Ti Nabalitokan a Prutas ti Armenia

● Rinibun a tawen a maimulmula dagiti apricot iti Asia ken Europa. Impagarup dagiti taga-Europa a nagtaud ti apricot idiay Armenia isu nga inawaganda dayta iti mansanas ti Armenia.

Ita, agarup 50 ti nadumaduma a barayti ti apricot a maimulmula idiay Armenia. Maapit dagita manipud iti katengngaan ti Hunio agingga iti arinunos ti Agosto. Nadam-eg ti daga sadiay nga impugso ti bulkan, ken masansan nga aginit isu a naidumduma ti kinasam-it dagiti apricot a maap-apit sadiay. Gapu iti dayta, adu ti mangibilang kadagita a karaman kadagiti kaiimasan nga apricot iti lubong.

Dagiti gagangay a barayti ket kadakdakkel ti sarguelas ken napusiaw a duyaw agingga iti natayengteng nga orange ti kolorda. Nalamuyot ti ukisda ken nakilnet ti lasagda, saan unay a natubbog, ken mabalin a nasam-it wenno nasugpet ti ramanda. Sigun iti dadduma, ti raman dagiti nalatlatak a barayti ket medio umasping iti peach ken plum.

Dagiti agmulmula iti apricot ket nakapataud iti “nangisit” a barayti, ngem saan a pudno nga apricot dayta no di ket napagtipon nga apricot ken plum. Ti kolor ti burboran nga ukisna ket kasla tarong​—gistay nangisit​—ken duyaw ti lasagna. Nadumaduma ti nagan daytoy a prutas: pluot, plumcot, wenno aprium.

Agsabong dagiti kayo ti apricot sakbay nga agtubo dagiti bulongda. Dagiti sabongda a kaing-ingas ti sabong dagiti kayo a peach, plum, ken cherry, ket nabanglo, puraw, ken makapag-pollinate a bukbukodna. Kaaduanna a nasayaat ti panagtubo dagiti kayo nga apricot kadagiti lugar a nakalamlamiis no tiempo ti lam-ek ken nakadagdagaang no kalgaw. Kasapulan ngamin ti nalamiis a tiempo tapno nasayaat ti panagsabong ken panagbungada. Kalkalaingan ngarud ti klima ti Armenia para kadagiti apricot!

Nasustansia dagiti presko nga apricot. Kas pagarigan, nagsayaat dagita a gubuayan ti beta-carotene ken bitamina C. Adu ti nakaramanen kadagiti napakebbet nga apricot. Nalaka ngamin a malusak ken malungsot dagiti presko isu nga iti dadduma a paset ti lubong, nalatlatak dagiti napakebbet ngem kadagiti presko nga apricot. Imbag laengen ta nasustansia met dagiti napakebbet ken nasayaat a gubuayan ti fiber ken iron. Maar-aramid met dagita a palaman, brandy, ken juice.

Kanayonanna, nagpipintas dagiti ukit a maar-aramid kadagiti tarikayo ti apricot, kas iti duduk, maysa a nalatak a mapuyot a pagtokar idiay Armenia. No dadduma, maawagan dayta iti apricot pipe. Kadagiti tiendaan iti aglawlaw ti siudad ti Yerevan a kabesera ti Armenia, makakita met dagiti turista kadagiti nagpipintas a manomano ti pannakaukitna a sobenir manipud iti kayo ti apricot.

No adda presko nga apricot iti pagilian a pagnanaedam, ramanam dayta. Sigurado a magustuamto daytoy nananam a nabalitokan a prutas.