Manipud Kadagiti Agbasbasa

Inna Agyamanak iti nagpintas ti pannakaisuratna a serye a “Ti Akem Dagiti Inna kas Mannursuro.” (Pebrero 22, 2005) Talaga a natukay ken naparegtaak a mangtelepono a dagus ken nanangko apaman a nabasak dayta. Nagsolsolo ni nanangko a nangpadakkel kadakami ken manongko. Nangala pay ketdi iti nangatngato a kurso tapno masuportarannakami a naimbag. Siniertona a regularkami kadagiti Nakristianuan a gimong ken iti ministerio. Nagsayaat dagiti nagapuananna. Agyamanak iti panangipalagipyo iti nagsayaat nga ulidanna.

M. S., Estados Unidos

Naipalagip kaniak ti managsakripisio a panagregget ni nanangko a nangisuro kaniak iti naespirituan ken moral. Nupay binaybay-an ni tatangko iti emosional ken pinansial a wagas, insuronak ni nanangko nga ayatek ni Jehova. Pinaregtanak met nga agbalin nga amin-tiempo a managebanghelio. Tinagtagilag-anko idi ti panagregget ni nanangko, ngem kas insingasing ti serye, maikari a makomendaran. Nupay adayo, tineleponuak tapno agyamanak kenkuana!

C.H.K., Republic of Korea

Saanmi a kapammatian ni tatangko. Ni nanangko ti nangpadakkel kaniak “iti disiplina ken panangiturong-panunot ni Jehova.” (Efeso 6:4) Saan a nalaka dayta para kenkuana, ta no dadduma adda suksukirko. Agtawenakon iti 24, ket agyamanak ta saan a naupay no di ket intultuloyna nga intukit ti kinapudno ti Biblia iti pusok.

D. M., Italia

DNA Nagustuak ti artikulo a “‘Basura’ a DNA?” (Pebrero 22, 2005) Nangalaak iti kurso a molecular biology sumagmamano a tawen ti napalabasen. Nasuronak iti libro nga inadalmi ta imbagana ketdin nga awan serserbi ti 95 a porsiento iti DNA-tayo! Nagusar ti autor kadagiti nagsayaat nga ilustrasion tapno mangilawlawag kadagiti maaramidan ti DNA. Kalpasanna, imbagana a timmaud kano dayta gapu iti ebolusion. Maawatanyo ngarud itan no apay a naragsakanak idi nabasak ti maaw-awagan a basura a DNA iti Agriingkayo!

J. C., Estados Unidos

Agimtuod Dagiti Agtutubo Natukaynak ti artikulo nga “Agimtuod Dagiti Agtutubo . . . Kasano a Makontrolko ti Emosionko?” (Pebrero 22, 2005) Agtawenak iti 31 ken napadakkel kas maysa a Kristiano, ngem saanak pay a maibilang a nataengan iti naespirituan. Iti nabiit pay, namin-adu a nakapungtotak unay, a nakasdaawak a mismo. Nakatulong ti balakad ni nanang ken ti maysa pay a kapammatianmi. Kalpasanna, dimteng daytoy nga artikulo​—iti maitutop unay a tiempo. Naminduan a binasak ken ikabilkonto iti asideg tapno masursurok a kontrolen ti emosionko.

I. B., Alemania

Panagsenias Nasdaawak iti masansan a pannakadakamat ti kinatuleng, a ti kabaruan ket ti ababa a padamag a “Panagsenias iti Internet” iti “Panangmatmat iti Lubong.” (Pebrero 8, 2005) Maysaak kadagiti Saksi ni Jehova, ket nabayagen nga aktiboak iti ministerio. Ngem admitirek a pulos nga awan pay ti nakasabaak a tuleng! Talaga kadi a nagadu dagiti tuleng?

Dina insurat ti naganna, Estados Unidos

Sungbat ti “Agriingkayo!”: Sigun iti maysa a panagadal, adda depekto ti panagdengngeg ti agarup 8,000,000 a tattao nga agtawen iti nasurok a lima idiay Estados Unidos laeng​—uray no addaanda iti hearing aid. Agarup 1,000,000 iti dayta a bilang ket agpannuray iti panagsenias no makikomunikarda. Sigun iti sabali pay a panagadal iti isu met la a pagilian, agarup 28,000,000 a tattao (iti amin a grupo ti edad) nga adda depekto ti panagdengngegda ti di agus-usar iti hearing aid. Mabalin a makasabatka iti tuleng a dimo madlaw a tulengda, yantangay saan a nakadkadlaw dayta. Kasta met a no makipagnanaed ti tuleng kadagiti makangngeg, masansan a ti makangngeg ti manglukat iti ridaw no adda agtuktok.