Manipud Kadagiti Agbasbasa

Panagsikor Naintiempuan unay kaniak ti serye a “Bang-ar Manipud iti Panagsikor!”! (Pebrero 8, 2005) Dimteng dagiti artikulo idi impagarupko no agbagtitakon gapu laeng ta saan nga umiso ti panangdaerko iti panagsikor. Dagiti singasing nga impaayyo nagdakkel ti naitulongda iti biagko.

Dina insurat ti naganna, Estados Unidos

Nabiit pay a naammuak nga addaanak iti depression. Isu a makaliwliwa kaniak ti imbagayo a, “nasayaat no asikasuem dagiti kasapulam.” Apresiarek unay ti ilustrasion a nadakamat maipapan iti panangpunnotayo iti ‘personal a bankotayo.’ Nariknak idi a kasla awanen ti pategko, ngem manipud ita pagreggetakon nga ammuen dagiti limitasionko.

Y. O., Japan

Kaaw-awidko manipud iti maysa a seminar a nangiparangak iti ababa a presentasion no kasano a daeran ti panagsikor. Nabaelak nga ipakaammo dagiti makagapu ti panagsikor ken dagiti epektona, agraman ti mabalin nga aramiden​—nga amin dagitoy ket naibasar iti daytoy nagsayaat a magasin!

J. L., Alemania

Dagiti Cell Phone Pagyamanan gapu iti artikulo a “Ti Cell Phone​—Gayyem Wenno Kabusor?” (Pebrero 8, 2005) Agtawenak iti 14, ket agdepdependeak unay iti cell phone-ko. Tinulongannak ti artikulo a mangtarus a saan koma a ti cell phone ti kapatgan iti biagko, nangruna no panunotek dagiti posible a pagdaksanna iti salun-atko. Pagyamanan kadagiti makapainteres nga artikuloyo.

M. B., Romania

Dagiti Harp Seal Kayatko nga iyebkas ti naimpusuan a panagyamanko iti makaparagsak ken makaisuro nga artikulo iti Agriingkayo! Kalpasan ti panagbasak iti artikulo a “Dagiti Urbon iti Niebe Idiay Magdalen Islands,” talaga a nasursurok nga ayaten dagitoy nakaay-ayat nga animal. (Enero 8, 2005) Dagiti retrato ti nakatulong kaniak a nangtarus iti makapainteres a padron ti panagdakkelda. Malaksid a natignayak nga agyaman ken Jehova, a nangparsua kadagitoy nga animal, daytoy nga artikulo ti nangpabileg iti tarigagayko nga agbiag idiay Paraiso. Addaanak iti sumagmamano a makapasikor a parikut, ket kurang ti sasao a mangiladawan iti pannakaparegtak iti daytoy makaparagsak nga artikulo. Pangngaasiyo ta itultuloyyo ti agipablaak kadagiti kastoy nga artikulo.

N. S., Japan

Dagiti Kabalio Marino Naawatko ti magasinyo manipud kadagiti Saksi ni Jehova, ket kayatko nga iyebkas ti panagyamanko gapu iti artikulo a “Dagiti Agsalsala a Kabalio Marino iti Baybay.” (Disiembre 22, 2004) Nabiit pay a nakaawatak iti kangatuan a grado gapu iti proyektok iti eskuelaan maipapan kadagiti kabalio marino kalpasan nga inusarko dagiti impormasion iti artikuloyo. Gapu iti magasin nga Agriingkayo!, ad-adu ti nasursurok maipapan iti siensia ken teknolohia​—ken nangnangruna maipapan iti Dios. Pagyamanan kadakayo a Saksi ni Jehova kadagiti nagsayaat a magasinyo!

T. P., Indonesia

Naisurat . . . Maragsakanak unay ta nabasak ti artikulo a “Naisurat nga Agkitakaminto”! (Disiembre 22, 2004) Agtawenak iti 11 ket agingga ita, diak maitured nga ibaga iti sabsabali ti maipapan iti Pagarian ti Dios. Ngem kalpasan a nabasak ti pakasaritaan ni Rosalía Phillips, naamirisko a tulongannak ni Jehova. Kayatko ti agbalin a natured nga agibumbunannag iti naimbag a damag a kas ken Rosalía.

P. P., Poland

Agtawenak iti 27, ket 24 a tawenen ti napalabas sipud idi pimmusay ni nanangko. Sipud idi nagbalinak a maysa kadagiti Saksi ni Jehova, natibker ti namnamak nga agkitakaminto manen. Agyamanak gapu kadagiti artikulo a kas iti daytoy. Agyamanak met ken Jehova, iti Agriingkayo!, agraman ken Rosalía gapu iti panangiranudna kadakami iti napintas a kapadasanna.

A. F., Venezuela