Nasayaat a Panangasaba Idiay Eskuelaan

Babaen iti mannurat ti Agriingkayo! idiay Mexico

IDI nangrugi ti agtawen iti 17 a ni Daniel iti baro a tawen ti panageskuelana, inkeddengna nga ipakaammo kadagiti baro a kaklasena nga isu ket maysa kadagiti Saksi ni Jehova. Timmaud ti maysa a gundaway idi a ti maestrona iti Ingles kiniddawna iti klase a makiumanda iti ganggannaet nga Ingles ti nakayanakanna a pagsasao. Ti proyekto ket mapanda iti pagayuyangan dagiti turista idiay Mexico City, makiumanda, ken itugotdanto iti klaseda ti inrekordda.

Inkeddeng ni Daniel a kaumanna ti maysa a misionero nga Ingles ti pagsasaona ken agtartrabaho iti hedkuarter dagiti Saksi ni Jehova iti Mexico. In-video-na met iti Ingles ti apagbiit a panagpasiarna kadagiti pasilidad. Kasta met a nagaramid iti eksibit ti nadumaduma a broshur iti katutubo a pagsasao a naipablaak iti Mexico agraman Ti Pagwanawanan ken Agriingkayo! iti nadumaduma a pagsasao. Kalpasanna, kiniddaw ni Daniel iti maestrona iti Ingles nga ipabuyana ti video ken eksibit kadagiti kaklasena.

Nasdaaw dagiti kaklase ken maestrona iti ar-aramiden dagiti Saksi ni Jehova iti Mexico. Ti panagregget dagiti Saksi a mangdanon kadagiti katutubo nga umili iti Mexico ti nangnangruna a nagsiddaawan dagiti dimngeg ken Daniel.

Kalpasan ti 25 a minuto a panagpabuyana, a nakaawatanna iti kangatuan a grado, nangitukon ni Daniel kadagiti kopia Ti Pagwanawanan ken Agriingkayo! iti amin, agraman ti libro a Dagiti Saludsod nga Iyimtuod ti Agtutubo​—Dagiti Sungbat nga Epektibo. Adu ti immawat iti literatura ket daytoy ti nangiruangan iti ad-adu pay a saritaan maipapan iti Biblia. Kinuna ni Daniel: “Agyamanak ken ni Jehova ta naidayawko ti naganna babaen ti simple a proyektok idiay eskuelaan.”