Ti Nabayagen nga Artikulo Natukayna Dagiti Puso

ITI maysa nga eskuelaan idiay Suwałki, iti makin-amianan a daya a Poland, kiniddaw ti maysa a maestra a mangisagana dagiti estudiante iti salaysay maipapan iti aborsion. Nangisagana ti agtawen iti 16 a ni Justyna iti impormasion manipud kadagiti publikasion dagiti Saksi ni Jehova. Idi aldaw ti saritaan, ti maestra pinalubosanna dagiti estudiante a mangyebkas kadagiti opinionda.

“Inasitgak ti maestra ket impakitak kenkuana ti artikulo a ‘Diary ti Di Pay Naipasngay nga Ubing,’ a naipablaak iti Setiembre 22, 1980 a ruar ti Agriingkayo!,” kinuna ni Justyna. Imbagana iti maestrana: “Pangngaasiyo ta paliiwenyo a naisurat dayta sigun iti panangmatmat ti maysa nga ubing a sikog pay laeng, a dandanin maiparegreg. Para kaniak, makapainteres dayta.” Rinugian ti maestra nga imbasa ti diary. Siuulimek a nagimdeng ti amin nga estudiante.

Sakbay pay a magudua ti maestra nga imbasa ti diary, dinan maituloy isu a kiniddawna iti maysa nga estudiante a mangibasa iti dayta. Nagtugaw ti maestra ket nagsangiten. Kalpasan a naibasa ti diary, simmaruno ti nagsayaat a saritaan, ket nagkiddaw ti dadduma nga estudiante iti kopia ti artikulo. “Nagbaliw ti panangmatmat dagiti estudiante kadagiti literatura nga impablaak dagiti Saksi ni Jehova,” kinuna ni Justyna. “Negatibo idi ti panangmatmatda, ngem ita nasayaaten. Maysa a lalaki ti nagbalin payen a regular a managbasa iti Agriingkayo!”

No kasano a sibaballigi nga inusar ni Justyna ti maysa nga artikulo a nasarakanna iti Agriingkayo! a nasurok a 20 a tawen ti kabayagnan, makasarakkayto met iti “sangasupot a sirib” kadagiti nabayagen a ruar daytoy a magasin. (Job 28:18) No tumabunokayo kadagiti gimong iti Kingdom Hall dagiti Saksi ni Jehova iti lugaryo, mabalinyo a sukimaten dagiti tomo ti Agriingkayo! nga adda kadagiti estante iti librariada. Maragsakankayto nga agbasa kadagiti makatulong nga artikulo a praktikal latta uray no nabayagdan. Mabalinyo met ti agkiddaw iti kabaruan a kopia ti Agriingkayo! kadagiti Saksi ni Jehova iti lugaryo.

[Ladawan iti panid 31]

Ni Justyna idi ages-eskuela pay laeng