Kinamapagpiaran​—Mangyeg iti Pudno a Balligi

“Ti pudno a biag ti tao saan a maibatay iti sanikua, uray no kasano ti kinabaknangna.”​—Lucas 12:15, Ti Baro a Naimbag a Damag Biblia.

TI PANAGBIROK iti kuarta ket napateg a paset ti biag. Responsabilidadtayo iti Dios ti panangipaay kadagiti kasapulan ti bagitayo ken pamiliatayo.​—1 Timoteo 5:8.

Ngem kasanon no ti panggepmo a manggun-od iti kuarta ken iti bambanag a magatangna ket saan laengen a tapno masustentuam ti biagmo? Kasano no daytan ti kapatgan kenka? Kadagidiay kangrunaan a kalatda ti agpabaknang, nalaklakada a masulisog nga agkusit tapno maalada ti kayatda. Naladawton inton maamirisda a ti panagkusit ket saan gayam a mangyeg iti pudno a balligi. Kanayonanna, kas kuna ti Biblia, ti ayat iti kuarta ti pakaigapuan iti adu nga ut-ot.​—1 Timoteo 6:9, 10.

Usigem ti sumaganad nga uppat a mapagwadan nga indibidual a mamati a ti balligi ket saan la a panagurnong iti kinabaknang.

Panagraem iti Bagi

“Sumagmamano a tawenen ti napalabas, ininterbiuk ti maysa a potensial a kliente a mayat a gumatang iti life insurance nga aggatad iti sangamilion a doliar. Rinibu a doliar koma ti komisionko. Imbagana nga agpa-insure kaniak no agguduakami iti komisionko. Imbagak kenkuana nga ilegal ken sinasaur dayta.

“Pinadasko ti makirinnason. Dinamagko no talaga a kayatna nga ited iti tao a nakusit ti kompidensial a personal ken pinansial nga impormasion maipapan kenkuana. Inulitko ti takderko ket imbagak a kontakennak no kayatna nga agbalinak nga ahentena. Pulos a din immawag.

“No inawatko ti tukonna, nadadael koman ti kinatarnawko ken panagraemko iti bagik kas Kristiano. Nagbalinak koman nga adipen ti tao a nangisungsong kaniak nga agkusit.”​—Don, U.S.A.

Talna ti Panunot

Kas nadakamat iti umuna nga artikulo iti daytoy a serye, dakkel a pasuksok ti naitukon ken Danny no agulbod maipapan iti kabaelan ti pabrika a potensial a suplayerda. Ania ti inaramidna?

 “Nagyamanak iti manedyer iti panangilibrena kaniak iti pannangan sa insublik ti sobre a naglaon iti kuarta. Impapilitna ket kinunana a no makapasa ti pabrikana iti inspeksionmi, dakdakkelto pay ti inayonna. Nagkedkedak.

“No inawatko dayta, kanayon koman a madandanaganak di la ket ta maduktalandakto. Idi agangay, naammuan ti boss-ko ti napasamak. Naragsakan ken nabang-aranak unay ta diak nagkusit. Nalagipko ti Proverbio 15:27 (Ti Baro a Naimbag a Damag Biblia): ‘Agganansiaka iti sinasaur, ket yegmo ti riribuk iti familiam. Dika umawat iti pasuksok ket napautto ti biagmo.’”​—Danny, Hong Kong.

Kinaragsak ti Pamilia

“Adda bukodko a kompania ti konstruksion. Adu ti gundaway a mabalinko a sauren dagiti kostumer wenno maliklikak ti agbayad iti buis. Ngem nagimbaganmi a sangapamiliaan ti determinasionko nga agtalinaed a mapagpiaran.

“Ti kinamapagpiaran saklawenna ti intero a panagbiagmo, saan la a bayat ti kaaddam iti trabaho wenno negosio. Dakdakkel ti panagtalekmo iti asawam no ammom a dina pulos ikompromiso dagiti pagalagadan ti Dios maipapan iti kinamapagpiaran. Natalged ti rikna ti asawam no ammona a kabaelam a pagkedkedan ti aniaman a sulisog.

“Mabalin a kukuam ti kadakkelan a kompania iti lubong ngem dimo magatang ti solusion dagiti problema ti pamiliam. Kas maysa kadagiti Saksi ni Jehova, napaneknekak a kanayon a balanse ti biagko gapu ta sursurotek dagiti prinsipio ti Biblia. Adda tiempok para iti pamiliak ken saanak nga agpapaimpluensia iti daytoy naagum ken rupat’ kuarta a lubong.”​—Durwin, U.S.A.

Nasayaat a Relasion iti Dios

“Karaman iti trabahok ti panaggatang kadagiti suplay ti kompaniami. No dadduma, isingasing dagiti ahente nga imbes nga intero a diskuento ti itedda iti kompaniami, ikkandak iti porsiento kadagiti gatangen ti kompaniami. Ngem maysa a kita dayta iti panagtakaw iti kompania.

“Kalkalainganna laeng ti sueldok isu a makatulong koma ti kanayonan a kuarta. Ngem awan ti umasping iti nadalus a konsiensia ken takder iti imatang ni Jehova a Dios. Isu nga iti tunggal transaksion, sursurotek ti prinsipio a mabasa iti Hebreo 13:18: ‘Kayatmi ti agbiag a mapagtalkan iti amin a bambanag.’”​—Raquel, Pilipinas.

 [Kahon/Dagiti Ladawan iti panid 9]

Dagiti Prinsipio ti Mapagpiaran a Negosio

Iti nadumaduma a lugar, agduduma a pagannurotan ti masursurot iti negosio. Ngem dagiti prinsipio ti Biblia ket mabalin a mausar a pagibasaran iti panagaramid iti umiso a desision. Adtoy ti innem a pakabigbigan ti mapagpiaran a negosio:

Napudno

Prinsipio: “Dikay pagulbodan ti maysa ken maysa.”​—Colosas 3:9.

Mapagpannurayan

Prinsipio: “Ti koma latta saoyo a Wen kaipapananna ti Wen, ti saoyo a Saan, Saan.”​—Mateo 5:37.

Mapagtalkan

Prinsipio: “Saanmo nga ipalgak ti kompidensial a panagsao ti sabali.”​—Proverbio 25:9.

Mapagpiaran

Prinsipio: “Saanka nga umawat iti pasuksok, ta ti pasuksok bulsekenna dagiti nalawag-panagkitana a tattao.”​—Exodo 23:8.

Patas

Prinsipio: “Amin a bambanag, ngarud, a kayatyo nga aramiden kadakayo dagiti tattao, masapul a kasta met ti aramidenyo kadakuada.”​—Mateo 7:12.

Legal

Prinsipio: “Ipaayyo kadagiti amin dagiti karbenganda, kenkuana a mangalikagum iti buis, ti buis.”​—Roma 13:7.

[Kahon/Dagiti Ladawan iti panid 9]

No Kasano ti Agtalinaed a Mapagpiaran iti Negosio

● Ammuem Dagiti Ipangpangrunam. Kas pagarigan, kasano kapateg kenka ti panagpabaknang no idilig iti panamagtalinaed iti nasayaat a relasionmo iti Dios?

● Agdesisionka a Nasaksakbay. Saganaam dagiti situasion a mangsubok iti kinamapagpiaram ken iplanom no ania ti aramidem.

● Ipakaammom ti Takdermo. Iti rugi pay laeng ti pannakinegosio, sitataktika nga ipakaammom dagiti prinsipiom.

● Agpatulongka. No maipasangoka iti sulisog wenno marigatanka nga agdesision, agpabalakadka iti maysa a kapadpadam dagiti prinsipiona.

[Ladawan iti panid 8]

No mapagpiaranka, natalna ti panunotmo