KAS iti nadakamaten, manmano a pasamak ti ad-adda a pagpiestaan ti media ngem ti panangipubliko ti maysa a nalatak a tao nga isu ket bakla, tomboy, wenno bisexual (agkursonada iti lalaki ken babai). Adda dagiti mangpadayaw kadagiti kasta a tattao gapu iti turedda ngem kagurgura met ida ti dadduma gapu iti kinarugitda iti moral. Malaksid kadagita a dua nga agsupadi a panangmatmat, adu ti mangibilang iti homoseksualidad kas sabali laeng nga estilo ti panagbiag. “Idi ages-eskuelaak pay,” kuna ti 21 anyos a ni Daniel, “uray dagiti agtutubo a pudpudno a lallaki ken babbai ibilangdaka a manangidumduma ken manangkritikar no kaguram ti homoseksualidad.” *

Mabalin nga agduduma ti panangmatmat iti homoseksualidad depende iti henerasion ken lugar. Ngem dagiti Kristiano ket saan nga “iyallaalla . . . ti tunggal angin ti sursuro.” (Efeso 4:14) Iyap-aplikarda ketdi ti kuna ti Biblia.

Ania ti panangmatmat ti Biblia maipapan iti homoseksualidad? No sursurotem dagiti moral a pagalagadan ti Biblia, ania ti isungbatmo kadagidiay mangibilbilang kenka a manangidumduma, manangkritikar, ken manggurgura kadagiti homoseksual? Usigem dagiti sumaganad a saludsod ken posible a sungbat.

Nabatad a kuna ti Biblia nga inranta ti Dios a ti sekso ket para laeng iti agassawa a lalaki ken babai. (Genesis 1:27, 28; Levitico 18:22; Proverbio 5:18, 19) Ti pannakiabig a konkondenaren ti Biblia agpada a tukoyenna dagiti seksual nga ar-aramiden dagiti agkasekso ken di agkasekso. *—Galacia 5:19-21.

No adda agsaludsod: “Ania ti panangmatmatmo iti homoseksualidad?”

Mabalin a kunaem: “Diak kagura dagiti homoseksual, ngem kagurak ti aramidda.”

 ✔ Tandaanam: No agpapaiwanwanka iti moral a pagalagadan ti Biblia, dayta ngarud ti inkeddengmo a wagas ti panagbiag, ken kalintegam dayta. (Josue 24:15) Dimo ibain dayta a takdermo.—Salmo 119:46.

Wen. Kuna ti Biblia: “Padayawanyo dagiti amin a kita ti tattao” wenno, kas kuna ti Baro a Naimbag a Damag Biblia, ‘Raemenyo ti amin a tattao.’ (1 Pedro 2:17) Gapuna, saan a kagura dagiti Kristiano dagiti homoseksual. Naimbagda iti amin a tattao, uray kadagiti bakla wenno tomboy.—Mateo 7:12.

No adda agsaludsod: “Saan ngata a ti panangmatmatmo iti homoseksualidad iparegtana ti pananggura kadagiti bakla ken tomboy?”

Mabalin a kunaem: “Saan. Kagurak ti homoseksual nga aramidda, saan nga isuda a mismo.”

✔ Mabalinmo nga inayon: “Panunotem daytoy: Diak agsigsigarilio. Kinapudnona, diak pulos mairusok dayta. Ngem ipapantan nga agsigsigarilioka, isu nga agduma ti panangmatmatta. Saanka a kagura gapu iti panangmatmatmo, ken siguradok a dinak met kagura gapu iti panangmatmatko—di ngamin? Kasta met laeng no maipapan iti nagduma a panangmatmatta iti homoseksualidad.”

Saan nga insuro ni Jesus nga akseptaren lattan dagiti pasurotna ti aniaman wenno amin nga estilo ti panagbiag. Imbes ketdi, insurona a ti pannakaisalakan ket magun-odan ti “tunggal maysa a mangwatwat iti pammati kenkuana.” (Juan 3:16) Ti panangwatwat iti pammati ken Jesus ramanenna ti panangyaplikar kadagiti moral a pagalagadan ti Dios, a mangiparit iti dadduma a kita ti aramid—agraman ti homoseksualidad.—Roma 1:26, 27.

No adda agkuna: “Saanen a makapagbalbaliw dagiti homoseksual ta nayanakdan a kasta.”

Mabalin a kunaem: “Saan a dinakamat ti Biblia no dagiti homoseksual ket sigudda a kasta wenno saan, ngem bigbigenna nga adda dagiti kababalin a nauneg ti pannakairamutna. (2 Corinto 10:4, 5) Uray no agkursonada ti maysa iti kapadana iti sekso, imbilin ti Biblia a liklikan dagiti Kristiano ti homoseksual nga ar-aramid.”

✔ Singasing: Imbes a makidebateka maipapan iti nagtaudan dagiti homoseksual a tarigagay, pagminarem ketdi nga iparit ti Biblia ti homoseksual nga aramid. Kas panangyilustrar, mabalin a kunaem: “Ammom, adu ti agkuna a dagiti naranggas a kababalin ket mabalin a natawid isu nga adda dagiti tattao a naranggas. (Proverbio 29:22) Kasanon no agpayso dayta? Kas nalabit ammomon, kondenaren ti Biblia ti panagpungtot. (Salmo 37:8; Efeso 4:31) Dayta kadi a pagalagadan ti Dios ket di nainkalintegan gapu laeng ta kayat ti dadduma ti agaramid iti kinaranggas?”

Ti kasta a panagrasrason ket naibatay iti di umiso a kapanunotan a masapul a suroten dagiti tattao ti seksual a tarigagayda. Ipapaayan ti Biblia dagiti tattao iti dignidad babaen iti panangipanamnama kadakuada a kabaelanda nga iwaksi dagiti di umiso a seksual a tarigagayda no talaga a kayatda.—Colosas 3:5.

No adda agkuna: “Uray no saanka a homoseksual, masapul a baliwam ti panangmatmatmo iti dayta.”

  Mabalin a kunaem: “Kas pagarigan, diak kayat ti agsugal ngem kayatmo. Nainkalintegan kadi a pilitennak a baliwak ti panangmatmatko gapu laeng ta minilion ti mayat nga agsugal?”

✔ Tandaanam: Kaaduan a tattao (agraman dagiti homoseksual) ket addaan kadagiti prinsipio maipapan iti naimbag ken dakes isu a kagurada ti espesipiko a bambanag—nalabit panagkusit, kinaawan hustisia, wenno gubat. Iparit ti Biblia dagita ken ti dadduma a kita ti seksual nga ar-aramid, agraman ti homoseksualidad.—1 Corinto 6:9-11.

Ti Biblia ket nainkalintegan ken patas. Daytoy ti ipapaannurotna agpadpada kadagidiay agduyos iti kaseksoda ken kadagidiay agduyos iti dida kasekso: “Adaywanyo ti pannakiabig.”—1 Corinto 6:18.

Kinapudnona, minilion a heterosexual (dagidiay agduyos iti kasungani a sekso) ti agtartarigagay a mangyaplikar iti pagalagadan ti Biblia. Ikagkagumaanda ti agteppel iti laksid dagiti sulisog. Adu kadakuada ti awanan asawa ken bassit ti namnamada a makaasawa. Adu met ti addaan iti baldado nga asawa a din makabael a makidenna. Kaskasdi a naragsakda uray no saan a mapempennek ti seksual a tarigagayda. Maaramidan met dayta dagiti agduyos iti kapadada iti sekso no talaga a kayatda a paragsaken ti Dios.—Deuteronomio 30:19.