Manipud Kadagiti Agbasbasa

Dagiti Doktor Nabiit pay a binasak ti serye a “Panangtarus iti Doktormo.” (Enero 22, 2005) Agyamanak iti nakalawlawag a panangdeskribiryo iti mapaspasaran dagiti doktor. Maysaak a nars, ket nakitakon a mismo ti di panagkinnaawatan dagiti mangngagas ken pasiente. Sapay koma ta makatulong daytoy a serye iti adu tapno ad-adda a matarusan ken maapresiarda ti trabaho dagiti doktor ken nars.

L. K., Russia

Imbaga kaniak ti maysa a doktor a naragsakan a nangbasa iti dayta a magasin. Kinomendaranna ti panagsirarak ken imbagana nga anamonganna a naan-anay dayta a serye. Agyamanak kadagitoy nagsayaat nga artikulo.

H. Z., Alemania

Kas maysa a pasiente, ti la bagik ti pampanunotek. Ngem daytoy a magasin ti nakatulong kaniak a mangtarus iti rigat a sagsagabaen dagiti doktor. Manipud ita, no agpadoktorak, saanto laengen a ti kapanunotak maipapan iti sakitko ti saritaek, no di ket surotek ti balakad iti kahon a “Pannakitinnulong iti Doktormo.” Kayatko ti agbalin nga ad-adda a mannakaawat a pasiente.

J. M., Japan

Maysaak a Kristiano a panglakayen ken doktor. Mapakpaksuyanak a nangnangruna agsipud ta nalakaak a maasian ken inaldaw a nagadu ti pasientek. Ti panagbalinko a maysa kadagiti Saksi ni Jehova ti nakatulong kaniak a mangtaming a sititimbeng iti karerak. Saysayaatek ti trabahok tapno adda umdas a panawenko iti pagtaengan agpaay kadagiti agiinak, ken iti Nakristianuan a trabahok. Tultulongannak ti magasin nga Agriingkayo! nga agbalin a natimbeng tapno kanayon a maipangpangrunak dagiti kapatgan a banag.

P. R., Estados Unidos

Diak umannugot iti imbagayo a “dadduma nga abogado ti mangaramid kadagiti sinasaur a darum tapno bumaknangda.” Kadawyanna, awan maganab dagiti abogado no awan desision nga ipaulog ti korte wenno saan a naginnareglo ti nagdarum ken ti naidarum. Tapno mangabakda iti maysa a kaso, masapul a paneknekanda nga adda nasalungasing iti maipapaalagad a pannakaasikaso ti kaso. Yantangay nasurok a 30 a tawenen a mangtamtamingak iti adu a kaso a nainaig kadagiti aramid a mangsalungasing iti maitutop a panagakem dagiti abogado iti propesionda, maibagak kadakayo nga ad-adu a kaso ti diak inawat ngem kadagiti inawatko.

J. M., Estados Unidos

Sungbat ti “Agriingkayo!”: Ti imbagami a “dadduma nga abogado ti mangaramid kadagiti sinasaur a darum tapno bumaknangda” ket saan a komento maipapan iti kinasaknap dayta nga aramid. Ti inyunay-unaymi ket ti kasansan ti di umiso a panangidepensa iti kaso ti kangrunaan a pagdanagan ti adu a doktor. Agpayso nga adu dagiti saan a husto a darum. Nupay kasta, nainkalintegan ti imbaga ti agbasbasa. Ti sistema ti hudikatura ti mangikeddeng kadagiti limitasion a mamagbalin a saan a praktikal​—no di pay ket maikontra iti moral a prinsipio​—ti mangyuli iti minamaag a kaso.

Agimtuod Dagiti Agtutubo Agtawenak iti 11. Nagustuak ti artikulo nga “Agimtuod Dagiti Agtutubo . . . Ania ti Rumbeng nga Aramidek No Ibaga Kaniak ti Sabsabali Dagiti Parikutda?” (Enero 22, 2005) Adda kaeskuelaak a balasitang a nangibaga kaniak a nakalkaldaang dagiti napasaranna iti biag, sa nakarkaro pay ta natay ni lolona itay napan a lawas. Adu ti nabasak iti daytoy nga artikulo a makatulong kaniak a mangliwliwa kenkuana. Maliwliwaak unay a makaammo a naan-anay a maawatan ni Jehova ti sagsagabaen dagiti agtutubo.

A. H., Estados Unidos

Agtawenak iti 14, ket adu kadagiti kasadarak ti umay agpabalakad kaniak. No dadduma, saan koma a siak ti rumbeng a mangtaming iti dayta. Siaasi nga ilawlawagko no apay a diak ida matulongan, ket no dadduma, iranranudko kadakuada ti impormasion a naibasar iti Biblia. Ita, adun a kasadarak ti agsalsaludsod kaniak maipapan iti relihionko. Gapu iti dayta, napanunotko nga usaren ti tema a “Dagiti Saksi ni Jehova​—Siasinoda? Ania ti Patpatienda?” kas ti naituding nga ibitlak iti klasemi.

B. D., Canada