Adda Nasaysayaat a Nasarakanmi

KAS INSALAYSAY NI FRANCIS DEL ROSARIO DE PÁEZ

Idi 1988, kaduak dagiti manongko, agraman ti dadduma pay a grupo dagiti musiko, a nagpabuya iti rinibu a tattao iti Madison Square Garden, idiay New York City. Nagustuan unay dagiti agbuybuya ti grupomi, a nangitampok iti panagsalak. Ubbingkami pay laeng idi impamuspusan ti Tatang a pagballigien ti karerami.

KAS maysa a musiko, napaliiw ni tatangko nga adda saguday iti musika ti pito a manongko. Isu nga inlakona ti balaymi sa gimmatang kadagiti instrumento a pagtokar ken alikamen a kasapulan tapno mabuangay ti maysa a grupo dagiti musiko. Ubingak pay la idi ta sumagmamano pay la a tawen ti napalabas sipud pannakaipasngayko idi 1966. Idi agangay, nagnaed ti pamiliami iti ili ti Higüey idiay Dominican Republic.

Idi 1978 ti damo a panagpabuya dagiti manongko iti munisipio ti Higüey. Idi agangay, immakar ken nagpabuyada iti kabesera a Santo Domingo. Rinugianda ti nagtokar ken nagkanta iti baro nga estilo ti merengue isu nga ad-adda a limmatakda. * Ti grupo ket nagdinamag kas Los Hermanos Rosario (Ti Agkakabsat a Rosario).

Kayatko ti makikadua kadagiti manongko, yantangay nabayagen nga arapaapko ti agbalin a nalatak a sumasala. Iti maysa a padaya ni manongko a Pepe, a lider ti grupo, inawisnak nga agpabuya, sana kinuna: “Ni Francis ti maysa kadagiti adiek a babbai, isu ti buridek, ken ammona ti agsala.” Nagustuan dagiti dimmar-ay ti panagsalak. Inaprobetsarko ti gundaway, ket imbagak ken ni manong Pepe a kayatko ti agsala iti sanguanan ti grupo. Isu nga idi agtawenakon iti 16, agsalsalaakon iti amin a pabuya ti Los Hermanos Rosario.

Balligi ti Propesionko

Kasakbayanna, adda babbai a kumakanta ti grupo dagiti agtoktokar iti merengue ngem awan a pulos ti babai nga agsala iti tengnga ti entablado iti sango dagiti musiko a lallaki. Siak ti nangurnos iti amin a salaek. Nagusarak iti baro nga estilo ti panagsala tapno maakompaniaran ti pabuyami a merengue. Idi limmataken ti panagsalak, naawagan dayta iti a lo Francis Rosario.

Addaankami iti kanta a merengue a napauluan iti “Cumandé,” a ti paset dagiti liriko ket: “Y ahora todo el mundo como Francis Rosario” (Ita, agsalsalan ti amin a kas iti panagsala ni Francis Rosario). Tultuladen dagiti tattao ti panagsalak. No dadduma, basta agtugawda iti suelo tapno buyaendak nga agsala imbes nga agsalada a mismo. Idi agangay, ti retratok ti kanayonen a maus-usar a mangyanunsio iti panagpabuya ti grupomi. Maawatanen ti amin nga adda konsierto ti Los Hermanos Rosario.

Kalpasan a nangrugiak a nagpabuya a kadua dagiti manongko, dadduma a musiko ti nainayon iti grupomi, agraman ti tallo nga agkakabsat nga agapeliedo iti Páez. Maysa kadakuada ti tumutokar iti trumpeta nga agnagan iti Roberto, nga idi agangay ket nagbalin nga asawak. Nangrugi metten nga agballigi ti agkakabsat a Páez a kadua ti grupomi. Nangrugin nga immawat ti Los Hermanos Rosario iti adu nga awis tapno agpabuya iti telebision idiay Santo Domingo, ken agkonsierto iti dadduma a pagilian.

 Idi 1988, napankami idiay Estados Unidos ken Canada. Maysa kadagiti pabuyami ti nadakamatko itay idiay Madison Square Garden. Adu kadagiti kalatakan a miembro ti grupo ti merengue ti nakipaset sadiay, ket ti grupomi ti nagustuanda unay. Kalpasan dayta a pabuya, dagiti nangyurnos iti konsierto kanayon nga iyud-udidakami iti programa. Ad-adda a limmatak ti panagsalak ken immadu dagiti agrayo iti Los Hermanos Rosario. Naisangsangayan met ti iyaadu iti naglakuan kadagiti recording-mi.

Nagadu ti napananmi. Sinarungkaranmi ti Colombia, Ecuador, Panama, Puerto Rico, Curaçao, Espania, Alemania, ken dadduma pay a pagilian. Di nagbayag, dakami ti nagbalin a maysa kadagiti magustuan unay ti publiko a grupo dagiti musiko iti Latin America. Ti sala, ti entablado, dagiti kawes, ken dagiti kolorete ti nagbalin a kapatgan iti biagko.

Idi balasangak pay, sangkasaok a no kursonadanak ti maysa a baro ngem dina kayat ti agsala, idiak nga umuna sakbay nga idiak ti panagsala. Nupay kasta, asideg idin nga agbalbaliw ti kababalinko maipapan kadagiti ipangpangrunak iti biagko.

Naamirisko ti Kinapateg Dagiti Naespirituan a Banag

Nangrugi daytoy a panagbalbaliw idi 1991 a simmarungkarkami idiay Canary Islands. Nabiit pay idi a nagkallaysakami ken ni Roberto. Nangrugin a nakipagadal iti Biblia kadagiti Saksi ni Jehova ni manongna a Freddy, a kameng met iti grupo. Kanayon met nga itugtugotna dagiti publikasionda.

Maysa nga aldaw, nakitak ti libro a Mabalinyo ti Agbiag nga Agnanayon iti Paraiso a Daga iti siled ni Freddy, isu a rinugiak a binasa. Nagustuak ti kapitulo nga “Ania a Kita a Lugar ti Impierno?” Nagustuak agsipud ta imbaga ni Nanang a ti agar-aramid iti dakes ket mapuoranto idiay impierno isu a mabutengak a mapan sadiay.

Sumagmamano a lawas kalpasanna, bayat nga addakami idiay Canary Islands, naalisanak. Idi impandak idiay ospital, imbagak ken ni Roberto a kiddawenna ken Freddy ti libro a nakitak iti siledna. Kayatko a basaen dayta bayat nga agpapaungarak. Nagustuak ti libro. Maysa kadagiti naammuak ket ti impierno nga isursuro ti Biblia isu ti tanem ti sangatauan ken saan a pulos a panggep ti Dios a tutuoken ti asinoman. (Jeremias 7:31) Naragsakanak unay ta isursuro ti Biblia nga awan gayamen ti ammo dagiti natay.​—Eclesiastes 9:5, 10.

Idi nagsublikami idiay Dominican Republic, nagpaibaon ni Freddy iti maysa kadagiti Saksi ni Jehova a sumarungkar kadakami. Inranudna kadakami ti namnama nga agbiag nga agnanayon iti paraiso a daga, ket daytoy ti nangtignay met iti interes ni lakayko. (Salmo 37:29; Lucas 23:43) Nagpayadalkami iti Biblia.

Panagbalbaliw Dagiti Prinsipio ken Ipangpangruna

Bayat a rumangrang-aykami iti pannakaammo iti Biblia, nagbaliw ti panangmatmatko iti trabahok a magusgustuak unay. Dagiti prinsipio iti Biblia ti nangrugin a mangtubay iti panagpampanunotko. (Roma 12:2) Damagek no kua iti bagik:  ‘Rumbeng aya nga agsalaak iti kastoy a wagas iti imatang dagitoy a tattao? Saan a kasta ti kayatko.’ Nagkararagak iti Dios, “Pangngaasim ta ipanawnak iti daytoy a kasasaad.” Kinasaritak ni lakayko maipapan iti riknak, ket kasta met gayam ti riknana. “Agan-anuska, Dungngo,” kinunana. “Umikkatka nga umuna iti grupo ket sumarunoakto.”

Nagsikogak manen, ket yantangay limitadon ti panagsalak, nawaywayaak a tumabuno kadagiti Nakristianuan a gimong iti Kingdom Hall. Dagitoy ti nangpabileg kaniak, agraman ken Roberto a tumabtabuno metten isu a naapresiarmi ti kinapateg ti pannakitaripnong iti ili ni Jehova. Naawatanmi a tapno agtultuloy ti irarang-aymi iti dalan ti kinapudno ti Biblia, kasapulanmi ti panangisuro ken panangparegta a maipaay dagiti Nakristianuan a gimong. (Hebreo 10:24, 25) Uray idi nagtrabahokami iti ruar ti Dominican Republic, nagsapulkami ken Roberto iti Kingdom Hall ken nakigimongkami.

Kalpasan ti panagpasngayko, nagtrabahoak manen ngem saanakon a naragsak. Nabatad ti panagbalbaliw, isu a dagiti periodista nangrugin a binabalawdak. Masansan a damagendak, “Apay a naiduman ti panagsalam?” Kanayon nga inkararagko ken Jehova nga isurona kaniak ti pamay-an ti ipapanaw iti kastoy a kasasaad tapno awan problemak kadagiti manongko. Nagbalinak met a maysa kadagiti makinkua iti grupo, ket diak kayat ti makisubang kadakuada.

Idi nagsikogak manen, imbagak ken ni Rafa, a mangtartarawidwid iti grupo kalpasan ti ipapatay ni manongmi a Pepe, a kayatko nga ad-adu ti tiempok kadagiti annakko isu a saanakton nga agtrabaho. Imbagana nga aramidek ti pagarupko a kasayaatan. Awan kadagiti manongko ti nangbusor iti panagadalko iti Biblia isu nga agyamanak unay.

Baro a Biag iti Panagserbi ken Jehova

Idi 1993, kalpasan ti sangapulo a tawen a pannakikaduak iti grupo, insardengkon ti karerak a panagsala ket indedikarko ti bagik a naan-anay ken ni Jehova. Nagbalinak nga agibumbunannag iti Pagarian ti Dios, ket kalpasan a pimmanaw ni Roberto iti grupo, nabautisarankami idi 1994. (Mateo 24:14) Agpadpada da Freddy ken ti sabali pay a manong ni Roberto a ni Julio ket nagbalin a Saksi kas iti inaramid met ni Manuel Pérez, a sabali pay a miembro dayta a grupo. Agingga ita, simamatalek nga agserserbida amin ken Jehova.

Di maawatan ti adu a tattao no apay nga immikkatak iti negosio a panaglinglingay, yantangay magusgustuak unay idi ti trabahok. Kas iti agdinamag a producer iti telebision iti pagilianmi, impagarup ti dadduma a basta lumaslasatak laeng iti temporario a paset ti biagko. “Kas iti dadduma nga artista, agbalbaliwto met laeng ket agsublinto manen iti grupo,” impakpakaunana. Ngem saan a pulos a napasamak dayta. Determinadoak nga agserbi a naan-anay ken Jehova.

Tallo itan ti annakmi a da Katty, Roberto, ken Obed. Ikagkagumaanmi nga isuro kadakuada a dagiti kapatgan iti biag ket dagiti naespirituan saan a dagiti material. Gapu iti kapadasanmi, kabaelanmi ida a pakdaaran iti makaiwawa nga impluensia ti lubong ken mangted kadakuada iti nainsiriban a panangiwanwan iti biag. Makatulong unay ti linawas a sangapamiliaan a panagadalmi iti Biblia, ta tultulongannakami nga agtalinaed a nagkaykaysa iti lubong a sadiay dumegdegdeg ti panagsisina dagiti pamilia.

Inkagumaanmi nga isuro kadagiti annakmi a matmatanda ni Jehova kas maysa a pudno a persona a mabalinda a pagtalkan. (Proverbio 3:5, 6; Hebreo 11:27) Insuromi met kadakuada ti kinapateg ti itatabuno ken pannakipaset kadagiti Nakristianuan a gimong. Ti pannakakitami kadagiti annakmi a dumakdakkel iti dalan ti kinapudno ti Biblia ket awan kaaspingna a sagut. Iti napalabas a dua a tawen, nagserbiak kas auxiliary pioneer, maysa a termino nga us-usaren dagiti Saksi ni Jehova agpaay kadagidiay mangbusbusbos iti 50 nga oras iti kada bulan wenno nasursurok pay tapno iranudda ti naibasar iti Biblia a pammatida iti sabsabali. Adu metten a tawen nga agserserbi ni lakayko kas maysa a panglakayen iti kongregasion Kristiano.

Ibilangko latta ti merengue a napintas a kita ti sala. Ngem nakalkaldaang ta kaaduan kadagiti nalatak ita a merengue ket naiduma unayen iti napalabas. Kaaduanna, nasayaat idi. Ngem ita, masapul nga agbalintayo a napili unay tapno makasaraktayo iti nasayaat a musika a merengue.

 Ti Kinatan-ok ti Panagserbi ken Jehova

Adu ti ituktukon ti lubong, ngem masapul nga usigen ti maysa ti amin a nainaig iti dayta. Agpayso daytoy no maipapan iti industria ti musika, a no kitaen ti makinruar a pasetna, kasla nakapimpintas ken di makadangran. Ngem saan a kasta. Adu ti nainaig iti industria nga ita ket agdrogdroga ken makipaspaset iti imoralidad. Ti panagpabuya ti makagapu a makikaduaka kadagiti mangpampanunot laeng iti agdama a panagbiag a dida pampanunoten dagiti ibungana ken saanda a pulos a makonsiensia.​—1 Corinto 15:33.

Naamirismi a ti agserbi ken ni Jehova ti kapatgan a maaramidan ti siasinoman. Malagipko ti kinalidayko idi nagsubliak idiay otel kalpasan ti maysa kadagiti kadakkelan a pabuyami. Maamirisko itan a ti makagapu iti dayta ket saanmi idi a pempenken ti kangrunaan a kasapulanmi nga isu ti naespirituan.​—Mateo 5:3.

Ti ipangpangrunami itan iti biag ket ti panangparagsak iti Namarsua kadatayo, nangruna babaen ti panangasaba ken panangisuro iti naimbag a damag ti Pagarian. (Mateo 24:14; Aramid 20:35) Ti panangaramidmi iti daytoy ti mangparparagsak ken mangipapaay iti pannakapnek iti pamiliami. Talaga nga agyamankami ta pasetnakami ti ili ti Dios ken addaankami iti pudno a gagayyem​—dagiti kapammatianmi​—a padami nga addaan iti nakaskasdaaw a namnama nga agbiag nga agnanayon iti baro a lubong ti Dios.​—Marcos 10:29, 30; 2 Pedro 3:13; Apocalipsis 21:3, 4.

Bimmaknangkami iti lubong ti paglinglingayan. Ngem idi naam-ammomi ti Diosmi a ni Jehova, nakasarakkami iti naespirituan a kinabaknang a napatpateg nga amang ngem iti aniaman a material a sanikua. Nakaragragsakkami nga agserbi iti Dios nga addaan panggep a nangawis kadakami nga agtalekkami kenkuana! (Salmo 37:3) Kombinsidokami unay a nasarakanmi ti nasaysayaat ngem iti kinalatak ken material a kinabaknang, ket ikarkararagmi a sapay koma ta tulongannakami ni Jehova a sangapamiliaan a mangaramid iti pagayatanna iti agnanayon.

[Footnote]

[Ladawan iti panid 21]

Siak ken ti dadduma a miembro ti grupo idi rugrugi ti karerak

[Ladawan iti panid 21]

Panagpabuyami idiay New York City, idi agarup 1990

[Ladawan iti panid 23]

Iti sango ti Kingdom Hall

[Ladawan iti panid 23]

Bassit a retrato: Kabayatan ti sangapamiliaan a panagadalmi iti Biblia