Sukimatem a Naimbag ti Nopal

Babaen iti mannurat ti Agriingkayo! idiay Mexico

Ti mula a nopal ket maysa a naalas a cactus a nagbalinen a paset iti biag dagiti Mexicano iti adun a siglo. Masarakan dayta iti dadduma a pagilian kadagiti kontinente ti America​—agraman kadagiti natikag a lugar iti intero a lubong​—ngem di maibilang a naserbi gapu ta nasiit. Mabalin a tumayag dayta a mula agingga iti 5 a metro. Kuppit a sukog itlog dagiti nasiit nga ungkayna, ket nasam-it ti kasla peras ken aduan ngula a bungana.

Ti Milpa Alta, nga asideg iti siudad ti Mexico, ti nagsayaat a pagmulaan kadagiti nopal. Dagiti mannalon iti dayta a lugar nabayagen nga ilaklakoda dagitoy iti dadduma pay a paset ti lubong. Adda pay ketdi tinawen nga eksibision iti Milpa Alta, a mangipaay kadagiti tattao iti gundaway a mangraman iti adu ken nadumaduma a putahe a nalaokan iti nopal.

Ditoy Mexico, ti makitienda gagangayen a makasarak kadagiti ungkay ti nopal iti babassit a pagtagilakuan ken kasta met kadagiti moderno a supermarket. Mailako dagitoy a nadalusanen ken nakasaganan a maluto.

Kaaduanna, kappuros ken naganus dagiti masida a nopal. Adu a wagas ti panangluto dagiti Mexicano ken idasarda dagitoy a kadua ti nadumaduma a karne. Kadawyan a maidasar ti tinuno nga ungkay ti nopal a kadua ti steak, idinto ta naimas a pamigat ti nabatil nga itlog a nalaokan iti natadtad a nopal.

Maysa pay, mabalin a maaramid a naimas a salad. Tadtadem ti nalingta nga ungkay ti nopal iti babassit a kuadrado, sa nayonam iti natadtad a kamatis, sibuyas, ken kulantro, sa timplaam iti lana ti olibo, suka, ken asin. Nupay iti damo mabalin a kasla awan ti raman dagiti ungkay ti nopal​—ken di makaay-ayo gapu ta nagalis​—naimasda no malaokan iti nagasang a rekado dagiti Mexicano.

Nakaparpartak ken nakasigsigo dagiti nalaing a mannalon a mangdalus kadagiti ungkay ti nopal. No kayatmo met nga aramiden dayta, agannadka iti adu a siitna. Nasaysayaat no agguanteska iti plastik.

Natakuatan a makaagas ti mula a nopal. Imbaga ti National Institute of Nutrition ti Mexico a makapasalun-at ti nopal, ta malaksid iti dadduma a pagimbaganna, mapababana ti kolesterol ken dagiti LDL lipoprotein ti maysa a tao. Dadduma ti nangibaga a makatulong ti pannangan iti dayta tapno makontrol ti diabetes. Bayat nga ad-adalen dagiti sientista ti ordinario a mula a nopal, nalabit matakuatanto pay ti dadduma a mangpasalun-at a kualidadna.

Kabayatanna, apay a dimo ramanan ti mula a nopal a kadawyan a taraon dagiti Mexicano? Nalabit matakuatam nga ad-adda a magustuam ti nopal ngem iti langana.