Dayta ti Nangtignay iti Maysa nga Agtutubo a Mangusig iti Biagna

▪ Itay napan a tawen, adda agtutubo a lalaki a nagsurat iti sanga nga opisina dagiti Saksi ni Jehova. Inlawlawagna nga inikkan idi ni lolana iti libro a Ti Katan-okan a Tao a Nagbiag Pay Laeng. “Inkabilko dayta iti estante,” kinunana. Ngem iti nabiit pay, nagsakit iti nakaro, ta uray la nga impagarupna a matayen.

“Adda nakagutugot kaniak a mangala iti dayta a libro,” insuratna. “Binasak nupay medio nagduaduaak. Ngem kalpasan a nabasak, naamirisko a di umiso ti pangiturturongak iti biagko. Rinugiak ti nagkararag iti Dios.”

“Idi nakaungarak,” inlawlawagna, “inkeddengko a basaen manen dayta a libro. Nasdaawak ta adu latta ti baro a nasursurok. Nangrugin a naawatak a nasken nga agkararagak iti Dios ken agbasaak iti literatura a naibasar iti Biblia, ngem saan nga umdas dagita. Ti kapatgan ket ipamaysatayo ti biagtayo iti Dios ken tulongan ti dadduma a tattao a mamati kenkuana. Kas iti nasursurok iti pangngarig maipapan kadagiti minas, rumbeng nga igaedtayo a parang-ayen ti Pagarian ti Dios.”​—Lucas 19:13-27.

Kas pangserra, kastoy ti insurat dayta a lalaki: “Agyamanak kadagiti Saksi ni Jehova gapu iti daytoy nagsayaat a libro a nangbalbaliw iti biagko. Kayatko ti maaddaan iti ad-adu pay a pannakaammo ken agpayadal iti Biblia. Ngem ti kangrunaan a tarigagayko ket agserbiak iti Dios a tumulong iti sabsabali a mamati kenkuana bayat a sibibiagak.”

Nailanad iti libro a Ti Katan-okan a Tao a Nagbiag Pay Laeng dagiti palawag ni Jesus agraman dagiti pangngarig ken milagrona. Naikagumaan a napagsasaruno ti amin sigun iti urnos ti pannakapasamakda. Aglaon met daytoy a libro kadagiti napintas ken napaypayso nga ilustrasion a mangipalgak kadagiti rikna ni Jesus agraman ti kakaduana.

No kayatmo ti maaddaan iti kopia daytoy 448 ti panidna a libro, pangngaasim ta suratam ti naipakuyog a kupon ken ibusonmo dayta iti adres a naipaay wenno iti maitutop nga adres iti panid 5 daytoy a magasin.

□ Pangngaasiyo ta patulodandak iti libro a Ti Katan-okan a Tao a Nagbiag Pay Laeng.

□ Interesadoak iti libre a panagadal iti Biblia.