Lubong nga Awanan iti Bisin?

PANUNOTEM no ania ti rikna ti maysa nga ama no makitana nga agsagaba ti annakna iti malnutrision. Maladingitan unay. No kasta ti rikna ti natauan nga ama, panunotem ti rikna ti nailangitan nga Amatayo. Pagaammona unay ti panagsagaba ti nagadu a makapaspasar iti kastoy a kasasaad.

Agpapan pay iti naimbag a panggep ti sangatauan a mangipaay iti taraon kadagiti mabisbisin ditoy lubong, iti pangrugian ti maika-21 a siglo, umad-adu latta dagiti mabisbisin. Nupay kasta, ti nailangitan nga Amatayo, a ni Jehova, kabaelanna a pukawen ken agtignayton a mangpukaw iti bisin iti agnanayon. Kasano nga ammotayo?

Inlawlawag ti Biblia nga idi inkabil ti Dios da Adan ken Eva iti minuyongan ti Eden, impaayna ti amin a kasapulanda tapno natalged ti kasasaadda, kontentoda, ken nasayaat ti pannakataraonda. Imbaga ti Dios kadakuada: “Intedko kadakayo ti isuamin a mulmula a mangpataud iti bukel nga adda iti rabaw ti intero a daga.” Ti panggep ni Jehova para kadagiti annak ni Adan ken Eva isu ti ‘panangpunnoda iti daga’ ken maaddaan ti intero a sangatauan iti aglaplapusanan a naimas a taraon.​—Genesis 1:28, 29.

Nupay immalsa ti immuna nga agassawa iti Namarsua kadakuada ken napukawda ti pamendisionna, saan a nagbalbaliw ti orihinal a panggep ti Dios para iti sangatauan. Ti Biblia awaganna ni Jehova a “Daydiay mangted iti tinapay kadagidiay mabisin,” ken addaan iti nagadu a padto a mangipasimudaag a pukawennanto ti amin a parikut a mainaig iti pananggun-od iti taraon.​—Salmo 146:7.

Idi dagiti adalan ni Jesus nagkiddawda kenkuana iti pagilasinan wenno pammaneknek, a mangipamatmat no kaanonto nga ipasdekna ti Pagarianna ken makibiang kadagiti aramid ditoy daga, imbinsabinsa ni Jesus dagiti kasasaad a mapasamak sakbay ti pannakibiangna. Maysa kadagita ti “kinakirang ti taraon.” Ti panangamiris a naimbag kadagiti sasao ni Jesus patalgedanna kadatayo nga asidegen nga agpatingga ti panagsagaba ti sangatauan. *​—Mateo, kapitulo 24.

Maipapan iti Paraiso nga ipasdekto ti Dios, impadto ti Salmo 72:16: ‘Addanto ti naruay a bukbukel iti daga; iti tapaw dagiti bantay addanto ti panaglaplapusanan.’ Iti nagkauna nga Israel, kadawyan a maimulmula ti trigo kadagiti tanap. Kaskasdi, iti bendito a kasasaad a nailadawan iti daytoy a padto, dagiti bukel a naimula uray kadagiti natikag, namaga, ken saan a nadam-eg a daga​—a kadawyan a saan nga agbunga​—addaandanto iti nawadwad a bunga. “Idi panawen ti Mesias,” kinuna ti maysa nga eskolar ti Biblia, “kayariganna a kasla agpayapay dagiti trigo ti sadinoman a lugar, uray iti pantok dagiti bantay wenno arigna nabangkag dagiti turod agingga iti tapaw, tapno ti intero a daga maabbungotan iti agpayapay, makaay-ayo nga apit.”

Anian a naiduma ti masanguanan nga impadto ti Biblia ken ti kasasaad ti nagadu a tattao itatta! Kinapudnona, iti masanguanan nga inkari ti Dios, ‘ti daga sigurado nga ipaaynanto ti bungana; ti Dios, a Diostayo, bendisionannatayto.’​—Salmo 67:6.

No kayatmo a maammuan no kasano a masagrapmo a kadua dagiti ipatpategmo dagitoy ken ti adu pay a banag a nailadawan kadagiti makapabileg a padto ti Biblia, dika bumdeng a makiuman kadagiti Saksi ni Jehova iti lugarmo wenno agsurat iti maitutop nga adres iti panid 5 daytoy a magasin.

[Footnote]

 [Ladawan iti panid 10]