Kasapulan Dagiti Agtutubo ti Tiempo a Makikomunikar Kadagiti Nataengan

TUNGGAL nadungngo nga ama wenno ina ammona a dumakkel a sisasalun-at dagiti ubbing no nadungngo ti pannakaasikasoda ken nawayada nga agpasaklot ken tatang wenno nanangda. Ngem inton agtutuboda, ad-adda a didan kayat nga asikasuen ida ti dadakkelda, kinuna ni Dra. Barbara Staggers, direktor ti panangagas kadagiti agtutubo idiay Children’s Hospital and Research Center sadi Oakland, California, E.U.A. Ngem daytoy ti panawen iti biagda a kasapulanda unay ti panangasikaso ti dadakkelda. Apay?

No agtutubon ti annak, manmanon nga asikasuen ida ti dadakkelda, isu a maysa daytoy kadagiti kakaruan a peggad a sarsarangten dagiti agtutubo, sigun ken ni Staggers. Kastoy ti imbagana iti periodiko a Toronto Star: “Ti kinaagtutubo ket panawen a masursuro dagiti annak no siasinoda ken no kasanoda a makibagay iti aglawlawda. Nakarkaro ti peggad gapu ta gagangay nga agannayasda met nga agaramid iti makadangran ken di makaay-ayo ken agpaimpluensia iti kakaduada.” Ti kinaagtutubo ket buklen ti nadumaduma a paset iti panagbiag ket saan a ti tawenda ti isyu ditoy. Imbes ketdi, kas iti imbaga ni Staggers, “dayta ket maipapan iti pamay-an ti panagtignay [dagiti agtutubo] ken pananganagda iti impormasion ken panangpadasda iti dayta.” Ti nasapa a paset ti kinaagtutubo ket panawen a maseknanda unay iti bagida imbes nga iti sabsabali, masikoranda unay kadagiti panagbalbaliw iti bagida ken agtignayda a sidadarasudos. Ti makintengnga a paset ti kinaagtutubo ti ad-adda a maipapan iti panangpadasda kadagiti baro a banag tapno makitada ti epekto dagitoy kadakuada, idinto ta ti maudi a paset ti kinaagtutuboda ket inton agdesisiondan a bukbukodda.

Wen, mabalin a makapagagar ken makaparagsak dagiti tawen iti kinaagtutubo, ngem makariribuk met​—agpadpada kadagiti nagannak ken agtutubo. Imbaga ni Staggers, a nasurok a 20 a tawenen a mangag-agas kadagiti agtutubo, a kaaduan kadagitoy kasapulanda ti tiempo a makikomunikar kadagiti nataengan a mangisakit kadakuada. Kasano a maaramid daytoy?

Regular a makikomunikarkayo! Nagannak, ipanamnamayo kadagiti annakyo a maseknankayo kadakuada babaen ti naimbag a panagimdengyo. Ipakitayo a maseknankayo babaen iti panangsaludsodyo kadagiti makatulong iti agtutubo nga annakyo nga agpanunot ken makaamiris kadagiti ibunga ti aniaman a di umiso a pangngeddengda. Komendaranyo ida kadagiti ibunga dagiti umiso a desisionda. Tulonganyo ida a mangammo no ania ti maitutop a kababalin.

No suroten ti nagannak ti pangkaaduan a pagarup a rumbeng a sursuruen dagiti annak a bukbukodda a tamingen dagiti parikutda, nalakada a maapektaran kadagiti makadangran nga impluensia dagiti awanan prinsipio ken mananggundaway a tattao. (Proverbio 13:20) Iti sabali a bangir, dagiti nagannak a mangyaplikar iti balakad ti Biblia maipaayandanto dagiti annakda iti kasayaatan a gundaway tapno agballigida iti kinaagtutuboda ken agbalinda a manakem a nataengan. No kasta, masapul a sursuruen dagiti nagannak a ‘sanayen ti ubing sigun iti dalan nga agpaay kenkuana.’​—Proverbio 22:6.

Adda praktikal a balakad ti libro a Ti Sekreto ti Kinaragsak iti Pamilia * maipapan iti epektibo a pannakikomunikar ken panangsanay kadagiti agtutubo nga annak. Mangipapaay met dayta iti praktikal a Nainkasuratan a balakad agpaay iti tunggal miembro ti pamilia.

[Footnote]