Ti Panangmatmat ti Biblia

Ipangpangruna Aya ti Dios ti Dadduma a Nasion Ngem iti Sabsabali?

ADU ti mamati nga ipangpangruna ti Dios ti nasionda ngem iti sabsabali. Ngem no makiddaw ti ebidensiada, ania ngay ti maibagada? Nalabit dakamaten ti dadduma dagiti nadakamat iti historia a gapuanan ti nasionda​—kas kadagiti balligi iti militar wenno irarang-ay ti ekonomiada. Nalabit dakamatenda pay dagiti naballigi a programa a nairanta a mangtaraon kadagiti mabisin, mangsalaknib kadagiti daksanggasat, wenno mangitandudo iti hustisia ken awan panangidumdumana a panangtrato. Kuna pay ti dadduma nga ipangpangruna ti Dios ti pagilianda gapu iti kinapintas ti nakaparsuaan sadiay.

Iti amin a lugar, gagangayen dagita a panangipannakkel iti pagilian. Ngem anamongan aya ti Biblia ti kapanunotan nga adda nasion nga ipangpangruna ti Dios ngem iti sabsabali?

Napateg a Galad ti Dios

Nalawag ti sungbat no anagentayo ti ipaganetget ti Biblia a napateg a galad ti Mannakabalin-amin a Dios. Saan a mangidumduma ti Dios. Kas pagarigan, kastoy ti nalawag a kuna ti Aramid 10:34: “Ti Dios saan a mangidumduma.” Kuna pay ti Biblia a ni Jehova a Dios “awan tratuenna buyogen ti panangidumduma” ken ni “Jehova a Diostayo awan kinakillo wenno panangidumduma.” (Deuteronomio 10:17; 2 Cronicas 19:7) Kagura ti Dios ti panangidumduma; ibilangna pay ketdi a dakes dayta.

Ngem nalabit pampanunotenyo: ‘Saan aya nga impangpangruna ti Dios ti kadaanan a nasion ti Israel ngem iti dadduma a nasion? Saan kadi nga ebidensia dayta ti panangidumdumana?’ Agpayso a pinili ti Dios ti nasion ti Israel idi panawen ti Biblia, ken sinalaknibanna pay dagiti Israelita iti sumagmamano a pannakigubatda iti dadduma a nasion. Kastoy pay ti ibagbaga ti Biblia maipapan iti Dios: “Ibagana ti saona ken Jacob, dagiti alagadenna ken dagiti hudisial a pangngeddengna iti Israel. Saanna nga inaramid ti kasta a wagas iti aniaman a sabali pay a nasion.” (Salmo 147:19, 20) Ngem ti aya pannakilangen ti Dios iti Israel ti mangipasimudaag nga isu ket mangidumduma? Saan a pulos. Usigenyo ti tallo a rason.

Umuna, pinili ti Dios ti Israel tapno magunggonaan ti amin a nasion. Kastoy ti kinunana idi nakitulag ken Abraham, ti inapo dayta a nasion: “Babaen ti bin-im pudno unay a dagiti amin a nasion iti daga bendisionandanto ti bagbagida.” (Genesis 22:17, 18) Wen, nakilangen ti Dios iti Israel tapno mapataud ti “bin-i” a mangyeg iti dadakkel a bendision, saan laeng nga iti umili ti maysa a nasion no di ket kadagiti tattao iti “amin a nasion iti daga.”

Maikadua, saan a pulos a limitado dagiti bendision ti Dios kadagiti umili ti Israel. Gapu ta saan a mangidumduma, inikkanna iti gundaway ti dadduma a nasion a makikaduada iti pinilina a nasion tapno agdayaw kenkuana. (2 Cronicas 6:32, 33) Adu ti immawat iti dayta nga awis isu a nabendisionanda. Ti Moabita a ni Ruth ket maysa laeng kadagiti nalatak a pagarigan.​—Ruth 1:3, 16.

Maikatlo, temporario ti naisangsangayan a relasion ti Dios iti naindagaan nga Israel. Idi 29 K.P., pinataud ti Israel ti naikari a “bin-i” babaen iti Mesias a ni Jesu-Kristo. (Galacia 3:16) Ngem inlaksid dagiti kailianna kas ti Mesias. Kastoy ti imbagana maipapan kadakuada: “Adtoy! Ti balayyo mabaybay-an kadakayo.” (Mateo 23:38) Kalpasanna, ti pannakilangen ti Dios iti sangatauan ket naiduman iti tunggal nasion ti lubong ken kadagiti panagrurupakda. Ngem gapu ta saan a mangidumduma, pinagbalinna a posible a masagrap ti intero a sangatauan dagiti bendisionna. Usigenyo ti sumagmamano a pagarigan.

 Dagiti Sagut ti Dios iti Amin

Ti subbot a sakripisio ni Jesu-Kristo ti kadakkelan a sagut ti Dios iti tao. (Roma 6:23) Gapu iti dayta, mawayawayaantayo manipud iti basol ken ipapatay. Dayta ti nangted kadatayo iti gundaway nga agtawid iti agnanayon a biag. Daytoy a sagut ti agpaay kadagiti tattao “manipud iti tunggal tribu ken pagsasao ken ili ken nasion.” (Apocalipsis 5:9) Wen, kayat ti Dios a “tunggal maysa a mangwatwat iti pammati” ken Jesus ket maaddaan iti “agnanayon a biag.”​—Juan 3:16.

Ti naimbag a damag maipapan iti Pagarian ti Dios ti mangyeg iti adu a bendision kadagidiay mangipangag. (Apocalipsis 14:6, 7) Mangipaay dayta iti namnama iti masanguanan ken nainsiriban a balakad nga ad-adda a mangparagsak iti biag uray pay ita. Gapu ta saan a mangidumduma ni Jehova, inyurnosna a “daytoy naimbag a damag ti pagarian maikaskasabanto iti intero a mapagnaedan a daga a maipaay a pangsaksi kadagiti amin a nasion.” (Mateo 24:14; 28:19, 20; Aramid 16:10) Dayta a naimbag a damag ti linaon ti Biblia, ti libro a mabasa​—nupay kapasetna laeng ti dadduma​—iti nasurok a 2,300 a pagsasao. Kas naayat nga Ama, pinagbalin ni Jehova a posible a magun-odan ti dandani tunggal tao ditoy daga ti “sasao ti agnanayon a biag.”​—Juan 6:68; Josue 1:8.

Dagitoy ken ti dadduma pay a sagut ti Dios ket magun-odan ti amin​—wen, dagiti tattao iti amin a nasion, puli, ken pagsasao. No kasta, ti pananggun-od iti anamong ken bendision ti Dios ket saan nga agpannuray iti lugar a nakayanakantayo wenno pulitayo.

Siasino Dagiti Anamongan ti Dios?

Ania ngarud ti nasken nga aramidentayo tapno anamongannatayo ti Dios? Kastoy ti insungbat ni apostol Pedro: “Iti tunggal nasion anamonganna ti tao nga agbuteng kenkuana ken agaramid iti kinalinteg.” (Aramid 10:34, 35) Nalawag a saan nga umdas ti basta panagbalintayo nga interesado iti Dios ngem awan met ti ar-aramidentayo. Nasken a patanorentayo ti napasnek a panagayattayo iti Dios, a pagamkantayo a mapaguratayo. Nasken met nga ‘agaramidtayo iti kinalinteg’ wenno sireregta nga aramidentayo ti naimbag iti imatang ti Dios.

Kas pagarigan: Iti adu a lugar, mabalin ti ageskuela kadagiti pagadalan a kukua ti gobierno, ngem dagidiay laeng sumrek ken agadal a sipapasnek ti magunggonaan. Umasping iti dayta, naidiaya iti amin ti anamong ti Dios, ngem masapul nga agreggettayo. Ti kasta a panagregget ramanenna ti regular a panagbasa iti Biblia, panangipakita iti pammati iti subbot a daton ni Kristo, ken panagbiag a maitunos kadagiti prinsipio ti Biblia. No pudno a ‘birokentayo ni Jehova,’ agbalintayto a maysa kadagiti anamonganna.​—Salmo 105:3, 4; Proverbio 2:2-9.

[Ladawan iti panid 15]

Ti Dios indiayana ti “sasao ti agnanayon a biag” kadagiti tattao ti amin a nasion