Nariknami ti Makapabileg a Pannarabay ti Dios

KAS INSALAYSAY NI ESTHER GAITÁN

“Kinidnapmi ni nanangmo. Saanka nga agpatulong kadagiti polis. Urayem laengen ti awagmi inton bigat.”

DAYTA ti nangngeg ni adingko idi adda immawag kenkuana maipapan ken ni nanangmi nga Esther, iti aldaw ti Martes itay napan a tawen. Kasangsangpetmi ken ni lakayko nga Alfredo manipud iti maysa a gimong iti Kingdom Hall dagiti Saksi ni Jehova idi nadamagmi dayta nga awag. Apaman a nakadanonkami iti pagtaengan ti dadakkelmi idiay Mexico City, addan sadiay ti kakabagianmi. Madandanagan unay dagiti adiek a babai ken lalaki, ket agsangsangit ti kakabsat ni Nanang.

Awan da tatangko ken manongko gapu ta nagbiaheda a nainaig iti negosio. Kalpasan a nakasaritak ida iti telepono, nagnunumuanmi amin a ti kasayaatan ket ipakaammomi kadagiti polis. Agpatnag a nagkararagkami iti dayta makapadanag a rabii. Nalawag a nariknami a ti Dios impaayannakami iti “pannakabalin a nalablabes ngem ti gagangay.”​—2 Corinto 4:7.

Kabigatanna, siak ti simmungbat iti awag dagiti kidnaper. Nupay agnernerbiosak, nakisaritaak a sitatanang. Kayat ti kidnaper a makasarita ni tatangko, ngem imbagak kenkuana nga awan. Kalpasanna, imbaga ti lalaki nga agurayda agingga a sumangpet ni Tatang tapno mangrugin ti negosasion. Pinakdaarannak a no saanmi nga ited ti dakkel a gatad, patayenda ni nanangko.

Kabigatanna, siak manen ti simmungbat iti awag iti telepono. Tangay natantanangakon agpapan pay kadagiti pangtana, kastoy ti inyimtuod ti kidnaper: “Dimo kadi maamiris a napeggad ti kasasaad?”

“Maamirisko,” kinunak. “Kinidnapyo ni nanangko. Ngem Saksi ni Jehova-kami, ket naan-anay nga agtalekkami a tulongannakami ti Dios.  Ket tultulongannakami ti Biblia a mangandur kadagitoy narigat a tiempo a pagbibiagantayo.”

“Wen. Ammok dayta,” kinunana. “Kasta met laeng ti imbaga ni nanangmo. Agtalek unay iti Diosyo ken kadakayo a pamiliana.” Isu nga ammomin a natibker latta ti pammati ni Nanang, ket daytoy ti nangpabileg kadakami.

Tulong Tapno Makaandur

Bayat ti panaglabas dagiti aldaw, tineleponuannakami dagiti padami a Kristiano ken pinatulodandakami kadagiti kard ken mensahe babaen iti e-mail ken cell phone. Intultuloymi ti nakigimong ken nangasaba. Naliwliwakami met gapu iti inaldaw a panagbasami iti Biblia ken kadagiti literatura a naibasar iti dayta. Kangrunaan ti amin, ti kararag ti nangted kadakami iti “talna ti Dios.”​—Filipos 4:6, 7.

Kastoy ti imbaga ti maysa kadagiti polis: “Kabayatan ti siam a tawen a panagtrabahok iti polisia, nagadun a pamilia ti nakitak a nakapasar iti nasaem a pagteng, ngem naidumakayo. Kalmadokayo unay. Siguradoak a gapu dayta iti Dios a pagdaydayawanyo.”

Impakitami kenkuana ti Disiembre 22, 1999 a ruar ti magasin nga Agriingkayo!, nga addaan iti serye ti akkub a “Panangkidnap​—No Apay a Sangalubongan a Pangta,” a binasami manen a nasaksakbay. Binasana dayta ken nagkiddaw iti ad-adu pay a kopia sana imbaga a kayatna a maam-ammo a naimbag dagiti Saksi ni Jehova.

Kamaudiananna, kalpasan ti 15 nga aldaw a negosasion, winayawayaan dagiti kidnaper ni nanangko. Nasayaat met ti kasasaadna nupay nakapupok idi iti bassit a siled ken nakawaran dagiti sakana. Nupay kasta, trinatoda buyogen ti panagraem ken inikkanda pay iti agas a gagangay a tomtomarenna gapu iti diabetes ken alta presionna.

Dineskribir ni Nanang no kasano a nadaeranna a sibaballigi ti kasasaadna. “Idi damo,” inaminna, “nabutnganak; ngem nagkararagak ken Jehova, isu a dina impalubos a maupayak. Pulos a diak narikna nga agmaymaysaak iti dayta a siled. Natakuatak a pudno unay ni Jehova kaniak; dinak pulos binaybay-an. Kiniddawko kenkuana a tulongannak a mangipakita kadagiti bunga ti espirituna​—nangruna iti panaganus.

“Gapu iti tulong ti Dios, pulos a saanak a nagsangit wenno nataranta. Binusbosko dagiti aldaw a nanglagip kadagiti kabesadok a bersikulo iti Biblia ken kinantak met dagiti kanta ti Pagarian. No dadduma, napanunotko nga addaak kadagiti Nakristianuan a gimong, ken makipaspasetak kadagitoy. Pinampanunotko met a mangaskasabaak kadagiti tattao ken mangikonkondukta kadagiti panagadal iti Biblia. Dagita ti sangkapanunotko isu a diak napupuotan a nagbiit a naglabas ti aldaw.

“Naaddaanak iti gundaway a mangiranud iti pammatik kadagiti kidnaper. Kada adda mangyeg iti taraonko, kasabaak uray no napiringanak. Kas pagarigan, imbagak naminsan iti kidnaper nga impadto ti Biblia dagiti narigat a tiempo a pagbibiagantayo isu a maawatak no apay a kasapulanda unay ti kuarta. Imbagak a ni Jehova a Dios ket addaan iti naan-anay a pannakabalin ngem saanna a pulos nga ab-abusuen dayta. Kalpasanna, impakpakaasik a dida abusuen ti pannakabalinda no di ket tratuendak iti nainkalintegan.

“Impangagnak ti kidnaper ket imbagana a saanak nga agdanag ta didak an-anuen. Agyamanak ken Jehova gapu iti pannarabayna kaniak kadagidi narigat a kanito. Dayta ti gapuna nga ad-addan a desididoak a mangitultuloy iti panagserbik kenkuana kas maysa a regular pioneer [amin-tiempo nga ebanghelisador] agingga a kabaelak.”

Di pagduaduaan a daytoy a pakasuotan ti ad-adda a nangpasinged ken ni Nanang ken Jehova, a kas kadakam amin. Saankami a makapanunot iti maitutop a sasao a mangyebkas iti panagyamanmi ta nakaawid met laengen ni Nanang. Maliwliwakami a makaammo nga inton agturayen ti Pagarian ti Dios, awanton dagitoy a kinaranggas. Kabayatanna, dakami a sangapamiliaan ti mangpaneknek iti kinapudno ti sasao ti salmista iti Biblia: “Adu ti didigra daydiay nalinteg, ngem manipud kadakuada amin isu ispalen ni Jehova.”​—Salmo 34:19.