Manipud Kadagiti Agbasbasa

Panagserbi iti Lugar a Dakdakkel ti Pakasapulan Ti artikulo a “No Ammo La Koma Dagiti Tattao!” (Enero 8, 2005) ti eksakto a kasapulak! Iti kagimongan a mangpilit kadagiti agtutubo nga agpabaknang, nalaka a malipatan ti panangyun-una koma ken Jehova. Ti balligi ni Davey a nagserbi iti lugar a dakdakkel ti pakasapulan ti nangparegta kaniak a makipaset iti kasta met la a panangasaba inton arinunos daytoy a tawen.

C. G., Estados Unidos

Naan-anay nga umanamongak iti imbaga ni Davey nga “awanen ti nasaysayaat pay ngem iti panagserbi ken Jehova iti amin a kararua.” Sayang ta saan a maawatan dayta ti amin nga agtutubo! Diak pagbabawyan ti desisionko a mangipangpangruna iti panagserbi ken Jehova kadagiti tawen ti kinaagtutubok, ket desididoak a mangitultuloy iti kinaregtak agingga iti panungpalan kas iti inaramid ni Davey!

A. P., Russia

Agtutubotay man wenno natataengan, ti naregta nga ulidan ni Davey ti mangtignay iti tunggal maysa kadatayo a mangpanunot no kasano ti panangusartayo iti biagtayo. Kayatko nga iyebkas ti panangapresiarko kadagiti nagannak ni Davey, a sidudungngo a nangpadakkel iti anakda. Talaga a maipagpannakkelda ni Davey!

L. C., Italia

Agtawenak iti 17, ket madama nga ages-eskuelaak. Adayonto ti madanonko. Ti ulidan ni Davey ti ad-adda a nangparegta kaniak a mangipaay iti kasayaatan ken Jehova tapno makapagserbiak kas amin-tiempo nga ebanghelisador iti masanguanan. Kas ken Davey, tarigagayak unay ti mapan iti lugar a dakdakkel ti pakasapulan kadagiti adipen ni Jehova. Ammok a dayta ti kasayaatan a pangusarak iti biagko.

R. I., Finland

Iti pagnanaedak, gagangay kadagiti agtutubo ti mangragpat iti karera wenno usarenda ti tiempoda iti bukodda a pakaragsakan. Patiek a ti ulidan ni Davey ti mangparegta iti ad-adu pay nga agtutubo tapno panunotenda no kasano ti panangusarda iti biagda ken ti kinapateg ti panangtungpalda iti dedikasionda ken Jehova.

J. O., Sweden

Daytoy nga artikulo ti nangtignay kaniak a mangusig kadagiti naespirituan a kalatko. Sabali idi ti ipangpangrunak. Ngem ti kapadasan ni Davey ti namagpanunot kaniak iti mabalin a makunanto ti tattao no bilang matayak. Dayta met ti nangisuro a rumbeng nga usigek a naimbag ti ministeriok. Sapay koma ta itultuloyyo ti agsurat kadagiti kasta a makaparegta nga artikulo.

S. K., Alemania

Gapu ta agbibiagtayo iti materialistiko a lubong, kasapulantay ti bileg tapno malapdantayo dagiti naagum a pagannayasantayo. Pulos a diakto malipatan ti nasayaat nga ulidan ni Davey. Ikagkagumaak nga addaakto iti sumungsungad a baro a lubong tapno agyamanak kenkuana iti panangisurona iti napateg a leksion nga “awanen ti nasaysayaat pay ngem iti panagserbi ken Jehova iti amin a kararua.”

O. G., Francia

Agtawenak iti 10. Ammok ti eksakto a narikna ni Davey agsipud ta maysaak met a payunir a kadua ti dadakkelko ditoy Taiwan. Pinaregtanak daytoy nga artikulo. Nasayaat a maammuan nga adda dadduma pay nga agtutubo nga agserserbi iti lugar a dakdakkel ti pakasapulan. Umanamongak ken ni Davey nga awanen ti sabali pay nga ad-adda a makaparagsak!

J. R., Taiwan

Dagiti Harp Seal Agyamanak gapu iti artikulo a “Dagiti Urbon iti Kaniebian ti Magdalen Islands.” (Enero 8, 2005) Malmaldaangak gapu iti nabayagen a sakitko. Ngem naragsakanak idi nakitak dagitoy nakaay-ayat a parsua. Ti panangammo maipapan kadakuada ti nangtignay kaniak nga agyaman ken masdaaw kadagiti pinarsua ni Jehova. Kas man la mabalin met a sagidek ida! Agyamanak ken Jehova ta adda manen sabali pay a segseggaak a makita idiay nalinteg a baro a lubongna.

Y. M., Japan