Mapasamakto Ngata Manen?

NO LAGIPENTAYO ti napalabas, mabalin a pagarupentayo a napintas, karkarna ken naglabasen daydi a panawen, ngem makaay-ayo. Kas pagarigan, iti Europa ken America, daydi ti panawen dagiti karuahe a guyoden ti kabalio, natayog a kallugong, ken agsaringgayad a kain. Ngem nakabutbuteng met daydi a tiempo gapu iti agraraira nga ipapatay iti intero a lubong. Ania ti makagapu?

Saan a gubat dayta, nupay madama idi ti gubat. Saan, sabali a saplit ti tuktukoyentayo. Naawagan idi daydiay a kakaruan ti panangdadaelna sigun iti amin a naisurat iti pakasaritaan ti tao​—ti trangkaso Espaniol, wenno trangkaso idi 1918-19.

Nagadu a tattao ti natay, ta awan pay idi ti nasamay nga agas. Nagadu a nasalun-at nga agtutubo ti kellaat a natay bayat a kabambanuaganda. Nabibiit a nabunton dagiti bangkay ngem iti pannakaikalida. Natalipupos ti intero nga ili ken purok iti sumagmamano a lugar.

Napasamak amin daytoy 85 a tawenen ti napalabas. Ammotayo aya no ania ti nakagapu iti dayta a sakit? Mabalin kadi a mapasamakto manen ti kasta a didigra? No mapasamak, masalaknibantayo ngata ti bagitayo?

Adda sabali pay a makapainteres a paset daytoy a suheto. Ammoyo kadi a nabayagen a nailanad iti Biblia ti maipapan kadagiti angol a mapaspasarantayo ita? (Lucas 21:11; Apocalipsis 6:8) Paset aya ti kaitungpalan ti padto ti Biblia ti trangkaso Espaniol? Malawlawagan dagiti sungbat daytoy ken ti dadduma pay a saludsod kadagiti sumaganad nga artikulo.

[Ladawan iti panid 3]

Panagsagana a mangitabon kadagiti natay iti trangkaso Espaniol, Philadelphia, E.U.A.

[Credit Line]

Library of the College of Physicians of Philadelphia