Ammoyo Kadi?

(Masarakan dagiti sungbat daytoy a pannubok kadagiti naipaay a teksto ti Biblia, ket nayimprenta iti panid 22 ti kompleto a listaan dagiti sungbat. Para iti kanayonan nga impormasion, kitaenyo ti publikasion nga “Insight on the Scriptures,” nga impablaak dagiti Saksi ni Jehova.)

1. Ania a paset ti Egipto ti imbaga ni Faraon a pagnaedan dagiti Israelita, ket apay a maitutop unay dayta? (Genesis 47:3-6)

2. Ania a rikna ti mangpataud iti rinnupir? (Proverbio 10:12)

3. Tapno mayilustrar ni Jehova ti kinapasnek ken kinamapagtalkan ti karina maipapan iti daga ti Israel, inladawanna ti bagina a mangar-aramid iti ania? (Ezequiel 36:7)

4. Ania nga ilustrasion ti inusar ni Jesus a mangiladawan iti tarigagayna a mangummong kadagiti nasukir nga umili ti Jerusalem? (Mateo 23:37)

5. Siasino nga anak da Adan ken Eva ti kapuonan ni Jesus? (Lucas 3:38)

6. Siasino dagiti makin-utek iti kumplot a mangpapatay ken Jesus? (Mateo 26:3)

7. Sigun ken apostol Juan, ania ti mayawis iti amin a “mawaw” iti kinalinteg? (Apocalipsis 22:17)

8. No adda agkurang iti sirib, ania ti rumbeng nga aramidenna, ken apay? (Santiago 1:5)

9. Ania ti inaramid ni Jehova tapno maparsuana ti asawa ni Adan? (Genesis 2:22)

10. Aniada a grupo iti sangatauan ti nagtaudan ti kakadua ni Jesus nga ar-ari ken papadi nga agturay iti intero a daga? (Apocalipsis 5:9)

11. Apay a saan a pinalubosan ni Jehova a sumrek ni Moises iti Naikari a Daga? (Numeros 20:10-12)

12. Ania ti inaramid ni David tapno makalibas kadagiti Filisteo iti Gat? (1 Samuel 21:12-14)

13. Ania dagiti di makaay-ayo a banag a rumbeng a liklikan ti maysa a lalaki tapno maikari kas Kristiano a manangaywan? (Tito 1:7)

14. Kasano a nakatulong ni Dario iti Medo iti pannakaibangon manen ti templo ni Jehova idiay Jerusalem? (Esdras 6:5-8)

15. Kasano ken kaano a rumbeng nga isuro dagiti managbuteng iti Dios a nagannak ti annakda kadagiti bilin ni Jehova? (Deuteronomio 6:6, 7)

16. Kasano a nairaman ni Simon a taga-Cirene idi napapatay ni Jesus? (Mateo 27:32)

17. Nagadaw ni Jesus manipud iti Isaias idi kinondenarna dagiti eskriba ken Fariseo iti ania a kita ti panaginsisingpet? (Mateo 15:8)

18. Ania ti kaunaan a milagro nga inaramid ni Jesus, ket nangaramidanna iti dayta? (Juan 2:1-11)

 Dagiti Sungbat ti Pannubok

1. Idiay Gosen, agsipud ta dayta ti kadam-egan a pagpastoran ti Egipto. Ti pamilia ni Jacob ket agtartaraken kadagiti animal

2. Gura

3. Mangitagtag-ay iti imana iti maysa a sapata

4. Maysa nga upa a mangur-urnong a sangsangkamaysa kadagiti piekna iti sirok dagiti payakna

5. Set

6. Panguluen a papadi ken lallakay dagiti Israelita

7. Umayda ken ‘awatenda ti danum ti biag nga awan bayadna’

8. “Agtultuloy koma nga agdawat iti Dios, ta isu mangted a sipaparabur kadagiti isuamin ken awanan panangumsi”

9. Kalpasan ti nairut a panangpaturogna kenkuana, innalana ti maysa kadagiti paragpag ni Adan sa pinarsuana kas maysa a babai

10. Manipud iti “tunggal tribu ken pagsasao ken ili ken nasion”

11. Dina sinantipikar ni Jehova iti imatang dagiti annak ti Israel mainaig iti namilagruan a probision a danum iti let-ang

12. Inlimlimona ti kinasimbengna, isu a pinapanaw ti ari ti Gat gapu ta imbilangna ni David kas di makadangran a mauyong

13. Masapul a siwayawaya iti pammabasol kas mayordomo ti Dios, saan a manangipapilit, saan a nalaka nga agpungtot, saan a mammartek a mannakiapa, saan a manangkabil, saan a naagum iti nakusit a gunggona

14. Imbilinna a ti magastos ket maisingir iti naarian a paggamengan sa impaisublina dagiti balitok ken pirak a basehas nga innala ken impan ni Nabucodonosor idiay Babilonia

15. Rumbeng a nasiput dagiti nagannak iti amin a gundaway​—impormal man a kanito wenno pormal a panagadal​—​tapno mayukuokda ti kinapudno ti Sao ti Dios iti puso ti annakda

16. Pinilitda nga agserbi tapno awitenna ti pagtutuokan a kayo ni Jesus

17. Dinayawda ti Dios “babaen kadagiti bibigda,” ngem ti pusoda ket “adayo” kenkuana

18. Pinagbalinna nga arak ti danum iti maysa a kasaran idiay Cana