Manipud Kadagiti Agbasbasa

Kinapintas Agtawenak iti 11, ket talaga a nagustuak ti serye nga “Ania ti Kapatgan a Kita ti Kinapintas?” (Disiembre 22, 2004) No dadduma, maseknanak unay iti langak. Daytoy nga artikulo ti nakatulong kaniak a mangamiris a ti ugalik ti kitkitaen dagiti tattao.

A. L., Estados Unidos

Saanak a pulos a mapnek iti langak. Ngem sapay koma ta makaay-ayo ken Jehova ti ugalik ken maragsakan kaniak ken iti panagbiagko. Saan la a makapainteres unay no di ket makapabileg met dagita nga artikulo.

M. G., Alemania

Agimtuod Dagiti Agtutubo Pagyamanan iti panangipablaakyo iti “Agimtuod Dagiti Agtutubo . . . No Ngay Awan ti Riknana Kenka?” (Disiembre 22, 2004) Kas kadagiti nadakamat iti artikulo, nagayatak iti maysa a baro a padak a Kristiano ngem awan ti riknana kaniak. Kasla nagtupak ti langit kaniak. Babaen iti daytoy nga artikulo, espesipiko nga ikarkararagko ken Jehova a tulongannak nga agbalin nga okupado kadagiti naespirituan a banag. Kayatko a mailiwliwag ti saem a napagtengko gapu iti pannakapaay ti ayatko.

I. Y., Japan

Diak mayebkas ti nariknak kalpasan a nabasak ti artikulo. Dimteng iti umiso a tiempo, ket eksakto ti panangdeskribirna iti nariknak idi! Saan a nalaka nga akseptaren ti pannakapaay, ngem daytoy nga artikulo ti nakatulong kaniak a mangiliwliwag iti dayta.

M. P., Italia

Nupay narigat nga iyaplikar ti dadduma a punto, para kaniak daytoy nga artikulo ti nakatulong kaniak a mangabaruanan. Sapay koma ta dayta ti makatulong iti adu pay tapno maamirisda manen a napategda ken Jehova ken makapangabaruananda!

J. E., Estados Unidos

Daytoy nga artikulo ti nangpabileg kaniak a diak unay maupay. Nupay nasakit pay laeng ti nakemko gapu iti pannakapaay, daytoy nga artikulo ti nakatulong kaniak a mangiliwliwag iti riknak. Makaliwliwa a maammuan a maseknan ni Jehova iti tunggal maysa kadatayo.

M. L., Estados Unidos

Idi aldaw a naawatko ti ruar ti Agriingkayo!, naawatko met ti surat ti maysa a baro a kapammatiak a silalawag ken siaasi a nangibaga nga awan riknana kaniak. Adu nga aldaw a diak nakapangan wenno nakaturog, ngem daytoy nga artikulo ti nakatulong kaniak a maaddaan iti realistiko a panangmatmat ken mangtaginayon iti panagraemko iti bagik.

M. I., Japan

Kalpasan ti nabayag a panagpaspasanaangko gapu ta pinaaynak ti ay-ayatek, naamirisko a ti kasayaatan nga aramidek ket sanguek ti kinapudno. Naamiriskon a saan la a sisiak ti nakapasar iti kasta. Pagyamanan unay.

L.A.C., Brazil

Nasair ken nasaktanak idi imbaga ti kursonadak nga awan riknana kaniak. Nagsangitak kalpasan a nabasak ti artikulo agsipud ta babaen iti dayta, tinulongannak ni Jehova. Ita, ammokon a kayatnak a salbaren manipud iti nakaro a saem. Ad-adda itan nga ay-ayatek ni Jehova.

D. O., Austria

Impaganetget ti artikulo nga “Agimtuod Dagiti Agtutubo” nga intukit ni Jehova kadagiti tattao ti tarigagay nga agayat ket ammona no kasano a makontroltayo dayta nga ayat. Baro ken makaliwliwa kaniak dayta. Kayatko ti agbalin a napintas iti imatang ni Jehova​—maaddaan iti napintas nga ugali a kas inlawlawag ti artikulo.

H. W., Japan