Manipud Kadagiti Agbasbasa

Enerhia Gapu ta nguminngina ti gasolina iti pagiliak, apresiarek ti serye iti akkub a “Kabaelantayo Kadi ti Nadaldalus nga Enerhia?” (Marso 8, 2005) Talaga a makaparagsak a panunoten nga idiay baro a lubong ti Dios, “ipanamnama ni Jehova a Dios a tunggal nabiag agpapadanto ti bingayda iti nawadwad a gameng ti daga.”

M. N., Estados Unidos

Sistema Solar Dandani awan a pulos ti ammok maipapan iti astronomia, ngem nagustuak a binasa ti artikulo a “Ti Lalaki a Nakatakuat Kadagiti Palimed ti Sistema Solar.” (Marso 8, 2005) Nagsayaat dagiti nagapuanan ni Kepler, a nakatakuat kadagiti linteg ti panaggaraw dagiti planeta. Ngem no panunotek ti kinasirib ni Jehova, a namarsua kadagitoy a linteg, talaga nga agamangaak.

M. Y., Japan

Ti astronomia ket maysa kadagiti adu a kaay-ayok. Nasdaawak a nakabasa nga adda met gayam idi tiempo a narigat ti biag ni Johannes Kepler. Babaen iti panangtarawidwid ni Jehova, nalabit idiay baro a lubong, siraragsak nga adalekto a kadua dayta nga eskolar idi un-unana dagiti di pay natakuatan a galaksi iti unibersotayo. Pangngaasiyo ta itultuloyyo ti agsurat kadagiti artikulo a makapainteres a kas iti daytoy!

S. M., Alemania

Pagyamanan ta pinasimpleyo ti narigat a suheto tapno maawatan met laengen ti amin dagiti nakaskasdaaw a pinarsua ni Jehova. Napabilegak a nangbasa kadagiti natakuatan ni Kepler ken ti natibker a desisionna nga agtalinaed a naisina iti ulbod a relihion! Masiertok a mangipaaykayo kadagiti naintiempuan nga artikulo kadagiti sumaruno nga aldaw.

S.M.C., Britania

Kanayonan a Milia Naparegtaak unay iti artikulo a “Maragsakan a ‘Mapan iti Kanayonan a Milia.’” (Pebrero 22, 2005) Naisangsangayan unay kaniak ti kapadasan ni Claire Vavy, ta agkataebkami ken agpada dagiti tawen a panagserbimi kas amin-tiempo a managebanghelio. Ti kangrunaan a nagustuak iti dayta nga artikulo ket maysa a balasang ti nangisalaysay iti dayta. Kas maysa a balasang, napabilegak iti kinaregta ken kinapositibo ni Claire. Makita kadagiti retratona iti intero nga artikulo ti agpayso a kinaragsakna. Dayta ti ad-adda a nangipaganetget kaniak a magun-odan ti kinaragsak saan a gapu iti saad wenno ik-ikutantayo no di ket gapu iti panagayattayo ken Jehova ken panagserbitayo kenkuana.

Y. R., Estados Unidos

Kamatis Agtawenak iti 12, ket nagustuak ti artikulo a “Ti Kamatis​—‘Nateng’ a Nagadu ti Pakausaranna.” (Marso 8, 2005) Agyamanak unay ken Jehova gapu ta pinarsuana ti nadumaduma a kita ti naimas a nateng. Nasdaawak a nangbasa nga adda pay gayam garitgaritan a kamatis! Pagyamanan kadagita a makaparagsak nga artikulo.

M. F., Latvia

Dagiti Buaya Nasdaawak unay iti artikulo a “Mabalinmo Kadi nga Iseman ti Buaya?” (Marso 8, 2005) Para kaniak, nakaskasdaaw a parsua ti buaya. Naragsakanak a nangbasa iti nagadu a makapainteres nga impormasion a mangtignay iti tattao a mangayat kadagiti buaya a kas kaniak. Segseggaak ti baro a lubong ni Jehova, a sadiay nasaysayaatton ti pannakaawattayo kadagiti buaya!

L. I., Estados Unidos

Manipud Kadagiti Agbasbasa Naipasngayak nga adda sakit dagiti tulangko. Nakasangitak gapu iti napintas ken makaparegta a surat a naipablaak iti “Manipud Kadagiti Agbasbasa” (Marso 8, 2005) maipapan iti artikulo a “Baro a Rupa Para ken Mailyn.” (Mayo 22, 2004) Tunggal letra ket adda naisangsangayan a punto a napateg ken makatulong a mismo kaniak.

M. J., Britania