Dagiti Estoria ti Biblia a Naisalaysay iti Yelo ken Niebe

BABAEN ITI MANNURAT TI AGRIINGKAYO! IDIAY ALEMANIA

“TALAGA a nakaskasdaaw!” Kasta ti kinuna ni Anja kadagiti nakitana. Kinuna ni Georg, “Nakaskasdaaw dagiti mabukelmo iti daytoy a banag.” Gapu ta naallukoykami, sangkagrupokami a napan iti Lübeck iti makin-amianan nga Alemania tapno makitami ti Ice World, maysa a piesta dagiti eskultura a yelo. Ti temana ket “Ti Biblia​—Dagiti Estoria Manipud iti Daan a Tulag ken ti Baro a Tulag.”

Idi simmangpetkami idiay Lübeck, napno iti angep ti nalatak a Holstein Gate. Iti asidegna, adda dakkel a tolda a kadawyan ti langana. Ngem iti unegna, napasungadanmi ti namaris ken aggilapgilap a lugar ti niebe ken yelo a natubay iti nadumaduma a nasaragasag nga estatua a mangiraniag iti agbaliwbaliw a kolor gapu kadagiti espesial a silaw.

Sakbay pay a rinugianmi ti agpasiar, nalagipmi ti naipakpakauna kadakami nga agkaweskami iti naimeng ta talaga a nalamiis iti uneg! Nupay ti -10 a degree Celsius ket mabalin a kalkalainganna iti maysa nga agnanaed kadagiti nalamiis a lugar, dua kadakami ti madanagan idi nalagipmi a nalipatanmi dagiti balabal ken guantesmi. Nupay kasta, dimi inginggina ti lamminmi gapu kadagiti mabuya a namaris ken nakaay-ayat nga eskultura a naaramid iti yelo.

Dagiti Naaramid iti Yelo nga Eksena iti Biblia

Nakakitakami iti maysa nga anghel, a nagbabassit dagiti karenken ti kawesna, a mangpuypuyot iti trumpeta. Dayta nga eskultura ket kasla tumaytayab iti ngatuen ti daga a naabbungotan ti niebe. Adda nakadispley a nadumaduma a tukad ti panamarsua, agraman ti pannakaparsua ni Adan. Iti pangadaywen, nadanonmi ti daong ni Noe. Nakaisemkami idi nakitami ti hipopotamo a mangpadpadas a mangiduron iti kaduana a sumrek iti ruangan ti daong bayat nga adda bassit nga animal a kasla agliblibas a sumrek iti daong iti sirok ti hipopotamo nga adda iti ruangan. Nakatakder ni Noe iti abay ti yelo a nakitikit a kaasping ti natuontuon a kayo.

Simmaganad, nakadanonkami iti eksena ti minuyongan ti Eden a mangiladawan iti panagbasol da Adan ken Eva. Kalpasanna, simmardengkami iti nagdakkel nga eskultura a kayatmi a sukimaten a naimbag: Ni Moises a nakaiggem iti dua a tapi ti Linteg. Apay a naallukoykami unay iti dayta?

Iti tapi a yelo, saan a ti Sangapulo a Bilin ti  naisurat no di ket ti Tetragrammaton​—ti personal a nagan ti Dios a ni Jehova! Naragsakankami a nakakita iti nakalawlawag a mabasa a nagan ti Dios iti Hebreo a pormana. Makita pay daytoy nga estatua ni Moises uray iti akkub ti broshur a nakailanadan dagiti mabuya. Nakalawlawag a mabasa ti Tetragrammaton iti mismo a tengngana. Namin-adu a rinetratomi dayta nga eksena. Iti abayna, adda estatua ti maysa a kigaw a baka a rumimatrimat a kasla balitok no masilnagan. Dayta ti nangipalagip kadakami iti basol nga idolatria nga inaramid dagiti Israelita kalpasan la unay a naispalda manipud Egipto.

Nakalkaldaang ta narigat a malasin ti ladawan da Jacob ken Esau a naukit iti niebe ken ti ladawan da Jose ken Faraon. Ngamin, sumagmamano a naukit a ladawan ti nadadael gapu iti pannakaipabuyada iti agarup 100,000 a nagpasiar iti immuna a tallo a lawas ti eksibit. Ngem saan a nadadael ti dakkel nga estatua ni Samson, a mangipasimudaag a rebrebbaenna dagiti adigi ti templo dagiti Filisteo. Idi pukpukisan ni Dalila ti sabali pay nga eksena a mangipakita kenkuana.

Naipabuya met ti karakter ti Biblia a ni David, umuna idi inabakna ni Goliat ken idi dina naliklikan a binuya ti agdigdigus a ni Bat-seba. Iti maysa pay a suli a nailadawan ti pannakaipasngay ni Jesus. Kabatog dayta ti eksena a mangiladawan iti Maudi a Pangrabii.

Kalpasan a binuyami dagitoy nga eskultura, talaga a malamminkamin, isu a napankami iti maysa a kapeteria iti arpad ti Holstein Hall. Adda sumagmamano nga iskrin sadiay a nangipabuya iti video maipapan iti pannakaaramid dagiti kitikit.

Pannakaaramid Dagiti Kitikit

Idi damo, 350 a tonelada a bloke ti yelo nga agarup 2 a metro por 1 a metro por 0.6 a metro ti naibiahe manipud Belgium sa napagtutuon, sigun iti aktual a kadakkel dagiti kitikit. Artipisial ti pannakaaramid ti 200 a tonelada a niebe babaen ti nakapimpino a pannakagiling ti babassit a yelo sa naipugso iti nagdakkel a kahon. Babaen kadagiti de koriente a ragadi, paet, sipilio, ken straw wenno kulisip, inkitikit dagiti eskultor iti yelo ken niebe dagiti eksena a naibasar iti Biblia.

Sigun iti lider ti proyekto a ni Jana Kürbis, ti kangrunaan a nakarigatanda isu ti panangpartuat ken panangtaginayon iti husto a temperatura. Ngem maapresiar unay ti amin a panagbannog a naipaay iti proyekto. Kinuna ti maysa a babai: “Nakapimpintas!” Maysa a lalaki ti nagkuna a “talaga a naisangsangayan” ti eksibit. Nupay kasta, maladingitan ni baketna ta bassit laeng ti ammona maipapan iti Biblia.

Adu, agraman dagiti agtutubo, ti nagsisinnublat a nangbuya iti tunggal ladawan sada binasa ti naisurat a panangilawlawag kadagiti nailadawan nga eksena iti Biblia. Idi rimmuarkamin iti pabuya nga Ice World, saan la a sumagmamano a rolio ti nausar a film ti inyawidmi no di ket ti napaut a pannakayukuok dagiti estoria ti Biblia a naisalaysay iti niebe ken yelo.

[Ladawan iti panid 16]

Ti Hebreo a porma ti personal a nagan ti Dios a ni Jehova ket naitampok iti broshur a mangilawlawag iti pabuya

[Ladawan iti panid 16, 17]

Pannakaparsua ni Adan

[Ladawan iti panid 17]

Ni Samson a mangrebrebba iti templo dagiti Filisteo

[Ladawan iti panid 17]

Da David ken Goliat

[Ladawan iti panid 17]

Daong ni Noe

[Picture Credit Lines iti panid 16]

Ti yelo nga estatua ni Moises: Foto von: Nils Bergmann; dagiti kristal a niebe: snowcrystals.net; pannakaparsua ni Adan: Foto von: Nils Bergmann