Kinaawan Pagtaengan​—Ania ti Solusionna?

“IKKAM iti ikan ti maysa a tao, ket mataraonam iti agmalem. Suruam nga agkalap, ket mataraonam inggat’ tungpal biagna.” Ilawlawag daytoy a pagsasao ti kinapudno a mabalin a limitado ti pateg ti basta panangpennek iti giddato a pisikal a kasapulan. Nasaysayaat pay ketdi a maisuro dagiti tattao no kasanoda a risuten dagiti parikutda ken biroken dagiti kasapulanda. Adu a tattao ti masapul a masursuruan kadagiti paglaingan a mamagballigi iti biagda wenno uray pay ketdi iti interamente a naiduma a panangmatmat ken wagas ti panagbiag.

Patien dagiti Saksi ni Jehova a ti kaepektibuan a pamay-an a panangtulong kadagiti awanan pagtaengan isu ti panangisuro kadakuada iti kasayaatan a wagas ti panagbiag. Kaipapanan daytoy ti panangyaplikar iti magun-odan a kasayaatan a balakad​—daydiay impaay ti Namarsua ti tao. Siasino pay koma ti nasaysayaat a mangted iti kasta a balakad? Ti balakadna ti tumultulong iti tattao a mangliklik kadagiti parikut nga agtungpal iti kinaawan pagtaengan. Dayta met ti tumultulong kadagiti nasingpet a tattao  nga awanan pagtaengan tapno marisut dayta. Siempre, saan a mapukaw ti amin a parikut a sarsarangtentayo babaen laeng iti panagbasa ti Biblia. Nupay kasta, ti Biblia ket makatulong kadagiti tattao a mangisardeng iti amin a naluho a bisio, maaddaan iti panagraem iti bagi ken nadaydayaw a biag.

Adu ti naawanan iti pagtaengan gapu iti panagdroga, panagbartek, panagbalinda a kriminal, parikut iti kuarta, wenno pannakasinasina ti pamilia. Mangted ti Biblia kadagiti praktikal a balakad kadagitoy amin a banag. Ti panangyaplikar kadagita a balakad ket nakatulongen iti riniwriw a tattao a mangbalbaliw iti panangmatmatda iti biag​—ken talaga a simmayaat ti intero a kinataoda. Siempre, saan a marisut ti amin a parikut a mainaig iti kinaawan pagtaengan babaen laeng iti panangannurot iti Nainkasuratan a balakad. Masapul ti dadduma a kita ti tulong tapno temporario a masolbar dagiti parikut maipapan kadagiti natural a didigra, an-annayen, sapasap a kinapanglaw, pannakaadikto, ken dadduma pay a parikut. Nupay ikagkagumaan dagiti Saksi ni Jehova a tulongan dagiti agsagsagaba kadagiti epekto ti kasta a rigrigat, mabigbigda a ti laeng Nangaramid iti sangatauan ti makasolbar a mamimpinsan kadagitoy a parikut. Solbarennanto ngata?

Ti Panggep ti Dios Idi Punganay

Nainkalintegan a namnamaen nga asidegen nga agpatingga ti kinaawan pagtaengan. Kasano? Amirisem: Nangipaay ni Jehova a Dios iti nagpintas a pagtaengan agpaay iti immuna a pagassawaan. Inkabilna ida iti maysa a paraiso, a kompleto iti amin a kasapulanda. No tinungpalda koma ti panangiwanwan ti Nangaramid kadakuada, napagbalinda koma a Paraiso ti intero a daga. Sinagrap koma ti annakda ti kinawadwad, ken nanam-ay a pagtaengan. Mabalin nga agiinnayat ken agtitinnulong koma ti tunggal miembro ti natauan a pamilia. Dayta ti panggep ti Dios idi punganay. Saan a nagbaliw ti panggepna.​—Salmo 37:9-11, 29.

Kasta met nga aniaman a pinanggepna, di bumurong a matungpalto. (Isaias 55:10, 11) Impadto ti Biblia a dumtengto ti tiempo a tunggal maysa maaddaanton iti bukodna a pagtaengan ken namaterialan a kinawadwad. Ipapantayon a sakbay a pumayso dayta, masapul a mabaliwan ti amin a kasasaad ti kagimongan ti tao ita. Mapasamak ti kasta a panagbalbaliw babaen ti pannakibiang ti Dios kadagiti aramid ti tao. Kasta ti pampanunoten ni Jesus idi imbagana kadagiti adalanna nga ikararagda: “Umay koma ti pagariam. Maaramid koma ti pagayatam, kas sadi langit, kasta met iti daga.”​—Mateo 6:9, 10.

Iti sidong ti nalinteg a panangituray ti Pagarian ti Dios, ti natulnog a sangatauan makitadanto ti kaitungpalan daytoy makaparagsak a padto: “Pudno unay a mangbangondanto iti balbalay ket agnaedda . . . Saandanto a mangbangon ket sabali ti agnaed; saandanto nga agmula ket sabali ti mangan. . . . Ti aramid dagiti bukodda nga ima usarento a naan-anay dagidiay pinilik.” (Isaias 65:21, 22) No kasta, awanton ti awanan pagtaengan.

Ikagkagumaan dagiti Saksi ni Jehova ti mangipaay iti naespirituan a tulong a kasapulan itan dagiti tattao. Tarigagayanda nga ipaay ti naayat nga atension nga insingasing ni Jesus. (Mateo 22:36-39) Gapu iti kasta a pannakaseknan, matignayda a tumulong kadagidiay naawanan iti pagtaengan gapu kadagiti natural a didigra. *

Kinapudnona, ammo dagiti Saksi nga imposible a matulongan ti amin. Maipapan kadagiti awanan pagtaengan, bigbigen ni Jacek a taga-Poland, nga agnanaed  iti pagtaengan a pasdek ti gobierno para kadagiti awanan pagtaengan: “Sumagmamano ti narungsot ken agdrogdroga. Dadduma dida kayat a pagsasaritaan dagiti narelihiosuan a banag, ta pagarupenda a saan a maseknan ti Dios kadakuada. Ngem adda dagidiay dumngeg iti Sao ti Dios.” Kas pagarigan, dimngeg ni Jacek. Adu pay ti nasursurona maipapan iti talaga nga isursuro ti Biblia.

Ni Roman, nga adda sakitna nga AIDS ken agnanaed idi iti kalsada, ti sabali pay a lalaki nga awanan pagtaengan a nangipangag. Malagipna: “Idi simmangpetak iti pagaywanan kadagiti nakurapay, diak ammo nga asideg laeng gayam ti paggigimongan dagiti Saksi ni Jehova. Di nagbayag, kinasaritadak iti kalsada sada inlawlawag a mangmangngeg ti Dios ti agpatpatulong nga ikkis dagiti awanan iti pagtaengan. Inawisdak met iti maysa kadagiti gimongda.”​—Salmo 72:12, 13.

Ania ti epekto kenkuana ti nangngegna? “Naammuak a mabalin nga agbiagak iti Paraiso a daga ken napategak iti imatang ti Dios. Gapu ta aduanakon kadagiti kabbaro ken manangipateg a gagayyem, insardengkon a panunoten ti kasasaadko ket rinugiak a balbaliwan ti personalidadko. Gapu iti panagayatko iti Dios, insardengkon ti agsigarilio ket inkarik kenkuana babaen iti kararag a magnaakon iti dalan ti kinalinteg.”

Rimmang-ay ti espiritualidad ni Roman ket di nagbayag, nabautisaran kas maysa kadagiti Saksi ni Jehova. Babaen iti tulong dagiti kapammatianna ken dagiti autoridad, nabaelanna ti immakar iti maitutop a pagdagusan. Siraragsak a kinuna ni Roman: “Diak mailadawan ti ragsakko. Immadaniak iti naayat a Dios, a nangisubli ti panggep ti biagko. Inikkannak iti nagsayaat a pamilia a buklen dagiti kakabsat a lallaki ken babbai agraman maysa a pagtaengan!”

Masakbayan Dagiti Awanan Pagtaengan

Ikagkagumaan dagiti Saksi ni Jehova ti makipagrikna iti amin a kaarrubada, agraman kadagiti awanan pagtaengan. Magagaranda a mangiranud kadagiti kinapudno ti Biblia maipapan iti nasaysayaat a masanguanan nga uray ita, mabalbaliwanda ti panagbiag.​—Juan 8:32.

“Daydiay napagbalin a killo saan a mapalinteg,” kuna ti Biblia. (Eclesiastes 1:15) Wen, nupay nasayaat ti panggep dagiti boluntario ken dagiti autoridad, narigat a pukawen dagita a nairamuten a parikut ti kagimongan kas iti kinaawan pagtaengan ken kinapanglaw. Nupay kasta, ipanamnama kadatayo ti Biblia nga asidegen a sagrapen ti amin a natulnog a tattao dagiti perpekto a kasasaad ti panagbiag iti sidong ti panagturay ti Pagarian ti Dios.

[Footnote]

[Ladawan iti panid 8]

Maysa a nagbakuit nga ina a naggapu iti Somalia a siiiggem iti kard a panggun-od iti rasion a taraon

[Credit Line]

© Trygve Bolstad/Panos Pictures

[Ladawan iti panid 9]

Kangrunaan iti amin, masapul dagiti awanan iti pagtaengan ti namnama iti masakbayan

[Dagiti Ladawan iti panid 10]

Iti sidong ti Pagarian ti Dios, awanton ti awanan pagtaengan