Panangliwliwa Kabayatan ti Trahedia

Ni Dolores Gómez, a maysa kadagiti Saksi ni Jehova iti bassit nga ili nga asideg ti Barcelona, Espania, ket agtawen iti 44 idi imbaga ti doktorna nga adda tumor iti utekna. Sigun iti doktor, walo la a bulanen nga agbiag ni Dolores. Aglaplapusanan ti panagayat dagiti padana a Kristiano kenkuana. Kadagiti maudi nga aldaw sakbay ti ipapatayna, simmangpet dagiti saan a Saksi a kabagianna manipud iti nadumaduma a paset ti Espania.

Dagiti kalugaranna a Saksi ti nangasikaso kadakuada. Pinadagusda ida, tinaraonan, impaayan iti pagluganan, ken dadduma pay a masapsapulda. Ti di maisin a pammati ken mararaem a pakasaritaan ni Dolores agingga iti ipapatayna agraman ti kinamanagpadagus dagiti kalugaranna a Saksi, ti nangtukay iti puso ti pamiliana. Kastoy ti insuratda a pangyebkas iti riknada.

“Maysa a surat daytoy nga agpaay iti timpuyog dagiti lallaki ken babbai a saan la a nangasaba babaen ti panangipakitada iti ayatda iti padada a tattao no di ket babaen kadagiti aramid a mangipakita kadagiti nangato a moral a prinsipio nga an-annurotenda. Napasaranmi daytoy kabayatan ti nakallalagip a pagteng iti biagmi idi nagsakit ti patpatgenmi nga ading a ni Loli [Dolores] nga isu metten ti impatayna.

“Dayta ti gapuna a maladingitankami amin (dagiti kabagianna manipud iti addayo a paset ti Espania) iti ipupusayna. Nupay kasta, kayatmi nga iyebkas ti naimpusuan unay a panagyaman ken panagayat kadakay amin a nangtarabay kenkuana kadagiti rag-o ken ladingitna, kadagiti balligi ken pannakapaayna, agingga kadagiti maudi a kanito ti panagbiagna ditoy daga.

“Kayatmi met nga ipakaammo a napasaranmi ti maysa kadagiti katan-okan nga ebidensia ti ayat ken panagkaykaysa. Agawidkami kadagiti pagtaengan, pamilia, ken rebbengenmi a naiduman ti riknami gapu iti ayat a nagari ken ni adingmi a Loli ken kadakayo, ket daytoy ti mangpabileg kadakami iti inaldaw a panagbiagmi.

“Pumakadakamin a buyogen ti naimpusuan nga agep ken panagyaman. Sapay koma ta agkikitatayto manen ket paraburannakayo koma ni Jehova iti kinaragsak.”

Pinirmaan ti pamilia ken kakabsat ni Dolores Gómez

[Dagiti Ladawan iti panid 31]

Sumagmamano kadagiti Saksi iti dayta a lugar