Determinado​—Nupay Addaan Depekto

Kas insalaysay ni Kouamé NʹGuessan

Inkagumaanmi iti kaduak nga isang-at ti bisikletami iti sabali pay a turod. Nobiembre 2002 idi, ket madama ti gerra sibil iti Ivory Coast, Africa. Isu a mabalin nga adu ti peggad iti awan matataona a kalsada. Iti pangadaywen, makapadanag ti masungadan a checkpoint wenno pagrekisaan dagiti soldado. Apay a masapul nga agbiaheak bayat daytoy a panawen ti rinnupak?

NAIPASNGAYAK idi 1978 nga addaan iti kumarkaro a sakit. Nangrugi dayta idi diak unay makangngeg ken makapakapuy ti panagut-ot dagiti gurongko. Bayat a dumakdakkelak, lalaisennak ti pamiliak. Ibagbagada nga ‘awan serserbi dagiti sakak sa dagiti lapayagko ket napullatan iti durek.’ Masimron dagiti natataengan kaniak, ket ipukpukkaw dagiti ubbing a pilayak ken nablo dagiti sakak.

Nageskuelaak idi agtawenak iti walo ket dagus nga inasingandak dagiti kaklasek ken mannursurok. Masansan a kayatko nga agnganga koman ti daga tapno alun-onennakon. Gapu ta madlawda a maamakak, pagaangawandak dagiti tattao. Pumanawak laeng iti balay no mapanak ageskuela.

Im-imtuodek idi iti bagik, ‘apay a nagsakitak iti kastoy?’ Imbaga ni Nanang nga adda nangkulam kaniak. No dadduma, makakitaak kadagiti addaan met iti kastoy nga an-annayen isu a pampanunotek, ‘Kayat kadi a sawen dayta a nakulamda met?’

Idi 1992, napalalo ti panagut-ot dagiti sikok. Idi naep-ep, diak maunnaten dagiti takkiagko. Dua a tawen kalpasanna, saanen a makakita ti makinkannigid a matak. Impaagasdak dagiti nagannak kaniak kadagiti erbolario ngem saanak nga immimbag. Kapilitan a simmardengak nga ageskuela gapu ta kumarkaro ti sakitko.

Panangbirok Kadagiti Sungbat

Inawisnak ti relihioso a kaklasek a makimisa. Dimmakkelak nga animista. * Nupay kasta, nakimisaak iti makatawen. Sadiay a nakasursuroak bassit maipapan iti Biblia, isu a pinampanunotko no adda aniaman a pagimbagan ti pannakimiembro iti maysa a relihion.

Maamakak iti dadduma a doktrina ti simbaan, nangruna iti umap-apuy nga impierno. Diak maaklon a dakesak unay tapno maikariak iti agnanayon a pannakatutuok. Ngem diak met mamati a naimbagak tapno agbiagak nga agnanayon iti kinaragsak idiay langit. Tangay awan dagiti makapnek a sungbat kadagiti saludsodko, saanakon nga interesado iti relihion.

Iti simmaganad a tawen, naawisak iti maysa a sesion ti panagpaagas idiay Abidjan, a kabesera ti Ivory Coast, agarup 150 a kilometro manipud  iti bassit nga ilimi a Vavoua. Sakbay a nagbiahekami, imbagak kadagiti panguluen ti simbaan nga awan kuartak a pagbayadko iti taraon ken iti iseserrekko. Imparipiripda a maaywananak idiay Abidjan, ngem saan met gayam. Nupay addaak iti tengnga ti dakkel a bunggoy nga adda iti nagbaetan ti 40,000 ken 50,000, mariknak nga agmaymaysa ken malidlidayak. Awan ti uray maysa a naseknan kaniak.

Idi nagawidak idiay Vavoua, saanak laengen a masaksakit no di ket naupayak payen. Imbaga kaniak dagiti lider ti simbaan iti lugarmi a saanak nga immimbag ta kurang ti pammatik iti Dios. Kalpasan dayta, saanakon a pulos a nakitimpuyog iti relihion.

Naliwliwa iti Naespirituan Kamaudiananna

Idi 1996 sinarungkaran ti maysa a Saksi ni Jehova ti pamiliami. Awan pay a pulos idi ti nakasaritak a Saksi, ngem dimngegak iti naragsak a saritaan ni manongko ken ti bisita. Saan nga interesado ni manongko, ngem interesadoak. Naipasagepsep iti pusok ti amin nga imbaga ti Saksi.

Inlawlawag ti Saksi a simrek ti basol iti natauan a pamilia gapu iti panagsukir ti immuna a tao. Dayta nga iyaalsa ket nagbanag iti kinaimperpekto ken ipapatay ti intero a sangatauan. Nupay kasta, impaay ni Jesus ti biagna kas subbot tapno mapakawan dagiti basoltayo ken masagraptayo ti biag nga agnanayon. (Roma 3:23; 5:12, 17-19) Kasta met nga impakita ti Saksi manipud iti Biblia nga asidegen a pagbalinen ni Jehova a Dios ti daga a maysa a paraiso ken pukawenna ti basol ken amin a pakarigatan a resulta dayta babaen iti Pagarianna.​—Isaias 33:24; Daniel 2:44; Apocalipsis 21:3, 4.

Dakkel ti epekto kaniak dagiti nainkalintegan a pannursuro ti Biblia. Inyurnos ti Saksi a naam-ammok idi agangay nga agnagan Robert, nga iyadalannak iti Biblia mamindua iti kada lawas. Iti sumagmamano la a bulan, babaen iti baro a pannakaammok iti Biblia, kualipikadoakon a kumuyog kadagiti Saksi iti ministerioda a panagbalaybalay. Makakarit daytoy, ta masapul a daerak ti panagbutengko a makipulapol.

Rimsua Dagiti Lapped

Saan a magustuan ti pamiliak ti panagadalko iti Biblia. Tapno rurodennak, agsigarilio ni manongko iti kuartok no rabii, isu nga iti agsapa, agsakiten ti ulok ken madin ti riknak. Ti taraonko ti sabali pay a pakarigatak. Napeklan a mangnganup ni Tatang, ket ti karne a maanupanna ti kangrunaan a sidaenmi. Inlawlawagko kenkuana nga iparit ti Biblia ti pannangan iti karne dagiti di napadara nga animal. (Aramid 15:28, 29) Kaskasdi a saanna a kayat a padaraen dagiti animal. No dadduma, ibatiannak ni Nanang iti innapuy, ngem masansan nga awan ti maitutop a taraonko.

Nupay ti Kingdom Hall iti Vavoua ket adda iti sabali a deppaar ti ili, diak pulos impalubos a ti kaadayona wenno ti dakes a paniempo ti makalapped kaniak a makigimong. Nabautisaranak idi Setiembre 1997 iti “Pammati iti Sao ti Dios” a Kombension Distrito iti Ivory Coast. Idi agangay, inggaedko ti nakipaset iti Nakristianuan a ministerio agingga a kualipikadoakon nga agbalin a payunir, kas pangawag dagiti Saksi ni Jehova kadagiti amin-tiempo a ministroda.

Ad-adu Pay a Karit

Ti riribuk iti politika ket nagtungpal iti gerra sibil idi Setiembre 2002. Iti sumagmamano la a lawas, ti buyot ti nasion ket umad-adanin iti Vavoua. Gapu iti panangyalikakada iti biagda, pimmanaw ti dadduma a tattao, agraman ti kaaduan a Saksi ni Jehova. Lima nga aldaw kalpasan dayta nga ipapanaw, dagiti soldado sinakupda ti ili ket dagus nga imparitda ti amin a panagtitipon ti kagimongan. Gapuna, nasinasina ti kaaduan nga umili ti Vavoua, agraman dagiti nabatbati a Saksi.

Tangay awan pangpubliko a lugan, adu a kilometro ti masapul a pagnaen ti tattao tapno makadanonda kadagiti kabangibang nga ili. Diak makapagna iti adayo, isu a sisiak ti Saksi a nabati idiay Vavoua. Intultuloyko ti nangasaba, ken inangayko  dagiti gimong ti kongregasion a tinabunuan ti dadduma a kailiak.

Panangikagumaak a Makiasamblea

Nayeskediul iti Nobiembre ti aldaw ti espesial nga asamblea dagiti Saksi ni Jehova iti ili ti Daloa. Nagkararagak ken Jehova. Imbagak a kayatko ti tumabuno. Pagammuan ta nagsubli ti maysa a Saksi a pimmanaw idi iti ili. Kiniddawko no mabalin nga agbisikletakami a mapan iti pagasamblean nga agarup 50 a kilometro ti kaadayona. Dagus nga immanamong, nupay addaan met kadagiti nakaro nga an-annayen.

Madanagan ti kaaduan a tattao, isu a saan a nasayaat ti agbiahe iti kastoy a tiempo. Naparitan dagiti lugan nga aggapu iti Vavoua a mapan iti Daloa. Mabalin a mapagsuspetsaan ti biahero a dida am-ammo ken mabalin a papatayen ti soldado ti agkalaban a grupo babaen iti masinggan. Nupay kasta, iti agsapa ti Sabado, Nobiembre 9, 2002, nagbisikletakami a pimmanaw iti Vavoua ket napankami idiay Daloa, kas nadakamat iti pangrugian.

Di nagbayag, dimtengkami iti umuna kadagiti adu a pagrekisaan dagiti militar. Naan-anay a rinekisadakami sadakam pinalubosan nga agtultuloy. Nawatiwat ken makabannog ti biahe. Nagnakami agingga iti tapaw ti turod, ket idi nakadanonkamin iti alimpatok, nagbisikletakami ken in-inut a simmalog a di agpedpedal.

Idi agangay, adda sabali a siklista a timmulong kadakami. Nagtugawak iti bassit a kargadera iti likudan ti bisikletana. Bayat ti panagpedal ti naasi nga estranghero, ginundawayak ti nakisarita kenkuana maipapan iti Pagarian ti Dios. Inlawlawagko a nailangitan ti gobierno ti Dios ket asidegen nga iyegna ti manayon a talna ditoy daga. Nasdaaw iti ibagbagak ket nagadu ti dinamagna. Idi simmangpetkami idiay Daloa, inggatangannakami iti taraon ken inkarina a tumabuno iti espesial nga asamblea kabigatanna.

Adalemen ti rabii idi simmangpetkami idiay Daloa a nabannog ngem naragsak ta nakadanonkamin iti destinasionmi. Narigat ti siam nga oras a biahemi. Sibabara a pinasangbaynakami ti maysa a pamilia a Saksi iti dayta a lugar ket insingasingda a makipagnaedkami kadakuada agingga a medio kalmadon ti kasasaad ti politika. Ngem nakalkaldaang ta masapul a makanselar ti asamblea gapu iti riribuk iti politika. Nupay kasta, makagunggona latta ti biahe. Gapu iti dayta, naaddaanak kadagiti kanayonan a pribilehio nga agserbi kadagiti padak a Kristiano idiay Daloa.

Nangyeg iti Adu a Bendision ti Determinasion

Okupadoak itan kas ministerial nga adipen ken regular pioneer iti kongregasion ti Daloa. Tumultulongak met a mangmantener iti Assembly Hall dagiti Saksi ni Jehova iti Daloa. Tapno masuportarak ti bagik, agaramid ken aglakoak kadagiti kayo a dekorasion a sinan kulibangbang ken agpintaak met kadagiti karatula.

Iti adu a tawen, pumanawak laeng iti balaymi no mapanak ageskuela, ngem sipud idin, nakapagdaliasatakon iti adu a kilometro nga agbirbirok kadagiti mawaw iti kinapudno maipapan iti gapu no apay nga agsakit ken agsagabatayo. Bayat nga ur-urayek ti Pagarian ti Dios a mangpukaw iti amin nga an-annayen, itultuloyko nga iranud kadagiti tattao iti Ivory Coast ti makaliwliwa a naimbag a damag maipapan kadagiti panggep ti Dios.

[Footnote]

[Ladawan iti panid 13]

Iti dalan a mapan iti Daloa tapno makiasamblea

[Ladawan iti panid 13]

Tumultulongak a mangasikaso iti Assembly Hall idiay Daloa

[Ladawan iti panid 13]

Tapno masuportarak ti bagik, agaramid ken aglakoak kadagiti kayo a dekorasion a sinan kulibangbang