“Daytoy ti Organisasion ni Jehova”

Maysa a pamilia idiay Finland a medio nabayag metten a makitimtimpuyog kadagiti Saksi ni Jehova ti binusor ti adu a tattao. “Panguartaandakayto,” impakdaar dagiti tattao. Kinuna ti dadduma, “Mapukawyonto ti pagtaenganyo.” Iti maysa a rabii, naiparna met a nauram ti pasdek nga ayan ti sistema a mangpaimeng iti balay ti pamilia​—makapaladingit unay dayta a pasamak iti makin-amianan a lugar a nakalamlam-ek ti paniempona.

Saan nga immanay ti imbayad ti insurance iti magastos tapno maibangon manen dayta. Gapu iti uram, kasla agpayso dagiti nakaam-amak a pakpakauna. Masnaayan a kinuna ti ama dayta a pamilia, “Talaga a naupaykami.” Nupay kasta, intuloy latta ti agassawa ti planoda nga agpabautisar tallo laeng a lawas kalpasanna.

Naamiris ti kongregasion iti lugarda a gundawayda itan nga iyaplikar ti pammalakad ti Biblia: ‘Annak, agayattayo koma, saan nga iti sao wenno babaen iti dila, no di ket iti aramid ken kinapudno.’ (1 Juan 3:18) Rinugian dagiti agkakapammatian nga iplano ti pannakatarimaan ti pasdek. Adda met praktikal nga imbalakad ti sanga nga opisina dagiti Saksi ni Jehova idiay Finland no kasano a maibanag ti plano. Naaramid dagiti balabala, naipagna dagiti permiso tapno maibangon ti pasdek, nailista dagiti kasapulan a materiales, ken nakiddaw ti tulong dagiti boluntario.

Iti agarup makabulan kalpasan ti uram, katiboken ti trabaho. Iti Mierkoles, dagiti Saksi iti dayta a lugar rinebbada ti tedda ti nauram a pasdek. Iti Biernes, babaen iti tulong dagiti Saksi iti dadduma pay a kongregasion, naibangonen ti balabala ti baro a pasdek. Idi nagudong ti ama dayta a pamilia, nasabatna ti maysa nga opisial iti lugarda a nangdamag no inabbonganna iti lona ti atep tapno masalakniban ti nadadael a pasdek manipud iti tudo. “Saan apo, diak inabbongan iti lona,” insungbat a siraragsak ti ama, “ngem adda 30 a lallaki iti atep!”

Iti Sabado, dandani 50 a naggagaget a kapammatian ti immay iti matartarimaan a pasdek. Naragsakanda iti pribilehioda a tumulong. Kastoy ti kinuna ti maysa a kaarruba a timmulong met: “Idi rabii, pinampanunotko a nagpaidumakayo a tattao! Talaga nga agsisinnakit ken agtitinnulongkayo.”

Iti dayta a rabii, nairingpas ti trabaho. Ti baro a pasdek ti nagserbi kas nalawag a sungbat kadagiti mangidumduma a pakdaar iti dayta a pamilia. Kastoy ti malagip ti maysa a panglakayen iti kongregasion idi isu ken ti ama dayta a pamilia ti timmakder a nangbuya iti imbangonda: “Maragsakanak unay idi sallabayek ti kababautisar a kabsattayo sa kinunak, ‘Daytoy ti organisasion ni Jehova.’”

[Ladawan iti panid 31]

Nadadael iti uram

[Ladawan iti panid 31]

Kabayatan ti panangtarimaan