Dagiti Agtutubo a Sireregta a Mangaskasaba

Agpadpada nga idiay eskuelaan ken iti Nakristianuan a ministerio, adu nga agtutubo kadagiti Saksi ni Jehova ti situtured a mangikaskasaba iti pammatida ket nakabalballigida iti dayta. Usigem dagiti sumaganad a pagarigan. *

“Idi addaak iti maikatlo a grado,” kinuna ni Kristina, “inikkannakami ti maestrami iti saggaysa a diary a pagisuratanmi iti inaldaw nga ar-aramidenmi. Imbaga ti maestrami a basaennanto dagiti diary-mi ket addanto met isuratna iti dayta inton isublina kadakami. Inkeddengko nga isurat iti diary ti maipapan iti mapasungad a pasetko iti Teokratiko nga Eskuelaan ti Panagministro. Naragsakan ti maestrak isu nga inawisko nga umay idiay Kingdom Hall tapno denggenna ti pasetko. Saan la nga is-isuna ti immay no di ket immay met ti maestrak idi addaak iti umuna a grado. Idi madaman ti klasemi idiay eskuelaan, imbaga ti maestrak kadagiti amin a kaklasek a nagustuanna ti panagpasetko. Naragsakanak unay. Ngem saan la a dayta. Agarup makatawen kalpasanna, insalaysayko ti kapadasak iti asamblea sirkito dagiti Saksi ni Jehova, ket timmabuno met ti maestrak. Idi agangay, kaduak ti gayyemko a payunir a nangsarungkar iti dati a maestrak ket rinegaluak iti libro a Pannakaammo a Mangiturong iti Biag nga Agnanayon. Tinabunuanna pay ti maysa kadagiti kombension distritomi!”

Idi innem ti tawen ni Sydnee, silalaing ken situtured nga inkasabana kadagiti kaklasena dagiti kinapudno iti Sao ti Dios agraman ti kasasaad dagiti natay ken ti saad ni Jesus no idilig iti Dios. “Nakaregregta ken nakaturtured a mangasaba,” kinuna ni nanangna. Idi maturturposen ti umuna a tawenna iti eskuelaan, naladingitan ni Sydnee. “Madanaganak maipapan kadagiti kaklasek,” kinunana. “Kasano a maammuanda ti maipapan ken ni Jehova?” Adda napanunot ni Sydnee. Idi maudi nga aldaw ti panageskuela, adda nabalkut nga inregalona iti tunggal kaklasena. Dayta ti publikasion a Ti Librok Dagiti Estoria ti Biblia. Nagibunong ni Sydnee iti 26 a kopia sana imbaga kadakuada amin nga inton makaawidda, lukatanda ti regaloda a kadua ti dadakkelda. Imbilang ni Sydnee dagiti kaklasena kas personal a teritoriana a pangasabaan. Tineleponuanna pay ketdi ida tapno maammuanna no  nagustuanda ti libro. Imbaga ti maysa a kaklasena a babai a rinabii a basbasaenna dayta a libro a kadua ni nanangna.

Idi agtawen ni Ellen iti 15, adda sumagmamano a ruar ti Agriingkayo! nga intedna iti maestrona iti history. “Nagustuanna ida,” kinuna ni Ellen, “ket dua a tawenen nga agbasbasa iti Agriingkayo!” Kinuna pay ni Ellen: “Nabiit pay nga inikkak iti publikasion a Ti Librok Dagiti Estoria ti Biblia, ket imbagana kaniak a magusgustuan unay dayta ti dua a babbalasitangna. Isu nga inikkak iti libro nga Agsursuroka iti Naindaklan a Mannursuro. Idi agangay, inikkannak iti kard. Kastoy ti mabasa iti dayta: ‘Pagyamanan unay kadagiti libro. Magusgustuanmi nga agaama. Makaparagsak a makita ti maysa nga agtutubo a manakem ken napasnek a kas kenka. Awan ti kaasping ti naisangsangayan a pammatim. Ad-adun ti naisurom kaniak ngem iti naisurok kenka!’ Dayta ti nangisuro kaniak no kasano ti panangapresiar unay dagiti tattao iti kinapudno ti Biblia no ikagumaantayo nga ipaay dayta kadakuada.”

Innem ti tawen ni Daniel idi damo nga adda inyadalanna iti Biblia. “Iyad-adalannak ni nanangko iti Biblia,” kinunana, “ngem kayatko nga adda met iyadalak.” Pinili ni Daniel ni Mrs. Ratcliff​—maysa a baket a napaimaanna iti literatura iti Biblia. “Kayatko nga ipakita kadakayo ti paboritok a libro a Ti Librok Dagiti Estoria ti Biblia,” kinunana kenkuana sana innayon: “Mabalin kadi nga umayak kada lawas ken ibasak dayta kadakayo?” Immannugot ni Mrs. Ratcliff iti intukon ni Daniel. “Rinugianmi ken ni Mrs. Ratcliff ti nagadal iti kamalman dayta nga aldaw,” kinuna ni Laura, ti nanang ni Daniel. “Nagsinnublat da Daniel ken Mrs. Ratcliff a nangbasa kadagiti parapo. Kalpasanna, impabasa ni Daniel kenkuana dagiti napilina a teksto a nadakamat iti ngudo ti estoria. Kinaduak ni Daniel, ngem kasla kayat ni Mrs. Ratcliff a ni Daniel laeng ti kaduana nga agadal!” Idi agangay, rinugian ni Daniel ken ni Mrs. Ratcliff nga inadal ti libro a Mabalinyo ti Agbiag nga Agnanayon iti Paraiso a Daga. Iti dayta a tiempo, ti ading ni Daniel a ni Natalie ket ammonan ti agbasa, isu a nakipagadal met. Nagadu ti dinamag ni Mrs. Ratcliff​—narikut ti dadduma kadagitoy. Ngem inusar da Daniel ken Natalie ti bokleta a Dagiti Topiko ti Biblia a Pagsasaritaan ken ti konkordansia iti likudan ti Biblia tapno maammuanda dagiti Nainkasuratan a sungbat. Ni Mrs. Ratcliff, a namulagatanna ti Kinakatolikona, ket naragsakan iti maad-adalna. “Idi pay la koma a nagadalak iti Biblia!” kinunana idi agngudo ti maysa a panagadal. Nakalkaldaang ta nabiit pay a natay ni Mrs. Ratcliff iti edad a 91. Ngem gapu iti panagadalna iti Biblia, naammuanna dagiti napateg a kinapudno, agraman ti namnama a panagungar ken paraiso a daga nga isursuro ti Biblia. Agtawen itan ni Daniel iti sangapulo ket adda dua nga iyad-adalannan iti Biblia. Ni Natalie nga agtawen itan iti walo ket mangyad-adal iti Biblia iti ubing a babai a kataebna.

Dagiti agtutubo a kas kada Kristina, Sydnee, Ellen, Daniel, ken Natalie parparagsakenda dagiti Kristiano a nagannak kadakuada. Napatpateg pay, parparagsakenda ti puso ni Jehova, ket dinanto malipatan ti ayat dagita nga ubbing agpaay iti naganna.​—Proverbio 27:11; Hebreo 6:10.

[Footnote]

[Dagiti Ladawan iti panid 18]

Ni Kristina (iti ngato) ken ni Sydnee

[Ladawan iti panid 19]

Da Daniel ken Natalie

[Ladawan iti panid 19]

Ni Ellen