Nakasaganakayo Kadin a Tumabuno?

▪ Tumabuno iti ania? Iti “Panagtulnog iti Dios” a Kombension Distrito dagiti Saksi ni Jehova! Daytoy a serye ti tallo nga aldaw a kombension ket nayeskediul a maangay inton Nobiembre, Disiembre, ken nasapa a paset ti Enero 2006 iti nasurok a 50 a siudad iti intero a Pilipinas. Mabalin a maangay ti maysa iti siudad nga asideg kadakayo.

Iti kaaduan a lugar, mangrugi dagiti sesion iti alas 8:30 ti bigat babaen iti musika. Ti tema iti Biernes ket “Agtulnogkayo iti Timekko, ket Agbalinakto a Diosyo.” (Jeremias 7:23) Kalpasan dagiti palawag iti bigat a napauluan iti ‘Nakaskasdaaw ti Pannakaaramidtayo’ ken “Panagungar​—No Apay a Napaypayso Koma Kadakayo Dayta a Namnama,” agngudo ti sesion babaen iti pannakatema a palawag a, “Surotenyo ti Pagwadan iti Panagtulnogyo iti Dios.”

Ti sesion iti malem ti Biernes itampokna dagiti palawag nga “Itultuloyyo a ‘Panunoten ti Espiritu,’ ket Agbiagkayo,” “Agaluadkayo iti Tunggal Kita ti Kinaagum” ken “Diyo Suroten Dagiti ‘Nalaing Pannakapartuatna nga Ulbod a Sarsarita’.” Kalpasanna, ti dua ti pasetna a simposium iparangna dagiti tampok iti libro ti Biblia a Haggeo ken Zacarias. Agngudo dagiti sesion iti Biernes babaen iti palawag nga “Asidegen nga Agpatingga ti Amin a Panagsagaba!”

Ti tema iti programa iti Sabado ket “Natulnog Manipud iti Puso” “iti Amin a Bambanag,” a naibasar iti Roma 6:17 ken 2 Corinto 2:9. Karaman iti sesion iti bigat ti nagkatlo ti pasetna a simposium a napauluan iti “Naragsak Dagiti Pamilia a Mangyap-aplikar Kadagiti Nadiosan a Prinsipio.” Itampokna dagiti demostrasion ken interbiu ket ipangpangrunana no kasano a makatulong dagiti miembro ti pamilia​—ti asawa a lalaki, asawa a babai, ken annak​—iti kinaragsak ti pamilia. Agngudo ti programa iti bigat babaen iti paset a “Ti Koma Saoyo a Wen Kaipapananna ti Wen,” ket kalpasanna addanto gundaway nga agpabautisar dagiti kualipikado.

Ti palawag iti malem ti Sabado iramanna ti “Liklikanyo ti Panangkita iti Awan Pategna” ken “Agsublikayo iti Pastor Dagiti Kararuayo.” Ti dua ti pasetna a simposium a napauluan iti “Agtulnogkayo Kadagidiay Mangidadaulo” ti sumaruno. Ti pangserra a palawag iti malem, a napauluan iti “Ania a Talaga ti Isursuro ti Biblia?” ti maysa a tampok iti kombension.

Ti programa iti agsapa ti Domingo ti natemaan “Agtulnogka Kadagitoy Amin a Sasao . . . Tapno Naimbag ti Lak-ammo,” a naibasar iti Deuteronomio 12:28. Adda tallo ti pasetna a simposium a napauluan iti “Tulonganyo Dagiti Sabsabali a Mangtungpal iti Isursuro ti Biblia” ti mangipaay iti praktikal a tulong iti panangirugi ken panangidaulo kadagiti epektibo a panagadal iti Biblia.

Agngudo ti sesion iti bigat babaen iti full-costume a drama a natemaan iti “Ragpatenyo Dagiti Kalat a Pakaidayawan ti Dios.” Sarunuen dayta ti palawag nga “Agtutubo​—Dagiti Kadi Kalatyo Iturturongnakayo iti Balligi?” Daytoy a palawag ti mangted iti panirpatan iti drama a naibasar iti Biblia maipapan iti agtutubo a ni Timoteo, a nangipakita iti ulidan iti di agimbubukodan a panagserbi a maidagadag a tuladen dagiti agtutubo iti kaaldawantayo. Ti maudi a sesion iti malem ti Domingo itampokna ti diskurso publiko a, “Siasino ti Pagtulnogantayo?”

Iplanoyo itan ti tumabuno. Tapno maammuanyo ti pakaangayanna a kaasitgan iti pagtaenganyo, makiumankayo iti Kingdom Hall dagiti Saksi ni Jehova iti lugaryo wenno agsuratkayo iti Watch Tower, P.O. Box 2044, 1060 Manila.