Ti Panangmatmat ti Biblia

Rumbeng Kadi a Liklikan Dagiti Babbai ti Agpapintas?

“MAGUSGUSTUAN dagiti babbai ti uso,” kinuna ni George Simonton, maysa a beterano a diseniador iti uso ken propesor idiay New York’s Fashion Institute of Technology. Kastoy ti inlawlawagna: “Dagiti babbai kayatda nga ipakita ti kinatao ken panagtalekda iti bagida tapno pumintas ti langada . . . Patiek a no kasta ti aramidem, maipakitam nga adda panagraemmo iti bagim ken kadagiti kalanglangenmo.” Wen, ti panagpapintas ket nabayagen a mabigbig kas pamay-an ti panangipakita dagiti babbai iti kinababaida, tapno pumintas ti langada, ken maipakita nga adda panagtalekda iti bagida.

Ngem no relihion ti pagsasaritaan, negatibo ti panangmatmat ti dadduma maipapan iti panagpapintas dagiti babbai. Kastoy ti insurat ni Tertullian idi maikatlo a siglo K.P. maipapan kadagiti kolorete: “Dagiti nasantuan a babbai . . . no . . . natural ti kinapintasda, . . . masapul a didan agpapintas, no di ket ikagumaanda nga ilimed dayta. Basol iti Dios no aplayan dagiti babbai ti rupada iti cream, koloranda dagiti pingpingda, wenno paatiddogenda dagiti kidayda.” Dineskribirna met dagiti balitok ken pirak a “pagarkos” kas “alikamen a panggargari.”

Kadagitoy nga aldaw, adu pay laeng ti addaan iti aglablabes a kapanunotan maipapan iti panagpapintas dagiti babbai. Dadduma a relihion iparitda pay ketdi kadagiti miembroda ti agalahas, agkolorete, wenno agkawes iti namaris. Masapul kadi nga ilemmeng ti maysa a Kristiano a babai ti kinapintasna, wenno ikagumaanna ti agpapintas?

Panangmatmat ti Dios

Ti Biblia saanna a detalyado a salaysayen ti panagalahas wenno ti panagkolorete. Ngem adda umdas nga ebidensia a mangipakita a saan a kondenaren ti Dios dagitoy wenno ti dadduma pay a kita ti pagpapintas.

Kas pagarigan, idi dineskribir ti Dios ti panangbendisionna iti Jerusalem, inyarigna dayta a siudad iti babai a  nangibagaanna iti kastoy: “Inarkosanka kadagiti pagarkos . . . , ket dimmakkelka a nakaliblibnos unay.” (Ezequiel 16:11-13) Nupay simboliko, karaman dagiti pulseras, kuentas, ken aritos kadagita a pagarkos. Nasayaat met ti panangidilig ti Biblia kadagiti personal a pagarkos a balitok iti “masirib a manangtubngar” a ti ibagbagana ket ipangag ti situtulok nga agimdeng. (Proverbio 25:1, 12) Nainkalintegan ngarud a makunatayo a no nangaramid ti Biblia kadagitoy makaay-ayo a panamagdilig, saan ngarud a kontraen ti Dios ti panangusar dagiti babbai kadagiti pagpapintas.

Arkosan Dagiti Kristiano a Babbai ti Bagbagida

Dadduma a paset iti Biblia direkta a salaysayenda ti panagarkos ti babbai. Kastoy ti insurat ni apostol Pablo: “Tarigagayak a dagiti babbai arkosanda ti bagbagida iti naimbag-pannakaurnosna a kawes.” No maaramid daytoy buyogen ti “kinaemma ken kinasimbeng ti panunot,” ipakpakita ti maysa a babai nga adda panagbutengna iti Dios. (1 Timoteo 2:9, 10) No ipakita dagiti Kristiano a babbai ti kasta a naemma a kinapintas, mapagbalinda a makaay-ayo dagiti pannursuro ti Dios ken iti kongregasion.

Ikalintegan ti dadduma nga agkontra dagita met la a bersikulo ta nadakamat ngamin a ti panagarkos ket rumbeng a saan a babaen “kadagiti estilo a panangsallapid iti buok ken balitok wenno kadagiti perlas wenno nangina unay a lupot, no di ket iti wagas a maitutop kadagiti babbai nga agkunkuna nga agraemda unay iti Dios, awan sabali, babaen iti naimbag nga ar-aramid.” Kaipapanan kadi daytoy a masapul a di urnosen dagiti babbai ti buokda wenno dida agalahas?

Saan; nasayaat ti panangdakamat ti Biblia maipapan iti panagarkos. Isu nga imbes nga iparit ni Pablo ti panagpapintas, iparparegtana kadagiti babbai nga ipangpangrunada ti panangarkos iti bagbagida kadagiti Nakristianuan a kualidad ken naimbag nga aramid.

Napateg Dagiti Motibo

Kastoy ti insurat ni apostol Pablo: “Saantay koma nga agiinnukomen, no di ket aramidenyo daytoy a pangngeddengyo, a dikay mangikabil iti sanguanan ti maysa a kabsat iti pakaitibkolan wenno pakaigapuan ti pannakaikulbo.” (Roma 14:13) Kasano nga agaplikar daytoy iti pilientayo a pagpapintas iti bagitayo?

Umuna, ibagbaga ni Pablo kadatayo a “saantay koma nga agiinnukomen.” Masapul nga agannadtayo a ‘ditay mangikabil iti sanguanan ti maysa a kabsat iti pakaitibkolan.’ Iti nadumaduma a pagilian ken kultura, mabalin a nadumaduma dagiti pagannurotan iti maakseptar a kababalin. Ti maakseptar iti maysa a tiempo ken lugar ket mabalin a saan a maitutop iti sabali. Masapul a ditay itibkol wenno sairen ti dadduma babaen ti panagarkostayo iti banag nga inaig ti kulturatayo iti naalas nga estilo ti panagbiag. Dagiti nadiosan a babbai nasayaat no iyimtuodda iti bagbagida: Kasano ti panangmatmat ti komunidad iti kawesko? Maibabain, masdaaw, wenno mapabainan ngata dagiti kakongregasionko gapu iti kawesko? Uray no adda kalintegan ti maysa a Kristiano a babai nga agkawes wenno agayus iti maysa nga estilo, masapul a baybay-annan dayta a kalinteganna no alasen ti dadduma ti estilona.​—1 Corinto 10:23, 24.

Kasta met nga umalas ti kababalin ti maysa a tao no aglablabes ti panangasikasona iti langana. Iti adu a pagilian ita, dadduma a babbai ti agpapintas tapno agalembong ken maatrakarda ti dadduma iti naalas a wagas. Nupay kasta, dagiti Kristiano a babbai siiinget a liklikanda ti kasta a di umiso a panagusar kadagiti pagpapintas. Ngamin, ikagumaanda ti agbalin a nasimbeng ken nadalus kadagiti personal a biagda, “tapno ti sao ti Dios saan koma a mapagbassawangan.”​—Tito 2:4, 5.

Dagiti nadiosan a babbai maawatanda nga uray pay ikeddengda ti agusar iti makinruar a pagpapintas, ti pudno a kinapintasda ket agpannuray iti “nalimed a kinatao ti puso” ket maipakitada dayta kadagiti kababalin ken tigtignayda. (1 Pedro 3:3, 4) Ti babai a mangaramid kadagiti nainsiriban a pangngeddeng maipapan iti panagkawkawesna, panagkolorete, ken panagalahasna magun-odanna ti panagraem ti dadduma ken maidayawna ti Namarsua kenkuana.