobo Foundation idi Enero 1971. Implanok ken inorganisarko ti “Ikebana Exhibitions by Ikenobo” iti intero a Japan. Nagdaliasatak met iti intero a pagilian a kaduak ti prinsipal kas maysa kadagiti katulonganna iti panagaramid kadagiti obrana.

Malaglagipko pay laeng ti damo a panagtakderko iti entablado ti Fukuoka Sports Center kas ti katulongan ti prinsipal bayat nga insurona ti panagurnos iti sabong. Napalalot’ nerbiosko a nangsango iti rinibu a tattao. Pinilkok dagiti ungkay ken pinutedko dagiti sanga, nga amin dagitoy ket diak koma inaramid. Ngem pinagbalin ti prinsipal a medio pagaangawan dayta bayat nga inlawlawagna iti tallaong ti ar-aramidenna. Dayta ti nakatulong tapno agkalmaak.

Idi naangay dagiti nasional a pasken a kaduami dagiti nalatak a tattao manipud iti ballasiw taaw, kinaduak ti prinsipal nga agurnos kadagiti sabong agpaay iti dayta nga okasion. Kas nadakamat itay, maysa kadagita a gundaway ti nangipan kaniak iti nangayed a siled ti Imperial Palace.

Idi naipasdek met laengen ti Ikenobo Central Training School a panggepna nga isuro manen dagiti instruktor iti intero a nasion, naitalek kaniak ti trabaho a nainaig iti panagisuro, panagaramid iti kurikulum, ken panangtarawidwid iti pannakaaramid dagiti libro ken pelikula a mausar kadagiti lektiur agpaay iti agarup 200,000 a masansanay iti 300 nga eskuelaanna iti intero a Japan. Nagbiaheak iti intero a pagilian tapno tarawidwidak ti kurso. Ti ikenobo ket addaan met kadagiti eskuelaan iti ballasiw taaw, isu a nagbiaheak idiay Taiwan sumagmamano a daras iti makatawen. Dayta ti makagapu a nagun-odak ti talek ti prinsipalko ken naipabaklay kaniak ti responsable a posision.

Tagtagiragsakek idi ti trabahok ngem saanak a naan-anay a napnek iti panagbiagko. Nupay ti trabahok ket nainaig kadagiti agkakapintas a banag, adda dagiti nakaupayak. Ti panagiinnimon ken panagiinnapal dagiti agsansanay ket nagtungpal iti panagpipinnadakes, isu a masansan nga agpabalakad kaniak dagiti lokal a mannursuro. Ngem iti organisasion a nairamuten dagiti nabayagen a kostumbre ken impluensia, nagadu ti diak kontrolado. Yantangay adu ti addaan iti napasnek a panagayat iti ikebana ken sipapasnek nga agadal iti dayta, inaramidko ti amin a kabaelak tapno makasursuroda a siraragsak.

Damo a Pannakaammo iti Kinapintas ti Kinapudno

Diak kayat ti relihion agsipud ta impagarupko a kullaapanna ti panunotko. Malaksid iti dayta, nakitakon ti nakaro a panaginsisingpet dagidiay agsasao maipapan iti talna ken kinaragsak. Iti kasumbangirna, sipud pay kinaubing ni baketko a Keiko, birbirokennan ti kinapudno. Naginteres iti nadumaduma a relihion ken dimngeg kadagiti pannursuroda, ngem awan kadakuada ti nakapennek iti naespirituan a bisinna.

Isu nga idi immay iti pagtaenganmi ti maysa kadagiti Saksi ni Jehova, immanamong ni Keiko a makipagadal iti Biblia. Imbagana kaniak ti amin a maad-adalna ken aniaman a nagustuanna. Makaay-ayo ti imbaga ni Keiko kaniak ngem saanak unay nga interesado a kas kenkuana.

Nupay kasta, intultuloy ni Keiko nga imbaga kaniak a sipapasnek ti panamatina iti maad-adalna manipud iti Biblia. No agbiaheak, kanayon nga adda dua a magasin a naibasar iti Biblia nga ikabilna iti bagko. Ngem diak binasa ida. Salsaluadak ti naipundarko iti adun a tawen. Kagatgatangmi ti bukodmi a balay, ket impagarupko a no awatek dagiti pannursuro iti Biblia, mabalin a mapukawko dayta. Kabayatanna, napartak ti irarang-ay ni Keiko ket iyap-aplikarna ti patpatienna. Nariknak a maipupueraak isu a naglidayak. Nupay ammok a husto ti ibagbagana, rinugiak a busoren.

Bimmusor Ngem Nagbalin nga Interesado

Adalemen ti rabii no agawidak manipud panggedak, ngem kadagiti rabii a tumabuno ni Keiko iti gimong dagiti Saksi ni Jehova, igagarak ti agawid a naladladaw ngem iti gagangay. Uray no agawidak iti alas dos wenno alas tres ti parbangon, ur-urayennak latta ni Keiko tapno ibagana ti  napasamak iti dayta nga aldaw, ken maipakitana a maseknan kaniak. Ngem diak maawat a pumanaw ti pamiliak iti sumagmamano nga oras tapno tumabuno kadagiti Nakristianuan a gimong. Inkarkarok ti ibubusorko ken rinugiakon a dakamaten ti panagdiborsio. Nupay kasta, nagtalinaed a kalmado ni Keiko.

Narigatanak a mangtarus iti reaksion ni Keiko. Nupay limmamiis ti relasionmi ken kanayon nga agkidar ti angkitna, maragsakan unay iti amin nga ar-aramidenna. Ti nasin-aw a puso ni Keiko ken ti awan pakapilawanna a kinaalumamayna ti nagustuak idi kenkuana. Ket dayta ti eksakto a pakadanagak di la ket ta naallilaw idi rinugiannan ti makipagadal iti Biblia.

Kaskasdi nga inyaplikar ni Keiko ti maad-adalna ket inkagumaanna ti agbalin a nasayaat nga asawa ken ina. Nupay bumusbusorak, no ipakaasina a tumabunoak kadagiti Nakristianuan a gimong ken asamblea, pasaray mapanak nalabit gapu ta pagpannakkelko ni Keiko.

Ngem agimonak met idi ken Jehova. Idi nakitak nga ikagkagumaan ni Keiko ti agbalbaliw, pinampanunotko no apay a dagiti pannursuro ti Biblia ket addaan iti kasta kadakkel nga epekto kadagiti tattao. ‘Apay a situtulok ni baketko a mangibtur iti amin a kita ti rigat agpaay ken Jehova?’ napanunotko.

Di nagbayag, dadduma kadagiti Kristiano a kakabsat iti kongregasion ni Keiko rinugiandakon a sarungkaran iti pagtaenganmi. Diak kayat ti makiam-ammo kadakuada. Ngem kayatko a maammuan no apay nga addaan ni Keiko iti kasta a natalna a panunot. Kamaudiananna, ad-adda a nagusiosoak isu nga immannugotak a makipagadal iti Biblia. Bayat a lumaglag-an ti riknak kadagiti mangsarsarungkar kaniak, nadlawko nga adda makapabang-ar kadakuada. Babaen iti linawas a panagadal iti Biblia, in-inut a rimmamut ti kinapudno ti Biblia iti pusok, isu a limmawa ti pannakaawatko.

Ti Kinapintas ti Nakaparsuaan ken ti Kinapudno

No padasek idi nga iyebkas ti kinapintas ken pannakabalin ti nakaparsuaan babaen iti ikebana, madanaganak no kasano nga ipasimudaag ti kinangayedna. Idi nasursurokon a ni Jehova ti Namarsua kadagiti nakaskasdaaw a banag iti nakaparsuaan, naawatak a naimbag. Kasano a matulad ti nagbassit a tao ti kinaartistiko ti Namarsua? Ni Jehova ti Kangrunaan a Mammutar! Nupay kasta, babaen iti panangikagumaak a mangtulad kenkuana, nasaysayaaten nga amang ti panangurnosko kadagiti sabong. Kinapudnona, kalpasan a rinugiak ti agadal iti Biblia, ibagbaga dagiti tattao a nagbalbaliwen ti obrak, ta ti kinaalumamay ket nainayonen iti kinasalibukag.

Dagiti kinapudno iti Biblia ti nakatulong tapno matarusak ti adu a banag nga ita laeng a naawatak. Idi naammuak a ti agturay iti lubong a ni Satanas a Diablo ti makin-utek iti panagsagaba ita ti tao ken manangallilaw ti pusotayo gapu iti basol a natawidtayo ken Adan, naawatak met laengen ti pudno a kaipapanan ti mapaspasamak iti aglawlawtayo. (Jeremias 17:9; 1 Juan 5:19) Naammuak a ni Jehova ket natalna a Dios, aglaplapusanan iti ayat, kinahustisia, pannakabalin, ken kinasirib (Deuteronomio 32:4; Roma 11:33; 1 Juan 4:8; Apocalipsis 11:17); nga imbaonna ni Jesus tapno matay agpaay kadatayo gapu iti panagayatna (Juan 3:16; 2 Corinto 5:14); ket addanto aldaw nga awanen ti panagsagaba wenno ipapatay (Apocalipsis 21:4). Talaga a nagustuak unay ti kinapintas dagitoy a kinapudno. Kanayonanna, iyap-aplikar dagiti Saksi ni Jehova ti pannursuro ni Jesus nga “ayatem ti padam a tao a kas iti bagim.” Ti pannakaawatko a mismo iti dayta ti nangipasigurado kaniak a daytoy ti pudno a relihion.​—Mateo 22:39.

Bangen a Parmeken

Bayat a rimmamut ti kinapudno iti pusok, adda nakasuotak. Idi saan a makatabuno ti prinsipalmi kadagiti pumpon, masansan a siak ti kasandina kadagiti ritual dagiti Budista. Nagbalin daytoy a pakasuotak idi panggepkon ti agdedikar ken Jehova. Inkeddengko a mismo a diak makipaset kadagiti ritual dagiti Budista. (1 Corinto 10:21) Siraraem nga inlawlawagko iti prinsipal a kayatkon ti agbautisar ket determinadoak a din makipaset iti aniaman a sabali a panagdayaw, uray pay no nairaman laeng dayta iti trabahok. Imbagana a dina busoren ti panagbalinko a Kristiano ken mabalinko a tamingen dagiti narelihiosuan a banag iti kayatko a pamay-an. Diak impagpagarup a kasta ti  reaksionna agsipud ta impagarupko no maungtanak ken mapukawko ti saadko.

Idi awanen dayta a lapped, nabautisaranak kas simbolo ti dedikasionko ken Jehova iti Nakristianuan nga asamblea idi Hunio 1983, makatawen kalpasan a rinugiak ti nakipagadal iti Biblia. Idi rimkuasak iti pagbautisaran, maragsakan unay ken aglulua ni Keiko a nangsabat kaniak. Agluluakami a nagyaman ken Jehova gapu iti ragsakmi a dua.

Desision a Mangisardeng iti Sekular a Karerak

Impakita ti prinsipal ti dakkel a pannakaawatna iti takderko kas dedikado a Kristiano. Inkagumaak ti aggaggaget iti trabahok ken ad-adda nga imbaklayko dagiti rebbengek. Nupay kasta, inkagumaak a pagbalinen a balanse ti panggedak ken ti Nakristianuan a panagbiagko. Pito a tawen nga ad-adda a rimmegtaak a nakipaset iti Nakristianuan a ministerio iti sumagmamano a bulan iti tunggal tawen.

Nupay kasta, masapul nga asikasuek a naimbag ti espiritualidad ti kakaisuna nga anakko ken ti kumapkapuy a salun-at ni Keiko. Napanunotko a rumbeng nga ad-adu ti tiempok a kadua ti pamiliak. Kayatko met nga iyun-una dagiti interes ti Pagarian iti biagko. Dagitoy a kasapulan ken tarigagay ti nangtignay kaniak a mangikararag ken Jehova maipapan iti panangisardengko iti karerak iti ikebana. Naamiris ti prinsipal a nakadesisionakon isu a kamaudiananna, saanak a narigatan a nagretiro idi Hulio 1990 iti edad nga 42.

Panangtulong iti Sabsabali a Makakita iti Kinapintas ti Kinapudno

Kalpasan la unay ti panagretirok, rinugiak ti amin-tiempo a ministerio tapno tulongak ti sabsabali a makasarak iti kinapudno. Ita, maysa nga aldaw iti kada lawas nga agisuroak iti panagurnos iti sabsabong, nga awanen ti restriksion ti estilo Ikenobo. Agserserbiak kas panglakayen iti kongregasion, ket tagtagiragsaken ni Keiko ti serbisio a kinapayunir ken manmanon nga agkidar ti angkitna. Kasado itan ti anakmi, ket maysa a ministerial nga adipen iti kabangibangmi a kongregasion. Anian a nagpateg a pribilehio kadakami amin a sangapamiliaan nga agserbi ken Jehova!

Iti sidong ti panagturay ni Jesu-Kristo iti Pagarian, segseggaak ti panangusarko kadagiti mula a pinadakkelko iti hardinko tapno agaramidak kadagiti napintas nga urnos ti sabsabong. Sipapasnek a tarigagayanmi a sangapamiliaan a sapay koma ta maidaydayawmi nga agnanayon ti natan-ok a nagan ni Jehova, ti Namarsua iti amin a napintas a banag.

[Ladawan iti panid 23]

Babaen ti ikebana, mabalinmo nga ipasimudaag ti impresionmo iti kinapintas ti nakaparsuaan

[Dagiti Ladawan iti panid 23]

Dakami a sangapamiliaan