Ti Panagtignay Buyogen ti Nadalus a Konsiensia Maidayawna ti Dios

BABAEN ITI MANNURAT TI AGRIINGKAYO! IDIAY UKRAINE

ITI panagawidda kalpasan ti Nakristianuan a gimong, ti pamilia Chibisov, a Saksi ni Jehova idiay Ukraine, nakasarakda iti pitaka nga addaan kadagiti agkakapateg a banag, a pakairamanan ti lisensia iti panagmaneho, credit card, ken agarup $500 no koma kuarta iti lugarda. Iti daytoy lima ti miembrona a pamilia, ti la asawa a lalaki ti mangmangged. Makategged iti agarup $70 iti kada bulan. Isu a mabalin a dakkel ti maitulong daytoy a kuarta kadakuada. Ania ti inaramidda?

Insalaysay ti ina: “Dagus a nagsaritaan ti babbalasangmi no kasanomi nga isubli ti pitaka iti makinkua, a maysa a babai, sigun iti lisensia iti panagmaneho. Naragsakankami ken ni lakayko ta impakita dagiti annakmi a naimbag ti pannakasanay ti konsiensiada. Kabigatanna, tineleponuak ti babai a nakapukaw iti pitaka. Uray la a nakasangit daytoy a babai nga agnagan iti Olha gapu iti rag-ona. Immay sana imbaga kadakami nga addaanda ken ni lakayna iti sumagmamano a babassit a tiendaan iti ilimi. Ti kuarta iti pitaka ti binulan a sueldo dagiti empleadoda. Kanayonanna, maysa a nakapatpateg a pinansial a dokumento ti adda iti dayta a pitaka.

“Dinamag kadakami ni Olha no nakasarakanmi iti pitaka. Imbagami ti lugar sa inlawlawagmi nga addakami sadiay agsipud ta agaw-awidkamin manipud iti Nakristianuan a gimongmi. Idi intukonmi ti sumagmamano a literatura ti Biblia, siraraem nga inawatna.

“Sumagmamano a lawas kalpasanna, imbaga ti maysa a kakongregasionanmi a bayat nga adda idi iti kalsada a mangituktukon iti literatura a naibasar iti Biblia, inlawlawag ti maysa a babai a saan idi a pulos a dumdumngeg kadagiti Saksi ni Jehova. Ngem ita, saan la a naayatan a dimngeg no di ket nangala payen iti literatura. Ngamin, kinunana nga insubli dagiti Saksi ti pitaka ti anakna.”

[Ladawan iti panid 31]

Ti pamilia Chibisov