Balbalay a “Nakagayan iti Burbor”

Babaen iti mannurat ti Agriingkayo! idiay Ukraine

DAGITI tiendaan, pagtaengan, ken pagopisinaan iti intero a Ukraine ket naarkosan iti shuba, a “nakagayan iti burbor” ti kaipapananna. Ti shuba ket tradisional nga stucco finish wenno palitada iti pasdek. Kaasping dayta ti burbor iti uneg ti kagay a naaramid iti lalat ti karnero. Dagiti edukado a lallaki nga agnanaed kadagiti pimmalasio a pagtaengan apresiarenda ti kinapintas ti shuba, ket porsegido uray dagiti nanumo a mannalon a mangbusbos iti adu a kuartada tapno maarkosan iti shuba ti babassit a balbalayda.

Kadawyanna, agarup dua a tawen a masursuro dagiti kastoy a pamay-an ti panangarkos kadagiti diding ken bobida. Sumagmamano ken simple dagiti remienta ti artesano iti shuba. Karaman kadagitoy ti maysa a timba a pagkargaan iti nabasa a semento, ababa a sagad, ken atiddog a kayo wenno metal. Nupay kasta, adda rigrigatna ti panagaramid iti shuba.

Ti shuba ket saan la a napintas a pangleppas a palitada dagiti diding ken bobida​—ramanen dayta ti nadumaduma a padron, disenio, kolor, ken kinapuskol. Inton kabesadon ti maysa nga artesano nga usaren dagiti maitutop a disenio iti pasdek wenno balay a trabahuenna, agbalinen nga eksperto nga agpalitada iti shuba.

Ti maikabil a nadumaduma a disenio wenno geometriko a padron ket mabalin a maikur-it iti diding sakbay a mapalitadaan. Mapagsupadi ti disenio no nadumaduma ti kapuskol ti maipalitada a natayengteng ken nakusnaw ti kolorna a semento. Inton nagmagan ti shuba, maispreyan iti pintura tapno napimpintas ken naisalsalumina.

Babaen ti panangiggemna iti sagad iti maysa nga imana, ilumlomna dayta iti semento. Kalpasanna, iwagsakna ti sagad iti atiddog a kayo nga ig-iggaman ti maysa pay nga imana. Maiwarsi ti semento iti diding. Ti nagaget ken nasigo a trabahador mapalitadaanna ti 20 agingga iti 25 a metro kuadrado iti kada aldaw.

Nupay ad-adda a makabannog ti panagpalitada iti shuba, dagiti balbalay a naarkosan iti kasta, basbassit ti masapulda a pannakamantener. Ti laeng aramiden ti makimbalay ket masapul nga ikkatenna ti tapok maminsan iti kada tawen babaen ti panangispreyna iti danum kadagiti diding sana pintaan ti aniaman a nagkupas a disso. Kalpasan dagitoy a pamay-an, masierto nga agpaut ti shuba. Kinapudnona, adu a pagtaengan ti kasla barbaro latta uray no 20 a tawenen a napalitadaan iti kasta.

Adda nasigo a trabahador a naaddaan iti gundaway a mangusar iti paglainganna iti sabali a pagilian. Idi sarsarungkaranna ti maysa a gayyemna idiay Balingen, Alemania, nakiddaw a palitadaanna iti shuba ti pagtaengan ti gayyemna. Nupay gagangay ti shuba idiay Ukraine, kabarbaro dayta iti daytoy nga ili.

Bayat nga ar-aramiden ti nasigo a trabahador ti shuba, inaribungbongan ti intero a sangakaarrubaan. Nasdaaw ti maysa a kontraktor iti panagibangon kadagiti pasdek. Dina impagarup a kasta ti kapintas ti mapataud babaen kadagiti simple a remienta. Timmaliaw dagiti drayber tapno masirpatanda dayta bayat nga imbumbuntogda ti agmaneho. Adda met periodista a namin-adu a nangretrato iti dayta tapno maimaldit iti periodiko dayta a lugar. Idi nalpasen, ti balay ket nakaawat iti premio manipud iti siudad.

Makaay-ayo ngata ti shuba iti lugaryo? Nalabit daytoy napintas ken baro a “nakagayan iti burbor” a balayyo ti ad-adda a mangpapintas iti dayta.

 [Ladawan iti panid 23]

Ti balay a naarkosan iti shuba a nakaawat iti premio idiay Balingen, Alemania

[Ladawan iti panid 23]

Kasapulan ti kasta unay a kinasigo no mapalitadaan iti shuba ti maysa a balay

[Ladawan iti panid 23]

Dagiti remienta ti nasigo a trabahador iti shuba karamanna ti ababa a sagad ken atiddog a kayo