Blin Dagiti Ruso​—Saan La a Basta Hotcake

Babaen iti mannurat ti Agriingkayo! idiay Russia

Dagiti Pranses adda bukodda a crepe, dagiti taga-Scotland addaanda iti bannock, ken adda met flapjack dagiti Americano. Isu a di nakaskasdaaw nga adda met hotcake dagiti Ruso​—ti blin, a kangrunaan ken nabayagen a taraonda.

Karaman ti blin kadagiti taraon nga inyatang dagiti nagkauna nga Slav kadagiti pagano a ritualda ken imbilangda dayta a maitutop a simbolo ti nagtimbukel, nabara, ken bimmalitok nga init. Dagiti agtanggad ket nataraonan iti blin. Naidasar met dagitoy kadagiti boda ken pumpon, isu a paset dagitoy iti biag ti tattao manipud pannakaipasngay agingga iti ipapatay.

Dagiti Ruso ita gagangay nga agaramidda iti blin babaen iti arina ti trigo, ngem mabalin met nga usaren ti dadduma pay nga arina. Kaaduanna, malaokan ti gamasem nga arina iti gatas wenno danum wenno naglaok a gatas ken danum. Ngem mabalin met a manayonan iti krema, buttermilk, kefir, naalsem a krema, wenno aniaman a produkto ti gatas. Maibilang a maysa nga arte ti panagprito iti blin agsipud ta tunggal blin rumbeng a naingpis no mabalbalin​—kalat a saan a nalaka a maaramid!

Kasapulan kano ti kasta unay a kinasigo iti panagaramid iti palaman. Ti palaman ket mabalin a naasukaran a nalingta a prutas, kas iti raspberry, strawberry, blackberry, red wenno black currant, wenno cranberry. Wenno mabalin a munamon, tamban, salmon, sardinas, sprat wenno ipon, uong, nagiling a karne, wenno cottage cheese​—a naidasar nga agsisina wenno kas kombinasion. Ngem ti bugi ti ikan a napanaganan iti red wenno black caviar ti kasayaatan a palaman dagiti Ruso. Laglagipem met a naim-imas ti blin no kaad-adaw!

[Kahon/Ladawan iti panid 18]

RESIPE TI BUCKWHEAT A BLIN

Ramenna

1 a tasa nga arina ti buckwheat

1 a tasa nga arina ti trigo

2 a kutsara a pangpaalsa

3 a kutsara a mantekilia, narunaw

2 nga itlog

3 a tasa wenno ad-adu pay a gatas

2 a kutsara nga asukar

Sangapirit nga asin

Panangisagana: Gamasem ti arina ti buckwheat babaen iti sangatasa a gatas. Ipapudotmo ti maikadua a sangatasa a gatas. Inayonmo dayta iti ginamasmo, ken paglaokem a naimbag. No nalamiisen, laokam iti bassit a pangpaalsa. Bay-am nga umalsa ti ginamasmo agingga a dakdakkel ngem iti sigud.

Kiwarem ti ginamasmo babaen iti kayo a kutsara, sa asinam ken asukaram. Isinam dagiti duyaw ti itlog manipud iti puraw. Inayonmo ti duyaw ti itlog, ipapudotmo ti nalunag a mantekilia, ken arina ti trigo, sa paglalaokem a naimbag. Isinam a batilen dagiti puraw ti itlog, ken inayonmo dagitoy iti ginamasmo agraman ti kanayonan a gatas no kasapulan. Bay-am nga umalsa manen ti ginamasmo.

Papudotem ti pariok, ken pulagidam iti bassit a lana wenno nalunag a mantekilia. Bukbokam bassit iti ginamasmo a blin, a naingpis laeng no mabalin. Ilutom iti saan unay a nabara agingga a dumuyawen ti blin. Ibalikidmo ti blin sa lutuem iti nasurok a 15 a segundo. Adawem iti plato, ken pagtalinaedem a nabara ti blin bayat nga ulitem dagiti addang iti nabati a ginamasmo. Pagtutuonem dagiti blin inton idasarmo.