Apay a masapul nga adalem ti Biblia? Panunotem daytoy:

Ti Biblia ti kaaduan a mailaklako a libro. Matulongannaka a mangbirok iti gameng ken

● Maisuronaka nga agsagana para iti kasayaatan a biag

● Maibagana kenka ti masanguanan​—ken ti napalabas​—a dimo maammuan iti sabali a pamay-an

● Matulongannaka a mangam-ammo iti bagim ken agbalin a nasaysayaat a tao *

KASAPULAN ti panagregget iti panagadal iti Biblia. Ngem nagadu ti magunggonam! Kayatmo kadi a maammuan no kasano nga ar-aramiden dayta ti dadduma nga agtutubo? Kartibem ken kulpiem ti sumaganad a panid. Iti kasta, maaddaanka iti bassit ken uppat-panidna a reperensia a pakabasaam no kasano nga agbalballigi dagiti padam nga agtutubo iti personal a panagadalda iti Biblia ken no kasanoda a magunggonaan unay iti dayta.

“Makagunggona ti Biblia iti amin a tao. Nagadu ti mabalin a masursuro iti dayta!”​—Valerie. *

Ad-adu pay nga artikulo manipud iti serye a “Young People Ask” ti masarakam iti Web site a www.watchtower.org/ype

[Footnotes]

 [Kahon/Dagiti Ladawan iti panid 19, 20]

NO KASANO NGA ADALEN TI BIBLIA

Ti problema: KINAAWAN INTERES

“Kasla diak maanusan ti agtugaw iti maysa nga oras tapno agadal.”​—Lena.

Ti kasapulam: PAKATIGNAYAM

Tapno matagiragsakmo ti agadal iti Biblia, nasken a masungbatam daytoy a saludsod: Ania ti magunggonak iti dayta? Kayatmo kadi ti makigayyem iti Dios? nga umuneg ti pannakaawatmo kadagiti mapaspasamak iti lubong? a sumayaat ti personalidadmo? Matulongannaka ti Biblia a mangaramid kadagita​—ken dadduma pay!

“Dimo panunoten a ti panagadal iti Biblia ket kasla trabaho wenno panagadal iti eskuelaan. Ibilangmo ketdi dayta kas pamay-an tapno nasingsingedka ken Jehova a Dios​—ti kasayaatan pay laeng a Gayyem.”​—Bethany.

“Ti panagadalmo ket personal a tiempom para ken Jehova a Dios. No kalangenmo laeng ti maysa a tao bayat a kaduam dagiti nagannakmo, talaga kadi a gayyemmo isuna wenno dagiti laeng nagannakmo ti makinggayyem kenkuana? No agadalka a bukbukodmo, sika ti makinggayyem ken Jehova.”​—Bianca.

Tandaanam: “Impaltiing ti Dios ti amin a Nasantoan a Surat, ket naserbi a pangisuro iti kinapudno, pangbabalaw, pangatur iti biddut ken pakasursuroan iti nalinteg a panagbiag.” (2 Timoteo 3:16, Ti Baro a Naimbag a Damag Biblia) Matulongannaka met ti Biblia kadagita a pamay-an!

“Ikagkagumaak a panunoten dagiti magunggonak. No adda nasken a balbaliwak, ti panagadal ti mangted kaniak iti gundaway a mangammo kadagiti nasken nga aramidek tapno sumayaat ti personalidadko.”​—Max.

Panunotem:

Ania ti mabalin a mangtignay kenka nga agadal?

 Ti problema: PANNAKAUMA

“Kalpasan ti 10 a minuto a panagadal, medio mabannogakon; kalpasan ti 20 a minuto, sabalin ti kayatko nga aramiden; kalpasan ti 30 a minuto, diak kayaten!”​—Allison.

Ti kasapulam: LAING A MANGI-PAMUSPUSAN

Usarem ti imahinasionmo, iti man kita ti adalem, no kasanoka nga agadal, wenno sadino ti pagadalam.

“Iwayaam a biroken dagiti sungbat ti salsaludsodmo. No mabirokam dagita, mapnek ken maragsakanka la ketdi iti nagapuanam.”​—Richard.

“Bayat a basbasaem ti maysa a pasamak, panunotem nga addaka sadiay. Ipapanmo a sika ti bida wenno buybuyaem ti mapaspasamak. Iladawanmo iti panunotmo a kasla aktual a makitkitam ti pasamak.”​—Steven.

“Pagbalinem a naragsak ti panagadalmo. Mapanka iti paraangan ken mangitugotka iti meriendam. Magusgustuak ti agmerienda bayat nga agad-adalak. Uray met siasino, di ngamin?”​—Alexandra.

Tandaanam: Adda laeng iti panunotmo ti pannakauma, saan a kanayon nga agpaypayso dayta. Isu nga imbes a kunaem a “makapauma ti agadal,” ti ketdi kunaem ket “siak ti maum-uma.” Baliwam ti panangmatmatmo. Iti kasta, makontrolmo ti bagim ken mapabilegka a mangipamuspusan.​—Proverbio 2:10, 11.

“Saan a makapauma ti personal a panagadal. Agdepende dayta kenka.”​—Vanessa.

Panunotem:

Kasanoka nga agbalin a manangipamuspusan iti panagadalmo?

Ti problema: KINAAWAN TIEMPO

“Kayatko nga ad-adu koma pay ti panawenko nga agadal iti Biblia ngem nagadu ti ar-aramidek isu a marigatanak unay a mangiwaya iti dayta!”​—Maria.

Ti kasapulam: PRIORIDAD

Paset ti panagbalin nga adulto ti panagsursuro a ‘mangsigurado kadagiti napatpateg a banag.’​—Filipos 1:10.

“Impaamiris kaniak ni Mommy a diak pulos manayonan ti tiempo. Masapul a mangiwayaak iti tiempo. Idi napatanorkon ti tarigagay nga agadal, inwayaakon dayta.”​—Natanya.

“Bayat a dumakdakkelak, nasursurok a masapul nga adda eskediulko nga agadal, ket surotek dayta, aniaman ti mapasamak.”​—Yolanda.

“No agadalka sakbay nga aglinglingayka, sigurado nga ad-adda a matagiragsakmo ti agadal​—ken dika makonsiensia inton aglinglingayka.”​—Diana.

Tandaanam: No dimo ikeddeng dagiti prioridadmo, masayang ti oras ken dimonto pulos malpas ti kayatmo nga aramiden iti naituding a tiempo. Adayo a nasaysayaat no sika a mismo ti mangiwaya iti tiempom nga agadal.​—Efeso 5:15, 16.

“Haiskulak ngamin isu a nagadu ti ar-aramidek! Ngem siguraduek nga umuna nga iraman iti eskediulko ti personal a panagadal iti Biblia.”​—Jordan.

Panunotem:

Kaano ti kayatmo nga eskediul ti panagadalmo?

[Kahon/Dagiti Ladawan iti panid 19]]

SINGASING DAGITI PADAM NGA AGTUTUBO

Zachary​—Saan la a ti ad-adalen dagiti nagannakmo wenno ti sabsabali ti adalem. No ti adalem ket dagidiay kayatmo a mismo a masursuro, makuna dayta a personal a panagadal.

Kaley​—Rugiam iti saggabassit. Uray no lima la a minuto no isu ti kabaelam, basta aramidem nga inaldaw. Sa in-inut nga ibaybayagmo iti 10 minuto, 15 minuto . . . Inton agangay, magusgustuamon dayta!

Daniela​—Dakkel met ti maitulong dagiti banag a kas iti nadumaduma ti kolorna a ballpen ken napintas a notebook, wenno agaramidka iti file iti kompiutermo a naganam iti ‘Personal Study.’

Jordan​—No magustuak ti topiko, makapagadalak iti napapaut. Kayatko met a naulimek ti pagadalak. Diak makaadal no naariwawa ti aglawlaw.

[Diagram iti panid 18]

(Para iti aktual a pannakaurnosna, kitaem ti publikasion)

Kartibem

Kulpiem