Derosas a Dan-aw?

Babaen iti mannurat ti Agriingkayo! idiay Senegal

AGPAYSO kadi nga adda derosas a dan-aw? Ti Lake Retba ket napanaganan iti Pink Lake. Gapu ta 30 a kilometro laeng dayta manipud iti pagnanaedanmi a Dakar, Senegal, iti Makinlaud nga Africa, inkeddengmi a pasiaren tapno makitami no talaga a derosas dayta. Apagdanonmi, nakitami nga aggilapgilap ti danum gapu iti init. Kas iti imbagada kadakami, makaay-ayo ti derosas a kolorna. Inlawlawag ti giyami a ti lawag ti init adda epektona kadagiti nagbabassit nga organismo iti danum tapno mapataud ti naisangsangayan a kolorna. Nupay kasta, ad-adu ti mabalin a makita ditoy ngem iti kolor laeng ti dan-aw.

Asin ti tukok ti ababaw a danum ti dan-aw. Nakaap-apgad ti danum ken tumpaw ti aniaman a banag isu a nadlawmi a ginundawayan ti dadduma a sangaili ti awan rigrigatna a tumpaw iti dayta.

Nabatad a ti Pink Lake ket pamastrekan ti ginasut a tattao (1). Iti igidna, ikarkarga dagiti trabahador ti sinako nga asin kadagiti trak. Pinaliiwmi biit dagiti umili nga agal-ala iti asin iti dan-aw. Nakitami ti lallaki nga agtaktakder iti pagatbarukong a paset ti dan-aw. Bukbukkualenda ti asin babaen kadagiti atiddog a piko. Palaenda dayta tapno maikarga kadagiti basket sada ilugan kadagiti bilog. Imbaga kadakami ti maysa kadagiti trabahador a tallo nga oras ti kasapulan tapno makaalada iti sangatonelada nga asin. Napunno dagiti bilog ta uray la a dandanin saan a tumpaw dagitoy (2). No sumanglad dagiti bilog, sumublat nga agtrabaho dagiti babbai (3). Susuonenda ti asin a naikarga kadagiti balde. Kas man la naannayas ti panagandarna a makina ti sangsangkamaysa a panagtrabahoda.

Ti panagpasiarmi ket naisangsangayan a kapadasan. Daytoy a derosas a dan-aw ket maysa manen kadagiti adu a nakaskasdaaw a buya a mamagbalin iti dagatayo a naisangsangayan a sagut ni Jehova.​—Salmo 115:16.

[Picture Credit Line iti panid 18]

Rinetrato ni Jacques CLEMENT, Clichy, FRANCIA iti http://community.webshots.com/user/pfjc