Manipud Kadagiti Agbasbasa

Agimtuod Dagiti Agtutubo Agyamanak iti nagsayaat nga artikulo nga “Agimtuod Dagiti Agtutubo . . . Kasano a Madaerak ti Pannakapaay?” (Nobiembre 22, 2004) Kas ken Ana, impagarupko no napaladingitko ti Dios isu a dinak mapakawanen. Ngem kas iti inlawlawag ti artikulo, agpapan pay kadagiti pagkapuyan ni David, pinakawan ni Jehova ken nagtalinaed a nasinged kenkuana. Anian a makaparegta a maammuan nga uray no matuangtayo, tulongannatayo ni Jehova a bumangon manen!

G. C., Italia

Ti Galacia 6:4 ti kangrunaan a nakatulong kaniak. Naamirisko a kanayon idi nga idildiligko ti bagik kadagiti kalaingan a kaklasek. Impaawat kaniak daytoy nga artikulo a dangdangrak gayam ti bagik.

C. C., Francia

Panangatake Dagiti Terorista Talaga a natukayak iti artikulo a “Panangdaer iti Pannakadidigra Gapu iti Panangatake Dagiti Terorista.” (Nobiembre 8, 2004) Makaparegta dagiti naisalaysay a kapadasan. Naammuak a mapabilegtayo gayam no lagipentayo dagiti teksto iti Biblia ken no addaantayo iti sigurado a namnama a panagbiag iti Paraiso. Napateg met a no mabalin, agikabesatayo iti adu a teksto.

I. A., Japan

Talaga a nasdaawak a nupay nadunor dagiti kakabsat, nalagipda ti Biblia ken ti ipampanamnama kadatayo ni Jehova. Kayatko ti agpasiarto idiay Espania tapno maibagak kadagiti kakabsat no kasano a naparegtaak.

L. G., Estados Unidos

Nagannak Pagyamanan iti imbalakad ti serye nga “Ania ti Naimbag nga Ama?” (Agosto 22, 2004) Ammomi itan no kasano nga isuro dagiti naespirituan a banag iti maladagami tapno mayukuok dagiti prinsipio ni Jehova kenkuana sipud iti kinamaladagana. Kasla naisurat dagita nga artikulo nga agpaay a mismo kadakami. Kanayon met a maipapaayda dagiti naintiempuan ken naespirituan a kasapulanmi.

K. ken M. P., Poland

Panagsikog Dagiti Tin-edyer Pagyamanan iti serye a “Panagsikog Dagiti Tin-edyer​—Sangalubongan a Trahedia.” (Oktubre 8, 2004) Sakbay a naungpotko a binasa, nakasangitak. Siuumiso a dineskribir ti artikulo ti mapaspasaran ni manangko. Agyamanak ta impaay ni Jehova daytoy naintiempuan a serye tapno ad-adda a maawatak ti riknana.

M. S., Indonesia

Marikna ti agbasbasa ti kinadungngo ken pannakipagrikna dagiti panglakayen iti ladawan iti panid 10. Talaga nga itan-ok daytoy a ladawan ti kasta unay a panagayat ken panangngaasi ni Jehova! Pagyamanan iti panangisuroyo kadakami a tuladenmi ti Dios iti panangtratomi kadagidiay nakaaramid iti nadagsen a basol ngem agbabbabawidan.

T. K., Ukraine

Panangasaba Idiay Eskuelaan Talaga a nagustuak ti artikulo a “Dagiti Agtutubo a Nangikalintegan iti Pammatida.” (Setiembre 8, 2004) Dagiti kapadasan da Holly, Jessica, ken Melissa ti nakatulong kaniak a mangiranud iti pammatik idiay eskuelaan, kadagiti man kaeskuelaak wenno kadagiti mannursurok. Idi damo, mabainak a mangasaba. Ngem ita, desididoakon a makisarita kadagiti maam-ammok idiay eskuelaan.

G. O., Nigeria

Vitiligo Ti artikulo a nabiit pay a nangpikapik kaniak ket “Ania ti Vitiligo?” (Setiembre 22, 2004) Addaanakon iti vitiligo sipud idi agtawenak iti siam. Agtawenak itan iti nasurok a 30. Idi diak naimbagan kalpasan ti adu a panagpaagas, inakseptarkon a masapul nga urayek laengen a maagasanak idiay baro a lubong ti Dios. Nupay kasta, naragsak ti biagko! Makapnek ken naragsak latta ti panagbiagko uray no adda daytoy a sakit ti kudilko!

M. S., Mozambique