Ad-adu a Pagpilian, Saan a Makapnek?

DAGITI Americano ita ket addaan iti “ad-adu a pagpilian iti ad-adu a benneg ti panagbiagda ngem idi,” kuna ti maysa nga artikulo iti magasin a Scientific American. Agpayso dayta no maipapan kadagiti tagilako, serbisio, panggedan, ken uray personal a relasion. Kasla nainkalintegan a namnamaen a gapu ta dakdakkel ti wayawayatayo nga agpili, ad-adda a mapnektayo iti biag. Ngem nakaskasdaaw ta masansan a saantayo a mapmapnek. Kasano a kasta?

Sigun iti artikulo, ti kababalin maipapan kadagiti pagpilian apektaranna ti kinaragsak. Kas pagarigan, dadduma ti mangbusbos iti kaaduan a tiempo ken panagreggetda nga agpili iti kasayaatan a tagilako babaen ti siaannad a panangbasada iti etiketa ken panangsukimatda kadagiti baro a produkto, sada idilig ti gatangenda iti gatgatangen ti dadduma. Dadduma nga aggatang “kalkalainganna ti pilienda,” uray no mabalin nga adda dagiti nasaysayaat a pagpilian. Dagita a tattao saandan nga agsapul no nakasarakdan iti tagilako a mangpennek kadagiti kasapulanda.

Nalawag a para kadagidiay kanayon a ti kasayaatan ti kayatda, marigatanda nga agdesision no umad-adu ti pagpilianda. Kalpasanna, inton agpilida, sigun iti Scientific American, “madanaganda iti napilida ta awan tiempoda a nangsukimat a naimbag iti dayta.” Pagbanaganna, dagita ti “awanan pannakapnek iti biag ken saanda a naragsak. Negatiboda met ken ad-adda a maldaangda.” Ania ngay ti masursurotayo? Sigun iti artikulo, “adda pamatiantayo a ti nagadu a pagpilian adda pakainaiganna ti makagapu iti kinaadu dagiti saan a naragsak iti moderno a kagimongantayo.”

Ngem sigun kadagiti managsirarak, mabalintay a kissayan ti rigat a nainaig iti panagpili. Kasano?

● Mabalinmo a kedngan dagiti pagpiliam no saan a napateg unay ti gatangem. Kas pagarigan, ikeddengmo a sumagmamano laeng a tiendaan ti papanam no gumatangka iti kawesmo.

● Piliem daydiay kapkapnekam imbes nga agsapulka iti ‘kasayaatan’ a narigat met a biroken. Kalpasanna, saanmon a pampanunoten dayta.

● Saanmo a sangkapanunot dagiti kasla makaay-ayo a paset dagiti nagpiliam a saanmo nga inkankano. Ipamaysam a panunoten dagiti pagimbagan ti napilim.

● Adda kadawyan a pagsasao a “dika unay a mangnamnama, tapno dika maupay.” Ngem nainsiriban dayta a balakad no kayatmo nga ad-adda a mapnekka iti biag.

[Credit Line iti panid 8]

Naadaw manipud iti Scientific American