Manipud Kadagiti Agbasbasa

No Apay a Tinallikudak ti Pagbaknangan a Karera (Hunio 2010) Agyamanak unay kadakayo gapu iti daytoy nga artikulo! Agtawenak iti 39 ken agsolsolo a mangpadpadakkel iti tallo nga annak. Iti pagnanaedak a paset ti Russia, nagrigat ti agbirok iti trabaho. Ngem natignayak iti ulidan ni Martha Teresa Márquez. Kinuna ti artikulo a tapno masuportaranna ti bagina iti amin-tiempo a ministerio, agar-aramid ni Martha kadagiti tamales idiay balayna sana ilako iti kalsada. Tinuladko dayta ket nagaramidak met iti babassit nga empanada a maawagan “piroshki” iti Russian. Adu ti aggatang iti dayta isu a nagbalinen a negosio ti pamiliami. Gapu iti dayta, nasursuro dagiti annakko dagiti praktikal a paglaingan ken nagbalinda nga ad-adda a responsable.

G. M., Russia

No Kasano a Daeran ti Panagbeddal (Mayo 2010) Pagyamanan iti panangiranudyo iti umiso nga impormasion maipapan iti panagbeddal. Ikagkagumaanmi nga ilawlawag kadagidiay addaan iti kasta a depekto nga adu ti mabalinda nga aramiden a makatulong kadakuada.

J. F., presidente ti The Stuttering Foundation, United States

Agimtuod Dagiti Agtutubo . . . Kasanok a Mailawlawag ti Panangmatmat ti Biblia Maipapan iti Homoseksualidad? (Disiembre 2010) Sangapulo a tawenen a kasadoak ken addan maysa nga anakko. Inaldaw a lablabanak ti bukodko a “siit iti lasag”​—dagiti homoseksual a tarigagayko. Uray no kasadoakon, marikriknak latta dayta. Malmaldaangak unay idi ta kasla diak maparmek dagiti tarigagayko. Ngem kalpasan a nabasak daytoy nga artikulo, rimmagsakak. Naragpatkon ti kalatko a mangkontrol kadagita a tarigagay.​—2 Corinto 12:7.

Nailimed ti naganna, United States

Addaanak kadagiti homoseksual a tarigagay sipud pay idi lima ti tawenko. Uray no agtawenakon iti 61, marikriknak pay laeng dayta. Nagustuak unay ti nadakamat iti artikulo nga uray dagiti heterosexual (dagidiay agduyos iti kasungani a sekso) ket masapul nga umadayo iti pannakiabig ken ‘adu ti awanan asawa a bassit ti namnamada a makaasawa ken addaan iti baldado nga asawa a din makabael a makidenna’ ngem naragsakda latta uray no saan a mapempennek ti seksual a tarigagayda. No kasta, dagidiay addaan iti homoseksual a pagannayasan ket mabalin nga agbiag a nadalus iti moral no talaga a kayatda a paragsaken ti Dios. Agyamanak gapu iti panangparegtayo kadagidiay kas kadakami a makilablaban iti kastoy a kasasaad.

Nailimed ti naganna, United States