NO KABAELAM a pagpatinggaen ti panagrigrigat ti sabali, aramidem kadi? Dagiti manangsaranay masansan nga agdardarasda a mapan kadagiti nakapasamakan dagiti natural a didigra tapno tulonganda dagiti agsagsagaba wenno salbarenda ti biag dagiti dida pulos am-ammo. Nalabit maisaludsodmo, ‘Apay a di pay la alistuan ti Dios a pukawen ti Diablo, ti makinggapuanan iti kasta unay a panagsagaba ti tao?’

Tapno masungbatan dayta, iladawanmo iti panunotmo ti maysa a nalatak a kaso iti korte. Ti akusado iti pammapatay ket desperado a mangpasardeng iti bista. Ibagbagana a saan nga umiso ti wagas ti hues a mangukom iti mismo a korte ken mangmangted pay kano iti pasuksok kadagiti hurado. Napalubosan ngarud ti adu a testigo a mangipaay kadagiti testimoniada.

Ammo ti hues nga adu ti tumaud a problema no mapabayag ti bista isu a kayatna a malpas koma ti kaso nga awanen dagiti di nesesita a pannakaitantan. Ngem ammona a tapno maipaulog ti desision nga agserbi a pagtuladan kadagiti kaso a posible a rumsua iti masanguanan, masapul a maikkan iti umdas a tiempo ti agsumbangir a dasig tapno maidatagda ti takderda iti isyu.

Ania ti nakaipadaan daytoy nga ilustrasion iti karit ti Diablo—a maaw-awagan met iti “dragon,” “serpiente,” ken “Satanas”—kontra ken Jehova, “ti Kangatuan iti intero a daga”? (Apocalipsis 12:9; Salmo 83:18) Siasino a talaga ti Diablo? Ania dagiti akusasionna ken Jehova a Dios? Ken kaanonto ti panangdadael ti Dios kenkuana?

Ti Diablo ket perpekto idi nga espiritu a persona, maysa kadagiti anghel ti Dios. (Job 1:6, 7) Pinagbalinna a Diablo ti bagina idi impamaysana iti panunotna ti managimbubukodan nga ambision nga isu koma ti pagdayawan dagiti tattao. Kinaritna ti kalintegan ti Dios nga agturay, nga imparipiripna a di maikari ti Dios a pagtulnogan. Kinunana nga agserserbi laeng dagiti tattao iti Dios gapu ta ipapaayanna ida kadagiti bendision. Kinuna ni Satanas a no agrigat ti tunggal tao, ‘ilunodda’ amin ti Namarsua kadakuada.—Job 1:8-11; 2:4, 5.

Saan a masungbatan dagita nga akusasion ni Satanas babaen ti basta panangipakita iti pannakabalin. Kinapudnona, no ti Diablo ket dagus a napapatay idiay minuyongan ti Eden, nalabit impapan ti dadduma a husto ti Diablo. Isu a ti Dios, nga addaan iti naan-anay nga autoridad, rinugianna ti pannakabista tapno masolbar dagita nga isyu iti imatang ti amin nga agpalpaliiw.

Maitunos kadagiti prinsipiona ken iti naan-anay a kinahustisiana, impakaammo ni Jehova a Dios a ti tunggal dasig ket mangidatag kadagiti testigo ken mangipaay iti testimonia a mangsuporta iti dasigda iti dayta nga isyu. Gapu iti naipalubos a tiempo, naaddaan dagiti kaputotan ni Adan iti gundaway nga agbiag ken mangipaay iti testimoniada a pabor iti Dios, nga aniaman a rigat ti mapasaranda, agtalinaedda a natarnaw gapu iti ayatda kenkuana.

Pagaammo unay ni Jehova a Dios a bayat a maisaysayangkat dagita a legal nga addang, agtultuloy nga agsagaba dagiti tattao. Ngem determinado a mangleppas iti kaso iti kabiitan a panawen. Isu ket dineskribir ti Biblia kas “ti Ama dagiti nadungngo nga asi ken ti Dios ti amin a liwliwa.” (2 Corinto 1:3) Nalawag a “ti Dios ti amin a liwliwa” dina palubosan nga agpaut pay ti Diablo iti nabaybayag ngem iti kasapulan agraman dagiti epekto ti impluensiana. Iti kasumbangirna, dina met dadaelen a nasapsapa ti Diablo no saan pay a naan-anay a nairingpas ti kaso a nakairamanan ti intero nga uniberso.

Apaman a masolbar dagiti isyu, naan-anayton a maalangon ti kalintegan ti Dios a mangituray. Ti legal a kaso kontra ken Satanas ket agserbinto kas agnanayon a legal a pagtuladan. No addanto manen rumsua nga umasping a karit, ti nagbanagan ni Satanas ket pagibatayan a dinton kasapulan a palubosan manen ti Dios ti kasta nga iyaalsa.

Iti naikeddeng a tiempo, ni Jehova a Dios bilinennanton ti Anakna a ni Jesu-Kristo a mangdadael iti Diablo ken mangpukaw iti amin nga aramid dayta a kabusor. Ibaga ti Biblia nga addanto tiempo a ni Kristo “iyawatna ti pagarian iti Dios ken Amana, inton ti isuamin a gobierno ken isuamin nga autoridad ken pannakabalin maiyegnan iti pannakapukaw. Ta isu masapul nga agturay kas ari agingga a ti Dios naikabilnan amin dagiti kabusorna iti babaen dagiti sakana. Kas ti maudi a kabusor, ni patay mapukawto.”—1 Corinto 15:24-26.

Makaparagsak ta ikarkari ti Biblia nga agbalinton a Paraiso ti intero a daga. Kas iti orihinal a panggep ti Dios, agbiagton dagiti tattao iti dayta a natalna a paraiso! “Dagidiay naemma tagikuaendanto ti daga, ket pudno a maragsakandanto iti napalalo iti kinaruay ti talna.” Wen, “dagiti nalinteg tagikuaendanto ti daga, ket agtaengdanto nga agnanayon iti dayta.”—Salmo 37:11, 29.

Iladawanmo iti panunotmo ti nagsayaat a namnama dagiti agserserbi iti Dios a kas nadeskribir iti Biblia: “Adtoy! Ti tolda ti Dios adda iti sangatauan, ket isu makipagnaedto kadakuada, ket isudanto dagiti ilina. Ket ti Dios a mismo addanto kadakuada. Ket punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot. Ti immuna a bambanag naglabasdan.”—Apocalipsis 21:3, 4.