Lubong a Nasinasina Gapu iti Kinabaknang

BAYAT ti maudi a kagudua ti maika-20 a siglo, nariribuk ti lubong gapu iti panagginnura dagiti Komunista ken di-Komunista a pagilian iti naawagan a Cold War, ket iti politika, nabingay ti lubong iti nagkatlo a paset. Ti Komunismo, nga inrepresentar a nangnangruna ti Union of Soviet Socialist Republics, ken dagiti di-Komunista a nasion, nga indauluan ti Estados Unidos, nagsinniputda babaen iti di makita a Kurtina a Landok wenno nagduma a kapanunotan maipapan iti politika ken militar. Dagiti nasion a di nakidasig kadagiti Komunista ken di-Komunista ti nangbukel iti maikatlo a grupo.

Dagiti napanglaw a pagilian ti kaaduan kadagiti nasion a mangbukel iti daytoy maikatlo a grupo. No kasta, naikkaten ti termino a mangipaganetget kadagiti napolitikaan a nagdumaan ken ad-adda a mangipangpangruna kadagiti pagdumaan iti ekonomia.

Ita, iti maika-21 a siglo, awanen ti nadakamat itay a lubong a nabingay iti nagkatlo a napolitikaan a paset. Ngem iti ekonomia ken iti industria, adda pay laeng nagdumaan dagiti nabaknang ken napanglaw a nasion. Dagiti turista manipud kadagiti nabaknang a pagilian makipulpulapolda kadagiti napanglaw a tattao a mangikagkagumaan a mangtaraon kadagiti pamiliada.

No kasta, maitutop a maisaludsod: Rumbeng kadi nga agtalinaed a nasinasina ti lubong gapu iti ekonomia, wenno addanto tiempo a nanam-ayen ti panagbiag agpadpada dagiti addaan wenno nabaknang ken dagiti awanan wenno napanglaw?

[Picture Credit Line iti panid 3]

© Qilai Shen/Panos Pictures