Panangmatmat iti Lubong

Sigun iti 76.3% kadagiti adulto a napagsaludsodan idiay Germany, “awan a pulos pagdaksan” ti panagalembong ken “dina kaipapanan a kayat dagidiay agal-alembong ti maaddaan iti serioso a relasion.” Sigun iti dandani 50% kadagiti napagsaludsodan, saan kano a dakes no ti maysa a kasado ket agalembong iti dina am-ammo.​—APOTHEKEN UMSCHAU, GERMANY.

Iti nasional a surbey, patien ti 48% kadagiti taga-Russia a ti panangatake dagiti terorista ket “talaga a maekspektaren” ken “gagangayen a paset ti biag.”​—KOMMERSANT, RUSSIA.

“Kas iti natured nga ar-aramiden idi un-unana dagiti buyot a manglakub,” nabiit pay a pinadas dagiti mammuslit a Mexicano ti baro a taktika tapno maliklikanda ti checkpoint security iti border​—maysa a “napigsa a palsiit” a naimontar iti treyler a “mangipuruak kadagiti droga iti amianan” a lumbes iti alad ti beddeng ti Estados Unidos. ​—REUTERS NEWS SERVICE, U.S.A.

Maiparegreg ti “dua iti kada lima a sikog” idiay New York City. Dayta a proporsion ket “awan unay nagbaliwanna iti nasurok a 10 a tawen.” ​—THE NEW YORK TIMES, U.S.A.

Nasdaaw dagiti mangkonkontrol kadagiti peste idi napaayabanda a mangtiliw iti maysa a lobo (atap nga aso) iti maika-72 a kadsaaran ti maibangbangon a nakangatngato a pasdek iti sentro ti London. Dayta a lobo, a “dagiti tedda a taraon a nabati dagiti trabahador ti pagbibiagna,” ket naibulos iti asideg. ​—THE TELEGRAPH, LONDON.

Mabalinen nga Agkandidato Dagiti Padi ti Russian Orthodox

“Inaprobaranen ti Council of Bishops of the Russian Orthodox Church ti panagkandidato iti politika ti papadina kadagiti naisangsangayan a kasasaad tapno masalakniban ti relihionda kadagiti panagsisina ken dadduma pay a direkta a peggad,” kuna ti agipadpadamag nga ahensia a RIA Novosti. Sigun iti impakaammo dagiti obispo, mabalin dayta no nasken a “sarangten dagiti puersa iti kagimongan, agraman dagiti mamagsisina iti relihion ken dagidiay nagtaud iti sabali a relihion a mangus-usar iti bileg ti politika tapno kontraenda ti Orthodox Church.”

Dagiti Baro a Problema iti Linteg

Nupay imposible idi, addan dagiti baro a pamay-an a tumulong kadagiti baog nga agassawa a maaddaan iti bukodda nga anak. Ngem dagita ti mangpatpataud kadagiti baro a problema iti linteg. “Kada tawen, umad-adu ti maipasngay manipud iti semilia wenno pertilisado nga itlog a napreserba iti adu a bulan wenno tawen,” kinuna ti The Wall Street Journal. “Iti dadduma a kasasaad, natayen ti maysa kadagiti nagannak, kadawyanna a ti ama.” Idiay Estados Unidos, adda dagiti ulila nga ubbing nga umaw-awat iti binulan a pension manipud iti Social Security system. Ngem agduduma ti linteg dagiti estado iti panangted iti pension iti ubing a naisikog kalpasan a natay ti maysa kadagiti nagannakna. “Di ninamnama dagiti mammanday linteg a nagadayo ti madanon ti teknolohia,” kinuna ni Sonny Miller nga abogado idiay Minnesota.