Ti Pudno a Solusion ti Kinapanglaw

NAGADU a tattao iti intero a lubong ti mangisaksakad iti inaldaw a panagbiagda agpapan pay iti nakaay-ay a kinapanglawda. Nabatad a kasapulan ti sangatauan ti nalinteg ken mapagtalkan a gobierno a sipapasnek nga agtarigagay a mangbalbaliw iti kastoy a pannakaikuspil. Ti kasta a gobierno masapul met nga adda pannakabalinna a mangitungpal kadagiti naimbag a panggepna. Talaga kadi a manamnamatayo a makapataud dagiti tattao iti kasta a gobierno?

Patalgedan ti historia ti sangatauan ti kinapudno daytoy a pakdaar ti Biblia: “Dikay ikabil ti panagtalekyo kadagiti natan-ok, wenno uray iti anak ti naindagaan a tao, a kenkuana awan pannakaisalakan.” (Salmo 146:3) Natakuatam kadi a masansan a makapaupay ti agtalek kadagiti natauan a gobierno wenno pangulo? Ngem siasino pay ngay ti mabalin a pagtalkantayo?

Kinapudnona, nagadu ti mangikarkararag iti maysa a nalinteg a gobierno a mangbalbaliw iti di nainkalintegan a kasasaad. Nalabit inkararagmo metten ti pagtuladan a kararag nga insuro ni Jesus: “Amami nga adda iti langlangit, masantipikar koma ti naganmo. Umay koma ti pagariam. Maaramid koma ti pagayatam, kas sadi langit, kasta met iti daga. Itedmo kadakami ita nga aldaw ti tinapaymi nga agpaay itoy nga aldaw; ket pakawanennakami kadagiti utangmi, a kas met iti panangpakawanmi kadagiti nakautang kadakami. Ket saannakami nga iyeg iti pannakasulisog, no di ket ispalennakami iti daydiay nadangkes.’’​—Mateo 6:9-13.

Daytoy kadi a Pagarian ti kasapulantayo? Nalinteg kadi ken mapagtalkan? Adda aya pannakabalinna a mangitungpal kadagiti naimbag a panggepna? Awan duadua a kasta! Ti Dios a nangipasdek iti daytoy a gobierno, “ti Amatayo nga adda iti langlangit,” ket “nalinteg a Dios ken Manangisalakan,” ken “nalinteg iti amin nga ar-aramidna.” (Isaias 45:21; Daniel 9:14) Kastoy ti naibaga maipapan kenkuana: “Nasin-aw unay dagiti matam tapno kumita iti dakes,” isu a masiguradotayo a naan-anayto a mapagpiaran ti gobiernona. (Habakuk 1:13) Ket gapu ta “ti Dios saan a mangidumduma, no di ket iti tunggal nasion anamonganna ti tao nga agbuteng kenkuana ken agaramid iti kinalinteg,” ammotayo nga interesado iti pagimbagan ti tunggal tao ditoy daga.​—Aramid 10:34, 35; Roma 2:11.

Naipasdeken ken Agtigtignayen!

Nupay nailangitan a gobierno ti Pagarian ti Dios, siaaktibo nga iturongnanto dagiti kasasaad ditoy daga tapno  maibanag dagiti panggep ti Dios. Ramanen daytoy ti pannakasukat ti imperpekto a gobierno ti tao iti perpekto a gobierno ti Dios. Iti Daniel 2:44 kastoy ti naikari: “Iti kaaldawan dagidiay nga ar-ari [dagiti gobierno] mangipasdekto ti Dios ti langit iti maysa a pagarian a saanto a pulos madadael. Ket ti met laeng pagarian saanto a mayawat iti aniaman a sabali nga ili. Rumekennanto ken pagpatinggaenna amin dagitoy a pagarian, ket dayta agtalinaedto agingga kadagiti tiempo a di nakedngan.”

Babaen ti panangiwanwan daytoy a Pagarian, matungpalto met laengen ti pagayatan ti Dios agpadpada idiay langit ken ditoy daga. Anian a makaparegta a maammuan a daytoyto ti gobierno a makabael a mangpukaw iti amin a pakakitaan ti di panagpapada a nakaigapuan ti itataud ti nakaro a kinabaknang ken kinapanglaw! Awanton ti sumagmamano la a babaknang ken nagadu a nakurapay.

Anian a makaparagsak a maammuan a naipasdeken ti nailangitan a gobierno ti Dios tapno agnanayonen a masolbar dagitoy a parikut. Ti kronolohia ti Biblia ken dagiti pasamak iti lubong nabatad a tandaanda ti tawen 1914 kas ti tiempo a pannakaipasdek ti gobierno ti Dios idiay langit. * Isu a dandanin maysa a siglo a siaaktibo a maisagsagana ti pamuon ti baro a lubong ti kinalinteg.

Saan a mangidumduma dagidiay nakabigbigen iti pannakaipasdek ti Pagarian ken situtulnog itan a sumursurot iti panangiwanwanna. Kanayon a mangaskasaba dagiti Saksi ni Jehova iti dandani amin a pagilian. Dagiti umili kadagitoy a pagilian, nabaknangda man wenno saan ket maikkan iti gundaway a mangammo no kasano nga agbiagda nga agnanayon. (Juan 17:3) Dagiti Saksi dida ipalubos a ti nagdumaan ti kasasaad iti ekonomia ti mangikeddeng iti kasasaad wenno kinapateg ti maysa a tao kadagiti kongregasionda. Saan a maipato dagiti tattao sigun iti sanikuada. Imbes ketdi, mararaemda gapu iti kinataoda. Ad-adda a maipagpaganetget dagiti naespirituan a prinsipio ngem kadagiti namaterialan.

Kayatmo kadi a maammuan no kasanoka a makapagbiag iti sidong daytoy nalinteg a gobierno? No kasta, rugiam itan ti agsukimat. Ammuem no kasano a magun-odmo ti rag-o ti panagbiag inton saanen a nasinasina ti lubong gapu iti kinabaknang.

[Footnote]

 [Kahon/Dagiti Ladawan iti panid 8, 9]

Agkakabsat ti Amin, Nabaknang Man Wenno Napanglaw

▪ Idi agngudo ti Gubat Sangalubongan II, adu a Saksi ni Jehova idiay Europa ken Asia ti agkasapulan iti taraon, kawes, ken pagtaengan. Nagipatulod dagiti Saksi iti dadduma a pagilian iti tinontonelada a kawes ken taraon kadagiti naespirituan a kakabsatda iti Europa, Pilipinas, ken Japan. Nangted dagiti Saksi idiay Estados Unidos ken Canada kadagiti naipakete a tulong a maipatulod idiay Alemania, Austria, Belgium, Czechoslovakia (Czech Republic ken Slovakia itan), England, Finland, Francia, Grecia, Holland, Hungary, Italia, Poland, ken Romania.

[Dagiti Ladawan]

Estados Unidos

Switzerland

Alemania

▪ Idi laeng kalgaw ti 1994, maysa a grupo dagiti boluntario a Saksi manipud Europa ti nagdardaras a timmulong kadagiti Kristiano a kakabsatda idiay Africa. Naipasdek dagiti nakaur-urnos a kampo ken ospital para kadagiti nagbakuit a kakabsatda a taga-Rwanda. Nagadu a kawes, ules, taraon, ken literatura a naibasar iti Biblia ti naipatulod tapno makatulong iti nasurok a 7,000 a nagbakuit​—a dandani mamitlo iti bilang idi dagiti Saksi ni Jehova idiay Rwanda.

 ▪ Dua a tawen kalpasanna, bimtak ti gubat iti makindaya a rehion iti Democratic Republic of Congo idi 1996. Nadadael dagiti apit, natakaw dagiti reserba a taraon, ket saan a makadanon dagiti abasto. Maminsan laeng iti maysa nga aldaw a mangan ti kaaduan, isu a rimsua ti malnutrision ken sakit. Nagtignay a dagus dagiti Saksi ni Jehova idiay Europa. Maysa a mangsaranay a grupo dagiti Saksi a timmulong, agraman dagiti doktor, ti nageroplano a nagawit iti agas ken kuarta. Idi Hunio 1997, nagidonar dagiti Saksi idiay Belgium, Francia, ken Switzerland iti 500 a kilo nga agas, 10 a tonelada nga aduan protina a biskuit, 20 a tonelada a dadduma pay a taraon, 90 a tonelada a kawes, 18,500 a paris a sapatos, ken 1,000 nga ules​—nga aggatad iti dandani $1,000,000.

▪ Malaksid iti panangpennekda iti material a kasapulan, ad-adda pay nga interesado dagiti Saksi ni Jehova a tumulong kadagiti tattao iti naespirituan. Daytoy ti makagapu a kayatda ti agibangon kadagiti Kingdom Hall a mabalin a pagadalan dagiti tattao iti kinapudno nga isursuro ti Biblia. Kastoy ti naipadamag idi 1997: “Babaen iti tulong dagiti kakabsatda iti dadduma pay a pagilian, nakatulongen ti [Watch Tower] Society a nagibangon iti 413 a baro a Kingdom Hall ken nangtarimaan ti 727 pay iti uppat la a bulan iti 75 a nadumaduma a pagilian.” Kastoy ti naipadamag idi 2003: “Ti Romania, a sadiay 124 a Kingdom Hall ti naibangon sipud idi Hulio 2000 ket maysa kadagiti pagilian iti Europa a natulongan daytoy nga urnos a tumulong iti panagibangon kadagiti Kingdom Hall iti pagpagilian a bassit ti makukuartada. Babaen iti panagusarda iti agpapada a disenio iti dandani amin a Kingdom Hall-da, nakaibangon ti Ukraine iti 61 idi tawen 2001 ken 76 pay idi 2002. Babaen kadagiti kuarta a naidonar iti Kingdom Hall Fund, ginasut a Kingdom Hall ti naibangonen idiay Bulgaria, Croatia, Macedonia, Moldova, Russia, agraman Serbia ken Montenegro.”

[Dagiti Ladawan]

Croatia

Bulgaria

Romania

[Ladawan iti panid 7]

Maysa a boluntario a mangay-aywan iti dua nga ulila a nagbakuit

[Credit Line]

© Liba Taylor/Panos Pictures

[Ladawan iti panid 10]

Irakrakurak dagiti Saksi ni Jehova ti mensahe ti namnama

[Ladawan iti panid 10]

Ti Pagarian ti Dios pukawennanto ti kinapanglaw