Manipud Kadagiti Agbasbasa

Kinalukmeg Kayatkayo a komendaran iti serye a “Kinalukmeg​—Ania ti Solusion?” (Nobiembre 8, 2004) Limapulo a kilo ti naksay iti timbangko babaen ti panangiplanok a mangan iti ad-adda a makapasalun-at ken inaldaw a panagehersisiok. Nagangganaygayak sipud idi naksayan ti timbangko, isu a makapagpautak iti ministerio a saanak unay a mapaksuyan.

M. E., Estados Unidos

Agtawenak iti dandanin 50 isu nga ad-addan a maseknanak iti salun-atko, nupay diak madanagan idi iti sobra a kinalukmegko. Determinadoak itan nga agpakuttong isu a dagus a rinugiakon. Daytoy a serye ti nangipasigurado kaniak nga ay-aywanan ni Jehova ti tunggal maysa kadatayo.

H. S., Japan

Pagyamanan iti husto nga impormasionyo maipapan iti sobra a kinalukmeg. Ita, rinugiakon ti programak a panagehersisio ken nadumaduma nga ugali iti pannangan. Nasurok a 30 a tawenen nga agbasbasaak iti magasinyo ket nagadun ti naitulongna iti biagko!

N. J., Estados Unidos

Sangagasut ken innem a pulo a kilo ti timbangko. Sigun iti tsart iti panid 5, rumbeng a 76 a kilo koma ti timbangko. Nagadu ti aramidek tapno mapukawko amin daytoy a timbang. Ammok a makatulong daytoy nga artikulo ken dagiti linaonna a kapadasan.

W. O., Estados Unidos

Maragsakanak a makaammo a maseknan ni Jehova ken ti organisasionna maipapan iti salun-attayo. Ngem ti maysa a pakadanagak ket ti tsart iti panid 5. Us-usaren ti dadduma a doktor ti tsart a mangipakita iti kalkalainganna agingga iti kadagsenan a timbang ti pammagi ti tao. Dakkel ti pammagik, isu a naiduma ti timbangko iti daydiay bassit ti pammagina a kataytayagko.

C. S., Estados Unidos

Kastoy ti sungbat ti “Agriingkayo!”: Pagyamanan iti daytoy nga impormasion. Ti mabasa iti panid 5 ket maysa la a kita ti tsart a makatulong iti maysa a tao tapno maikeddengna ti maiparbeng a timbangna. Saanmi a panggep nga ipasimudaag a saan a nainkalintegan ti dadduma a tsart.

Impasimudaag ti serye ti agdama a kapanunotan a ti nakuttong ket naballigi, idinto ta saan a naballigi ti sobra ti kinalukmegna. Ti aya sobra a kinalukmegko kaipapananna a sadutak, awan pakaparegtaak, ken awan serserbik?

I. J., Alemania

Para kaniak, saanyo a nadakamat ti sikolohikal nga aspeto daytoy a parikut. Umanamongak a rumbeng a liklikantayo ti kinalukmeg, ngem kasano ngay no saanna a maliklikan? Kasano ngay ti panagriknana?

Y. Z., Russia

Dadduma nga agbasbasa mabalin a pagarupenda a dagiti laeng nakuttong a tattao ti ay-ayaten ni Jehova wenno dagiti addaan iti “normal” a timbang ti maipalubos nga agbalin a Saksi ni Jehova.

R. B., Alemania

Kastoy ti sungbat ti “Agriingkayo!”: Ti nadakamat a tallo nga agbasbasa ti nangpataud kadagiti punto a saan a nasungbatan iti seryemi. Bigbigenmi nga adu ti makagapu iti sobra a kinalukmeg ti maysa a tao a mabalin a saan a nainaig iti sobra a pannangan. Kas pagarigan, dadduma nga agas ket mabalin a mangpalukmeg iti maysa a tao. Mabalin met a narigrigat nga agpakuttong ti dadduma gapu kadagiti natawidda a nainaig iti gene-da. Aniaman ti makagapu, saanmi nga impasimudaag a dagiti laeng lallaki ken babbai a kalkalainganna ti timbangda ti awaten ti Dios. Sapay koma ta ti seryemi ti nangparegta ken nangipaay kadagiti praktikal a singasing agpaay iti siasinoman a mayat a maaddaan iti programa a makapasalun-at a pannangan ken panagehersisio​—tapno maksayan ti timbangna. Dagita a programa ket mangsalbar iti biag. Ladingitenmi ti aniaman a di umiso a pannakaawat maipapan iti daytoy a banag.