Tapioca Crepe​—Naimas a Taraon iti Brazil

Babaen iti mannurat ti Agriingkayo! idiay Brazil

DITOY Brazil, ti tapioca mabalin a tukoyenna ti sumagmamano ken nadumaduma a produkto a nagtaud iti kamoteng kahoy. Maysa kadagitoy ti simple a naingpis a bibingka a kamoteng kahoy. Naingpis dayta a kita ti kankanen ket masansan a maawagan iti tapioca crepe. Naaramid dayta iti pino nga arina a pagaammo kas polvilho doce wenno goma, a naaramid manipud iti bagas ti kamoteng kahoy.

Kalpasan a magadgad ti bagas ti kamoteng kahoy, adda mapespes a puraw a tubbogna. Mailasin dayta tapno agarinsaed. Maibelleng ti tubbogna, sa maibilag ti arinsaed nga agbalinto nga arina.

Ti tapioca ti kangrunaan a taraon dagiti Indian. Idi agangay, natakuatan dagiti immay nagindeg a Portugues a ti tapioca ket nasayaat a kasandi ti tinapay. Ngem kadagiti laeng kallabes a tawen a nagustuan dagiti managpartuat a kosinero ditoy Brazil ti tapioca. Inkeddengda a pagbalinen a nalatak dayta kadagiti putahe nga ilakoda kadagiti restawranda.

Gapu ta kayatda a maay-ayo dagiti nakamikmikki a tattao, napanunot dagiti kosinero ti agaramid kadagiti baro a kita ti crepe. Impakatda ti nagpaiduma a kinalaingda tapno mapagbalinda a naisangsangayan dagiti ordinario a crepe. Ita, nakalatlataken dagiti tapioca crepe isu a makaay-ayo ti adu a putahe dagiti taga-Brazil. Limmatak ti adu nga agdinamag a restawran gapu kadagiti lutoda a crepe.

Apay a dimo padasen ti agluto kadagitoy a crepe? Maparagsakda ti pannanganyo a sangapamiliaan ken aggagayyem.

[Kahon/Ladawan iti panid 24]

Panagaramid iti Tapioca Crepe

Ramen agpaay iti walo a crepe:

3 a tasa a polvilho doce, 1 1⁄2 a tasa a danum, ken bassit nga asin.

Pamay-an: Iti kalkalainganna a malukong, warsiam iti danum ti polvilho doce ken asinam, sa gamasem. In-inut a nayonam iti danum bayat a gamgamasem sa bulaluem. Kalpasanna, dippitem ti nagamasmo iti yakayakan. Mabalinmon ti agluto iti crepe.

Papudotem ti 20 a sentimetro ti diametrona a pariok a nonstick iti kalkalainganna ti kabarana a paglutuan. Mangikabilka iti kakawalo ti ginamasmo iti pariok, sa pinasem a naimbag babaen iti bukot ti kutsarita. Lutuem iti dua ingganat’ uppat a minuto, wenno agingga a nagdedekketen ti ginamasmo ken mabukel kas patad a keyk, a nalaka a maadaw manipud iti pariok. Ibalikidmo babaen iti plastik nga aklo, sa lutuem ti bangirna iti maysa a minuto. Kasta met la ti aramidem iti nabati a ginamasmo. Pagtutuonem dagiti naluto a crepe.

Pumintas ti langa dagiti tapioca crepe no nayonam iti nadumaduma a palaman. Iti pamigat, padasem a palamanan iti mantekilia bayat a napudot pay, sa nayonam iti dua a kutsara a kaig-igad a niog. Wenno mabalinmo a parabawan dagiti crepe iti gatas a kondensada, nayonam iti niog, kulpiem dagiti crepe ken idasarmo.

[Ladawan iti panid 24]

Bagas ti kamoteng kahoy

[Ladawan iti panid 24]

Kankanen a tapioca a napalamanan iti niog ken gatas a kondensada